डायल 112 या क्रमांकावर तब्बल सहा वेळा कॉल करून खोटी माहिती देणाऱ्या एका तरुणावर नर्सी नामदेव पोलिस ठाण्यात मंगळवारी ता. 26 गुन्हा दाखल झाला आहे. पोलिसांनी त्याला ताब्यात घेऊन समज दिली अन कुटुंबाच्या हवाली केले आहे. राज्यात पोलिस दलाच्या वतीने डायल 112 हा क्रमांक सुरु करण्यात आला असून अडचणीत सापडलेल्यांना नागरीकांना तातडीने पोलिस मदत मिळावी हा यामागचा उद्देश आहे. या क्रमांकावर संपर्क साधल्यानंतर नजीकच्या पोलिस ठाण्यास माहिती दिली जाते. त्यानंतर पोलिस ठाण्यात सुरु करण्यात आलेल्या डायल 112 कक्षातील कर्मचारी तातडीने घटनास्थळी जाऊन मदत कार्य सुरु करतात. दरम्यान, नर्सी नामदेव येथील वैजनाथ नागरे या तरुणाने डायल 112 या क्रमांकावर संपर्क साधून मला मारहाणी होत असून तातडीने मदत हवी आहे असे कळविले. त्यानंतर नर्सी पोलिस ठाण्याचे जमादार प्रभाकर माने यांच्या पथकाने तातडीने घटनास्थळी जाऊन पाहणी केली असता त्या ठिकाणी कोणीही नव्हते. त्यामुळे पथक पोलिस ठाण्यात परत आले. त्यानंतर काही वेळातच पुन्हा संपर्क साधून नर्सी येथे चोरी झाल्याची माहिती दिली. त्यावेळीही पोलिसांनी पाहणी केली तर कुठेही चोरी झाली नसल्याचे दिसून आले. यावेळी पोलिसांनी वैजनाथ याचा शोध घेऊन त्याला खोटी माहिती दिल्या प्रकरणी समज दिली अन त्याच्या कुटुंबियांच्या हवाली केले. मात्र त्यानंतरही त्याने तब्बल सहा वेळा संपर्क साधून खोटी माहिती दिली. या प्रकारानंतर जमादार प्रभाकर माने यांनी नर्सी पोलिस ठाण्यात तक्रार दाखल केली. यावरून पोलिसांनी वैजनाथ नागरे याच्या विरुध्द गुन्हा दाखल केला आहे. सहाय्यक पोलिस उपनिरीक्षक डी. के. दिघाडे पुढील तपास करीत आहेत.
Source link
पोलिसांच्या 112 वर कॉल करत खोटी माहिती देणं पडले महागात:तरुणावर नर्सी नामदेव पोलिस ठाण्यात गुन्हा दाखल
