चितळे बंधू मिठाईवाले यांच्या भोर तालुक्यातील रांजे येथील अत्याधुनिक उत्पादन प्रकल्पाचे उद्घाटन १६ एप्रिल रोजी देवेंद्र फडणवीस यांच्या हस्ते होणार आहे. ‘रांजे व्हिजन पार्क’ असे नाव असलेल्या या प्रकल्पासाठी सुमारे २५ एकर जागेवर तब्बल २५० कोटी रुपयांची गुंतवणूक करण्यात आली आहे. चितळे कुटुंबातील चौथ्या पिढीचे प्रतिनिधी इंद्रनील व केदार चितळे यांनी पत्रकार परिषदेत ही माहिती दिली. इंद्रनील चितळे यांच्या मते, हा प्रकल्प देशांतर्गत तसेच आंतरराष्ट्रीय बाजारपेठेतील वाढत्या मागणीची पूर्तता करण्यासाठी महत्त्वाचा ठरेल. जागतिक दर्जाच्या अन्न सुरक्षा निकषांनुसार याची उभारणी झाली असून, त्याला एफएसएससी २२००० प्रमाणपत्रासह आंतरराष्ट्रीय मान्यता मिळाली आहे. या व्हिजन पार्कमध्ये मिठाई आणि नमकीन उत्पादनांसाठी दोन स्वतंत्र अत्याधुनिक केंद्रे कार्यान्वित करण्यात आली आहेत. या केंद्रांची दररोज सुमारे ४० टन उत्पादन करण्याची क्षमता आहे. विशेष म्हणजे, हा प्रकल्प ग्राहकांसाठी खुला ठेवण्यात येणार असून, तो ‘एक्सपीरियन्स सेंटर’च्या संकल्पनेवर आधारित आहे. केदार चितळे यांनी सांगितले की, ग्राहकांना येथे सर्व उत्पादने एकाच ठिकाणी पाहता व चाखता येतील. लवकरच येथे कॅफे सुरू करण्याचीही योजना आहे. प्रकल्पातील व्ह्यूइंग गॅलरीजमुळे ग्राहकांना स्वयंचलित उत्पादन प्रक्रिया आणि स्वच्छतेचे उच्च निकष प्रत्यक्ष पाहता येतील. याशिवाय, चितळे बंधूंचा इतिहास दर्शवणारी १०० मीटर लांबीची विशेष भिंतही येथे उभारण्यात आली आहे. कंपनी सध्या ४५० प्रकारचे पदार्थ तयार करत असून, देशातील १० राज्यांमध्ये १.२५ लाख टच पॉइंट्सद्वारे उत्पादने वितरित केली जात आहेत. पुढील तीन वर्षांत ही संख्या ५ लाखांपर्यंत नेण्याचा मानस आहे. तसेच, निर्यात व्यवसाय २० टक्क्यांपर्यंत वाढवण्याचेही कंपनीचे उद्दिष्ट आहे.
Source link
चितळे बंधूंच्या अत्याधुनिक प्रकल्पाचे उद्घाटन मुख्यमंत्री करणार:भोरमध्ये 250 कोटींच्या 'रांजे व्हिजन पार्क'चे 16 एप्रिलला उद्घाटन
