पुणे पोलिसांच्या गुन्हे शाखा युनिट-7 ने खराडी येथील ‘हॉटेल शिवशाही पॅलेस’वर छापा टाकून हायप्रोफाईल वेश्या व्यवसायाचा पर्दाफाश केला आहे. या कारवाईत एका पीडित महिलेची सुटका करण्यात आली असून, लॉज चालक आणि मालकाविरुद्ध गुन्हा दाखल करण्यात आला आहे. पोलिसांनी दिलेल्या माहितीनुसार, खराडी येथील डाऊन टाऊन रोडवरील पराशर हौसिंग सोसायटीमध्ये असलेल्या ‘हॉटेल शिवशाही पॅलेस’मध्ये वेश्या व्यवसाय सुरू असल्याची खात्रीशीर माहिती युनिट-7 चे वरिष्ठ पोलिस निरीक्षक संतोष सोनवणे यांना मिळाली होती. एजंट मोबाईल क्रमांकावरून व्हॉट्सॲप चॅटद्वारे ग्राहकांशी संपर्क साधून मुली पुरवत असल्याचे समोर आले होते. या माहितीच्या आधारे, वरिष्ठ अधिकाऱ्यांच्या परवानगीने पोलिसांनी या ठिकाणी बनावट ग्राहक आणि पंचांच्या उपस्थितीत सापळा रचला. बनावट ग्राहकाकडून इशारा मिळताच पोलिसांनी हॉटेल शिवशाही पॅलेसवर छापा टाकला. या कारवाईत वेश्या व्यवसायाच्या विळख्यातून एका पीडित महिलेची सुटका करण्यात आली. तसेच, घटनास्थळावरून रोख रकमेसह एकूण 74 हजार रुपयांचा मुद्देमाल जप्त करण्यात आला. याप्रकरणी लॉज चालक रोहित छोटूराम पटेल (वय 20, रा. खराडी, पुणे) आणि लॉज मालक रामचंद्र बळीराम पांडुळे (वय 31, रा. राजाराम पाटील नगर, खराडी) तसेच एका एजंटविरुद्ध खराडी पोलिस ठाण्यात गुन्हा दाखल करण्यात आला आहे. आरोपींवर भारतीय न्याय संहिता कलम 143, 223, 3(5) आणि अनैतिक मानवी वाहतूक प्रतिबंध कायदा कलम 3, 4, 5 अंतर्गत गुन्हा नोंदवण्यात आला आहे. आरोपींना पुढील कारवाईसाठी खराडी पोलिसांच्या ताब्यात देण्यात आले आहे. ही यशस्वी कारवाई अप्पर पोलिस आयुक्त (गुन्हे) तेजस्वी सातपुते, पोलिस उप आयुक्त गौहर हसन आणि सहाय्यक पोलिस आयुक्त राजेंद्र मुळीक यांच्या मार्गदर्शनाखाली वरिष्ठ पोलिस निरीक्षक संतोष सोनवणे, सहायक पोलिस निरीक्षक मदन कांबळे व युनिट-7 च्या पोलिस पथकाने केली.
Source link
पुण्यात 'शिवशाही पॅलेस' हॉटेलवर गुन्हे शाखेचा छापा:वेश्या व्यवसायातून महिलेची सुटका, चालक-मालकावर गुन्हा दाखल
