सर्वोपचार रुग्णालयातील गैरप्रकारावर युवक काँग्रेसचा घेराव:जीएमसीतील व्हिडिओ व्हायरल प्रकरण; प्रशासनाकडून रुग्णसेवा सुधारण्याचे देण्यात आले आंदोलकांना आश्वासन‎

.

सर्वोपचार रुग्णालयातील बाह्यरुग्ण विभागात गत आठवड्यात घडलेल्या संतापजनक प्रकारामुळे राजकीय पक्ष, सामाजिक संघटनांनी आक्रमक पवित्रा घेतला आहे. दोन दिवसांपूर्वी शिवसेनेच्या ठाकरे गटाने आणि संभाजी ब्रिगेडने सर्वोपचार रुग्णालयात धाव घेत कारवाईची मागणी केली. त्यानंतर बुधवारी युवक काँग्रेसनेही आक्रमक पवित्रा घेत महाविद्यालयात धाव घेतली. युवक काँग्रेसच्या आंदोलनाचा वाढता रोष लक्षात घेत प्रशासनाकडून संबंधित कर्मचाऱ्यांवर कारवाईची घोषणा करण्यात आली. त्यामुळे प्रशासनाने या प्रकरणाची गंभीर दखल घेतल्याचे स्पष्ट झाले. आंदोलनानंतर आ. पठाण यांच्या उपस्थितीत सर्वोपचार रुग्णालयात आढावा बैठक पार पडली. यावेळी डॉ. सोनू यांनी व्हायरल व्हिडिओतील प्रकाराबाबत करण्यात आलेल्या कारवाईची माहिती दिली. तसेच रुग्णालयात घडलेला प्रकार दुर्दैवी असल्याची कबुली देत प्रशासनाच्या वतीने रुग्णसेवेत सुधारणा करण्यासाठी ठोस पावले उचलण्यात येणार असल्याचे सांगितले.

आंदोलनात युवक काँग्रेसचे उपाध्यक्ष राहुल सारवान, पूर्व विधानसभा अध्यक्ष अंकुश तायडे पाटील, अकोला पश्चिम विधानसभा अध्यक्ष मोहम्मद शारिक, माजी नगरसेवक पराग कांबळ, मो. इरफान, नगरसेविका सुवर्णा रेखा जाधव, महिला काँग्रेस अध्यक्ष कशिश खान, विजय जामाणिक, विधी सेलचे अध्यक्ष अंकुश गावंडे, विद्यार्थी काँग्रेस जिल्हाध्यक्ष अभिजित तवर, ऋषिकेश जामोदे, शुभम हिरळकर, योगेश गावंडे, अजय खंडारे, साहिल तेलगोटे आदींसह युवक काँग्रेसचे पदाधिकारी उपस्थित होते.