एमआयडीसी पैठण पोलिसांनी मंगळवारी ढोरकीन शिवारात धडक कारवाई करत कत्तलीसाठी आणून डांबून ठेवण्यात आलेल्या तब्बल सात गोवंश जनावरांची सुटका केली. सुमारे 2 लाख 25 हजार रुपये किंमतीच्या या जनावरांना मृत्यूच्या दारातून बाहेर काढत एमआयडीसी पैठण पोलिसांनी आरोपीला ताब्यात घेतले असून परिसरात या कारवाईची जोरदार चर्चा सुरू आहे. एमआयडीसी पैठण पोलिसांकडून मिळालेल्या माहितीनुसार, एमआयडीसी पैठण पोलिस ठाण्याचे सहाय्यक पोलिस निरीक्षक ईश्वर जगदाळे यांना ढोरकीन शिवारातील एका शेतात गोवंश जनावरे कत्तलीसाठी आणून ठेवण्यात आल्याची गोपनीय माहिती मिळाली होती. माहिती मिळताच सहाय्यक पोलिस निरीक्षक ईश्वर जगदाळे यांनी वेळ न दवडता विशेष पथक तयार करून संबंधित ठिकाणी छापा टाकला. ढोरकीन शिवारातील इलियास अब्दुल शेख यांच्या शेतात पोलिसांनी धाड टाकली असता सात गोवंश जनावरे बांधून ठेवलेली आढळून आली. पोलिसांनी तत्काळ जनावरांची सुटका करत त्यांना सुरक्षित ताब्यात दिले. या प्रकरणी इलियास शेख यास ताब्यात घेण्यात आले असून त्याच्याविरोधात गुन्हा दाखल करण्याची प्रक्रिया सुरू करण्यात आली आहे. या संपूर्ण कारवाईत सहाय्यक पोलिस निरीक्षक ईश्वर जगदाळे यांनी दाखवलेली तत्परता आणि नियोजन विशेष ठरले. गोपनीय माहितीची अचूक पडताळणी, तातडीने पथकाची उभारणी आणि धाडसी छापा यामुळे संभाव्य अवैध कत्तल रोखण्यात पोलिसांना यश आले. पोलिस अधीक्षक प्रकाश जाधव, अप्पर पोलिस अधीक्षक प्रशांत स्वामी आणि उपविभागीय पोलिस अधिकारी सुनील पाटील यांच्या मार्गदर्शनाखाली ही कारवाई करण्यात आली. या मोहिमेत पोलिस अंमलदार राहुल मोहतमल, ज्ञानेश्वर भवर, अमित घोडके, कृष्णा उगले तसेच होमगार्ड श्रीकांत त्रिभुवन, विष्णू शिंदे, किरण वाल्हेकर आणि वाल्मिक घोंगडे यांनी सक्रिय सहभाग घेतला. एमआयडीसी पैठण पोलिसांच्या या धडाकेबाज कारवाईमुळे अवैध गोवंश कत्तल प्रकरणांवर पोलिसांचा वचक अधिक मजबूत झाल्याचे बोलले जात आहे.
Source link
कत्तलीसाठी आणलेल्या 7 गोवंश जनावरांची सुटका:पैठण एमआयडीसी पोलिसांची ढोरकीन शिवारात धडक कारवाई
