समृद्धी महामार्गावर वर्ध्यातील विरूळ गावाजवळ पहाटेच्या सुमारास एक भीषण अपघात झाला आहे. या अपघातात पाच जणांचा जागीच मृत्यू झाला आहे. नागपूरकडे जाणाऱ्या एका कारला मागून भरधाव येणाऱ्या मालवाहू वाहनाने जोरदार धडक दिली. ही धडक इतकी भयंकर होती की, अपघात होताच कारने अचानक पेट घेतला आणि आगीच्या मोठ्या ज्वाळा उसळल्या. या दुर्घटनेत कारमधील चार जणांना बाहेर पडण्याची कोणतीही संधी मिळाली नाही आणि ते आतच जिवंत होरपळले. तर धडक देणाऱ्या मालवाहू वाहनातील एका व्यक्तीचाही मृत्यू झाला असून, अन्य एक जण गंभीर जखमी झाला आहे. इथेनॉल टँकर उलटल्याने झाला होता गोंधळ मिळालेल्या प्राथमिक माहितीनुसार, या अपघाताचे मूळ कारण काल रात्री घडलेल्या एका दुसऱ्या घटनेत आहे. याच मार्गावर रात्रीच्या सुमारास इथेनॉल वाहून नेणारा एक टँकर पलटी झाला होता. त्यामुळे सुरक्षेचा उपाय म्हणून महामार्गाची एक बाजू बंद करून दुसऱ्या बाजूने एकेरी वाहतूक सुरू करण्यात आली होती. याच एकेरी मार्गावरून वाहतूक सुरू असताना, पहाटेच्या सुमारास विरूळ गावाजवळ एका मालवाहू वाहनाच्या चालकाचे स्वतःच्या वाहनावरील नियंत्रण सुटले. हे अनियंत्रित वाहन थेट समोरून चाललेल्या कारवर जाऊन जोरदार आदळले आणि त्यानंतर हा मृत्यूचा तांडव घडला. प्रवाशांना जीव वाचवण्याची मिळाली नाही संधी अपघाताची भीषणता इतकी भयानक होती की, मागून धडक बसताच कारच्या इंजिनने तत्काळ पेट घेतला. काही क्षणांतच संपूर्ण कारला आगीने वेढा घातला. कारचे दरवाजे लॉक झाल्यामुळे किंवा प्रवाशी बेशुद्ध पडल्यामुळे त्यांना गाडीतून खाली उतरून स्वतःचा जीव वाचवण्याची साधी संधीही मिळाली नाही. बघता बघता चारही जणांचा आगीत अत्यंत दुर्दैवी अंत झाला. या अपघातात मरण पावलेले सर्व प्रवासी हे प्राथमिक माहितीनुसार वर्धा जिल्ह्यातीलच रहिवासी असल्याचे समोर येत आहे. पोलीस सध्या त्यांच्या नातेवाईकांचा शोध घेत आहेत. महामार्गावरील वाहतूक काही काळ ठप्प अपघाताची आणि कारने पेट घेतल्याची माहिती मिळताच महामार्ग पोलीस आणि पुलगाव पोलिसांचे पथक तातडीने घटनास्थळी दाखल झाले. त्यांनी बचावकार्य सुरू करत आगीवर नियंत्रण मिळवण्याचे प्रयत्न केले. गंभीर जखमी झालेल्या एका प्रवाशाला तातडीने बाहेर काढून जवळच्या रुग्णालयात उपचारासाठी दाखल करण्यात आले आहे. या भीषण घटनेमुळे समृद्धी महामार्गावरील वाहतूक काही काळासाठी पूर्णपणे बंद करण्यात आली होती. अपघातग्रस्त वाहने बाजूला केल्यानंतर आणि रस्ता मोकळा केल्यानंतर एका बाजूची वाहतूक टप्प्याटप्प्याने आणि संथ गतीने पूर्ववत करण्यात आली. मृतांची ओळख पटवण्याचे पोलिसांचे आव्हान आग इतकी भयंकर होती की कारमधील मृतदेहांची अवस्था अत्यंत विदारक झाली आहे. त्यामुळे मृतांची अचूक ओळख पटवणे हे पोलिसांसमोर मोठे आव्हान उभे राहिले आहे. आरटीओ (RTO) विभागाच्या मदतीने कारच्या नंबर प्लेटवरून आणि चेसिस नंबरवरून गाडीच्या मालकाचा शोध घेण्याचे काम युद्धपातळीवर सुरू आहे. हेही वाचा.. संभाजीनगरच्या दोन भावांचा जामखेडला अपघातात मृत्यू:दोन्ही वाहनांचा अक्षरशः झाला चुराडा जामखेड-कर्जत रोडवरील पाटोदा गरडाचे गावाजवळील धोकादायक वळणावर रविवारी (१९ जुलै) पहाटे अडीच ते तीन वाजेच्या सुमारास चारचाकी गाडी आणि टेम्पो यांच्यात समोरासमोर धडक झाली. यात श्रीगोंदे येथे शासकीय सेवेत कार्यरत असलेल्या दोन चुलतभावांचा जागीच मृत्यू झाला. अपघात इतका भीषण होता की, दोन्ही वाहनांचा अक्षरशः चक्काचूर झाला. निखिल मोतीलाल बहुरे (श्रीगोंदा तहसील कार्यालयात महसूल सहायक) आणि रामचंद्र महाजन बहुरे (श्रीगोंदा पाटबंधारे विभागात मोजणीदार) अशी मृत कर्मचाऱ्यांची नावे आहेत. हे दोघेही मूळचे छत्रपती संभाजीनगर जिल्ह्यातील रहिवासी होते. सविस्तर वाचा
Source link
समृद्धी महामार्गावर भीषण अपघात:ट्रकच्या धडकेनंतर कारने घेतला पेट, 5 जणांचा जागीच मृत्यू
