‘सद्रक्षणाय खलनिग्रहणाय’ हे ब्रीदवाक्य केवळ कायद्याच्या चौकटीपुरते मर्यादित न ठेवता, पुणे पोलिसांनी माणुसकीचा एक मोठा आदर्श घालून दिला आहे. आषाढी वारीनिमित्त ‘ज्ञानबा-तुकाराम’च्या जयघोषात पुण्यात दाखल झालेल्या पालखी सोहळ्यादरम्यान एका वारकऱ्याला अचानक फिट आल्याने तो रस्त्यावर कोसळला. मात्र, यावेळी तिथे बंदोबस्तावर असलेले पुणे शहर वाहतूक शाखेचे पोलिस उपायुक्त (DCP) डॉ. संदीप भाजीभाकरे यांच्या तत्परतेमुळे या वारकऱ्याचे प्राण वाचले आहेत. या घटनेचा व्हिडिओ सध्या सोशल मीडियावर तुफान व्हायरल होत असून, ‘खाकीतील माणुसकी’चे सर्वत्र भरभरून कौतुक केले जात आहे. जगद्गुरू संत तुकाराम महाराज आणि संतश्रेष्ठ ज्ञानेश्वर महाराजांच्या पालखीचे पुण्यात अत्यंत भक्तीमय वातावरणात आगमन झाले. लाखो वारकरी या सोहळ्यात तल्लीन होऊन मार्गक्रमण करत होते. मात्र, या गर्दीत चालत असताना एका वारकऱ्याला अचानक फिट आली आणि तो बेशुद्ध होऊन रस्त्यावरच कोसळला. अचानक घडलेल्या या प्रकारामुळे आजूबाजूच्या वारकऱ्यांमध्ये एकच गोंधळ उडाला. देवदूत बनून धावले पोलिस उपायुक्त नेमक्या याच वेळी वाहतूक आणि सुरक्षेचा आढावा घेत असलेले पोलिस उपायुक्त डॉ. संदीप भाजीभाकरे हे त्याच परिसरात होते. वारकरी खाली कोसळल्याचे पाहताच, एका क्षणाचाही विलंब न लावता ते गर्दीतून वाट काढत त्याच्या मदतीसाठी धावले. डॉ. भाजीभाकरे यांनी प्रसंगावधान राखत त्या वारकऱ्याला त्वरित आवश्यक ती प्राथमिक मदत दिली. कोणतीही वेळ न दवडता त्यांनी प्रशासकीय आणि वैद्यकीय पथकाशी संपर्क साधला आणि तातडीने रुग्णवाहिकेची व्यवस्था करून वारकऱ्याला पुढील वैद्यकीय उपचारासाठी रुग्णालयात पाठवले. वेळेवर योग्य ती वैद्यकीय मदत मिळाल्यामुळे या वारकऱ्याचा जीव वाचला. सोशल मीडियावर कौतुकाचा वर्षाव या संपूर्ण थरारक आणि माणुसकीचे दर्शन घडवणाऱ्या घटनेचा व्हिडिओ तिथल्या काही नागरिकांनी आपल्या मोबाईल कॅमेऱ्यात कैद केला. हा व्हिडिओ अल्पावधीतच सोशल मीडियावर व्हायरल झाला. ऊन, वारा, पाऊस याची पर्वा न करता बंदोबस्तासाठी रस्त्यावर उभे असणारे पोलिस जेव्हा एखाद्याचा जीव वाचवण्यासाठी स्वतःहून पुढे येतात, तेव्हा त्यांच्यातील ‘माणूस’ किती मोठा असतो, हे या घटनेने दाखवून दिले आहे. नेटकऱ्यांकडून डॉ. भाजीभाकरे यांच्यावर कौतुकाचा वर्षाव होत असून, “वारीच्या वाटेवर पोलिसांनीच खऱ्या अर्थाने विठ्ठलाची भूमिका बजावली,” अशा प्रतिक्रिया व्यक्त होत आहेत. वारीसाठी पोलिस प्रशासन पूर्णपणे सज्ज एकीकडे पोलिसांच्या या माणुसकीची चर्चा सुरू असतानाच, दुसरीकडे प्रशासनाने पालखीच्या स्वागताची आणि सुरक्षेची चोख व्यवस्था केली आहे. संत तुकाराम महाराजांच्या पालखीचा मुक्काम नाना पेठेतील निवडुंगा विठ्ठल मंदिरात आहे. संत ज्ञानेश्वर माऊलींच्या पालखीचा मुक्काम भवानी पेठेतील पालखी विठोबा मंदिरात (भव्य शामियान्यात) करण्यात आला आहे. वारकऱ्यांच्या सुरक्षिततेसाठी आणि अशा कोणत्याही आपत्कालीन परिस्थितीचा सामना करण्यासाठी संपूर्ण शहरात कडेकोट पोलिस बंदोबस्त, वैद्यकीय पथके आणि सीसीटीव्हीची करडी नजर ठेवण्यात आली आहे.
Source link
खाकीतील देवमाणूस!:वारीच्या वाटेवर वारकऱ्याला आली फिट; वाहतूक शाखेचे उपायुक्त संदीप भाजीभाकरे यांनी वाचवले प्राण
