मीरा-भाईंदर शहरात बेदरकारपणे आणि भरधाव वेगाने वाहन चालवणाऱ्या चालकांचा धुमाकूळ सुरू असल्याचे पुन्हा एकदा समोर आले आहे. मीरा रोड परिसरातील जे.पी. रोडच्या मागील रस्त्यावर सोमवारी (17 ऑगस्ट) रात्री साडेआठच्या सुमारास भरधाव कारने रस्त्याच्या कडेला उभ्या असलेल्या नागरिकांना जोरदार धडक दिल्याची धक्कादायक घटना घडली. धडकेनंतर कारचालकाने वाहन न थांबवता घटनास्थळावरून पळ काढल्याचे समोर आले आहे. या घटनेचा थरारक व्हिडीओ मागील वाहनाच्या डॅशकॅममध्ये कैद झाला असून, तो सोशल मीडियावर मोठ्या प्रमाणात व्हायरल होत आहे. व्हिडीओ समोर आल्यानंतर परिसरातील नागरिकांमध्ये संताप व्यक्त होत असून, हिट अँड रनच्या या घटनेतील कार आणि चालकाचा तातडीने शोध घेऊन कठोर कारवाई करावी, अशी मागणी केली जात आहे. भरधाव कार थेट नागरिकांच्या दिशेने आली व्हायरल झालेल्या डॅशकॅम व्हिडीओमध्ये रात्रीच्या वेळी एक कार वेगाने रस्त्यावरून जाताना दिसत आहे. रस्त्याच्या कडेला काही नागरिक उभे असल्याचेही दिसून येते. अचानक भरधाव वेगाने आलेली कार या नागरिकांच्या दिशेने जाते आणि त्यांना धडक देते. धडक इतकी जोरदार होती की काही नागरिक रस्त्यावर फेकले गेल्याचे व्हिडीओमध्ये दिसत आहे. या घटनेमुळे काही क्षणांतच परिसरात गोंधळाची परिस्थिती निर्माण झाली. मात्र, धडक दिल्यानंतर चालकाने कार थांबवून जखमी नागरिकांची मदत करण्याऐवजी वाहनाचा वेग वाढवत घटनास्थळावरून पलायन केल्याचे व्हिडीओत दिसत आहे. त्यामुळे या घटनेने हिट अँड रनचा गंभीर प्रश्न पुन्हा ऐरणीवर आला आहे. डॅशकॅममध्ये कैद झाला अपघाताचा थरार या संपूर्ण घटनेचे चित्रीकरण मागून येणाऱ्या वाहनाच्या डॅशकॅममध्ये झाले आहे. त्यामुळे संबंधित वाहनाची हालचाल आणि अपघाताचा संपूर्ण घटनाक्रम कॅमेऱ्यात कैद झाला आहे. सोशल मीडियावर व्हिडीओ व्हायरल झाल्यानंतर मीरा-भाईंदर परिसरातील नागरिकांमध्ये संतापाचे वातावरण आहे. रात्रीच्या वेळी रस्त्यावर अशा प्रकारे बेफाम वेगाने वाहने चालवली जात असतील, तर पादचारी आणि इतर वाहनचालकांच्या सुरक्षेचा प्रश्न गंभीर असल्याचे नागरिकांचे म्हणणे आहे. अपघातात किती जण जखमी? अधिकृत माहिती अद्याप नाही या अपघातात नेमके किती नागरिक जखमी झाले, त्यांना उपचारासाठी कुठे दाखल करण्यात आले आणि त्यांची प्रकृती कशी आहे, याबाबतची अधिकृत माहिती अद्याप समोर आलेली नाही. तसेच संबंधित कारचालकाविरोधात पोलिसांनी कोणती कारवाई केली आहे, याचीही अधिकृत माहिती उपलब्ध झालेली नाही. मात्र, व्हायरल व्हिडीओच्या आधारे वाहनाची ओळख पटवून चालकाचा शोध घेण्याची मागणी नागरिकांकडून होत आहे. भरधाव वाहनांवर नियंत्रण कधी? मिरा-भाईंदर शहरात वाहनांची संख्या वाढत असताना अनेक ठिकाणी वेगमर्यादेचे उल्लंघन आणि बेदरकारपणे वाहन चालवण्याच्या घटना घडत असल्याच्या तक्रारी नागरिकांकडून केल्या जात आहेत. अशा परिस्थितीत रस्त्यावर उभ्या असलेल्या किंवा चालणाऱ्या नागरिकांच्या सुरक्षेचा प्रश्न निर्माण होत आहे. विशेषतः रात्रीच्या वेळी भरधाव वाहनांवर नियंत्रण ठेवण्यासाठी वाहतूक पोलिसांकडून अधिक प्रभावी कारवाईची गरज असल्याचे नागरिकांचे म्हणणे आहे. नागरिकांना धडक दिल्यानंतर वाहन न थांबवता पसार होणाऱ्या चालकाचा शोध घेऊन त्याच्यावर कठोर कारवाई करावी आणि शहरातील बेदरकार वाहनचालकांवर पोलिसांनी कारवाईची मोहीम तीव्र करावी, अशी मागणी आता जोर धरत आहे. दरम्यान, या घटनेचा व्हिडीओ समोर आल्यानंतर पोलिस या फुटेजच्या आधारे संबंधित वाहनाचा शोध घेतात का आणि चालकाविरोधात कोणती कारवाई केली जाते, याकडे आता सर्वसामान्यांचे लक्ष लागले आहे. हेही वाचा… नाशिकमध्ये प्रेयसीने मित्राच्या मदतीने प्रियकराचा गळा चिरला:18 तासांनी मृतदेह घाटात फेकला; दाेघे ताब्यात, पोलिसांनी कसारा येथून शाेधला मृतदेह ‘लिव्ह इन’मध्ये राहणाऱ्या प्रेयसीने मित्राच्या साथीने प्रियकराची घरात चाकूने गळा चिरून हत्या केली. पुरावा नष्ट करण्यासाठी 18 तास मृतदेह घरात ठेवून कारमधून नेत तो कसारा घाटात फेकून दिला. मात्र, गुन्हे शाखा युनिट 1 चे नाझीम पठाण, मुख्तार शेख आणि पथकाने खबऱ्याने दिलेल्या माहितीवरून कार चालकाला ताब्यात घेत मृतदेह शोधला. त्याची ओळखही पटवली. वसंत गोरखनाथ सातपुते (40, रा. स्वराज्यनगर, पाथर्डी फाटा) असे मृत व्यक्तीचे नाव आहे. कुठलीही मिसिंग दाखल नसताना हा गंभीर गुन्हा उघडकीस आणण्यात पोलिसांना यश आले. येथे वाचा सविस्तर
Source link
मीरा रोडवर भरधाव कारचा थरार, व्हिडिओ:रस्त्याच्या कडेला उभ्या नागरिकांना उडवलं, धडकेनंतर चालक पसार; डॅशकॅममध्ये घटना कैद
