वेरूळ बसस्थानकात स्मार्ट सिटी बसचा स्फोट:प्रवासी नसल्याने टळली मोठी दुर्घटना; इंजिन स्फोटाने धांदल, घटनेनंतर भीतीचे सावट

वेरूळ येथील भोसले चौक बसस्थानकात बुधवारी सायंकाळी घडलेल्या एका घटनेने परिसरात मोठी खळबळ उडाली. ‘स्मार्ट शहर बस’ म्हणून ओळखल्या जाणाऱ्या मनपा बसच्या इंजिनमध्ये अचानक स्फोट झाल्याने नागरिकांमध्ये भीतीचे वातावरण निर्माण झाले. स्फोटानंतर काही क्षणांतच बसमधून मोठ्या प्रमाणात धूर बाहेर पडू लागला. त्यामुळे बसस्थानक परिसरात उपस्थित असलेले लोक घाबरून इथून तिथे पळू लागले. ही बस छत्रपती संभाजीनगर ते वेरूळ या मार्गावर धावणारी असून, ती बिघाडामुळे भोसले चौकात दुरुस्तीसाठी उभी करण्यात आली होती. सुदैवाने या बसमध्ये त्या वेळी एकही प्रवासी नव्हता. त्यामुळे संभाव्य मोठी जीवितहानी टळली. प्रत्यक्षदर्शींनी दिलेल्या माहितीनुसार, दुरुस्ती सुरू असताना अचानक इंजिनमधून मोठा आवाज झाला आणि लगेचच धुराचे लोट बाहेर येऊ लागले. या घटनेने काही काळ परिसरात तणावाचे वातावरण निर्माण झाले होते. गेल्या काही दिवसांपासून वाढलेल्या तापमानाचा परिणाम बसच्या कार्यक्षमतेवर होत असल्याचे समोर येत आहे. उन्हाच्या तीव्रतेमुळे ‘स्मार्ट शहर बस’ वारंवार बंद पडत असल्याच्या तक्रारी वाढल्या आहेत. बुधवारी घडलेल्या या प्रकारातही उन्हामुळे इंजिन अधिक तापले असावे आणि त्यामुळेच स्फोट झाला असावा, असा प्राथमिक अंदाज चालकाने व्यक्त केला आहे. या स्फोटानंतर वेरूळ परिसरातील नागरिक, पर्यटक आणि भाविकांमध्ये संभ्रम निर्माण झाला आहे. विशेषतः वेरूळ लेणी आणि घृष्णेश्वर मंदिर दर्शनासाठी येणाऱ्या भाविकांची संख्या मोठी असते. त्यामुळे बससेवेच्या सुरक्षिततेबाबत प्रश्न उपस्थित होत आहेत. आता सिटी बसने प्रवास करणे सुरक्षित आहे का? असा सवाल अनेकांच्या मनात निर्माण झाला आहे. या घटनेमुळे सार्वजनिक वाहतुकीवरील विश्वास डळमळीत झाल्याचे चित्र दिसून येत आहे. घटनेची माहिती मिळताच मनपा परिवहन विभागाचे अधिकारी घटनास्थळी दाखल झाले आणि त्यांनी परिस्थितीची पाहणी केली. बसच्या इंजिनचा स्फोट नेमका कशामुळे झाला, याचा शोध घेण्यासाठी तांत्रिक तपासणी केली जाणार असल्याचे त्यांनी स्पष्ट केले. तसेच, उन्हाळ्याच्या पार्श्वभूमीवर सर्व बसांची विशेष तपासणी करण्याचे आदेश देण्यात आले आहेत. आवश्यक खबरदारी घेतली जाईल प्रवाशांच्या सुरक्षिततेला सर्वोच्च प्राधान्य दिले जाईल, असेही अधिकाऱ्यांनी सांगितले. अशा घटना पुन्हा घडू नयेत यासाठी आवश्यक ती खबरदारी घेतली जाईल, असे आश्वासन देण्यात आले आहे. दरम्यान, या घटनेनंतर वेरूळमध्ये भीतीचे वातावरण असले तरी मोठी दुर्घटना टळल्याने नागरिकांनी सुटकेचा निश्वास सोडला आहे.



Source link