राज्याच्या ऊर्जा सुरक्षिततेसाठी महत्त्वाच्या ठरणाऱ्या छत्तीसगडमधील गारे पालमा कोळसा खाण प्रकल्पाला गती मिळाली आहे. या खाणीतून कोळशाचा पहिला रेल्वे रॅक नागपूर येथील कोराडी औष्णिक विद्युत केंद्रात दाखल झाला आहे. यामुळे भविष्यातील वीज निर्मितीला स्थैर्य मिळणार असून, राज्याच्या ऊर्जा क्षेत्राला मोठा दिलासा मिळाला आहे. मुख्यमंत्री देवेंद्र फडणवीस यांनी या प्रसंगी रेल्वे रॅकला हिरवी झेंडी दाखवून प्रकल्पाची पाहणी केली. महानिर्मितीला मिळालेल्या गारे पालमा सेक्टर-२ या कोळसा खाणीमुळे आता उच्च दर्जाच्या कोळशाचा दीर्घकालीन आणि स्थिर पुरवठा सुनिश्चित झाला आहे. ही खाण सुमारे १,५८३ हेक्टर क्षेत्रात पसरलेली असून, पुढील ७७ वर्षांसाठी कोळसा उपलब्ध होणार आहे. या खाणीत उत्पादन सुरू झाले असून, आतापर्यंत सुमारे ८० हजार मेट्रिक टन कोळसा उत्पादन झाले आहे. खाणीत एकूण ६५५ दशलक्ष मेट्रिक टनांहून अधिक कोळसा साठा उपलब्ध आहे. या खाणीतून मिळणारा कोळसा कोराडी, चंद्रपूर आणि परळी येथील महत्त्वाच्या वीज प्रकल्पांना पुरवला जाईल. दरम्यान, माध्यमांशी बोलताना मुख्यमंत्री फडणवीस यांनी मराठा आरक्षण आंदोलनादरम्यान दाखल गुन्हे मागे घेण्याबाबत सरकारची भूमिका स्पष्ट केली. ते म्हणाले की, या संदर्भात कोणतीही नवीन बैठक झालेली नाही. आंदोलनादरम्यान शासकीय मालमत्तेचे नुकसान झालेल्या प्रकरणांतील गुन्हे सर्वोच्च न्यायालयाच्या आदेशानुसार मागे घेता येणार नाहीत. नाशिकमधील आयटी कंपनी प्रकरणाची सखोल चौकशी सुरू असून, दोषींवर कठोर कारवाई केली जाईल, असेही त्यांनी नमूद केले. राजकीय घडामोडींवर भाष्य करताना मुख्यमंत्री फडणवीस यांनी राहुल गांधींवर टीका केली. त्यांच्या मते, राहुल गांधींना सतत पराभवाला सामोरे जावे लागत आहे, ज्यामुळे काँग्रेसमध्ये त्यांच्या नेतृत्वाबाबत नाराजी वाढत आहे. पक्षातील अंतर्गत वातावरण विचलित करण्यासाठी ते अशा प्रकारची वक्तव्ये करत असल्याचा आरोप त्यांनी केला.
Source link
गारे पालमा खाणीतून पहिला कोळसा रॅक नागपुरात दाखल:राज्याच्या ऊर्जा सुरक्षिततेला मिळणार गती, मुख्यमंत्री उपस्थित
