नवी मुंबई शहरातील कोपरखैरणे सेक्टर-19 परिसरात रात्रीच्या सुमारास गुंडगिरीची एक धक्कादायक घटना समोर आली आहे. घरासमोर बसण्याला विरोध केल्याच्या किरकोळ कारणावरून दोन तरुणांनी तलवार आणि चॉपरचा धाक दाखवत एका तरुणावर जीवघेणा हल्ला चढवला. इतकेच नव्हे, तर मुलाचा जीव वाचवण्यासाठी आणि वाद मिटवण्यासाठी मध्ये आलेल्या त्याच्या आईलाही आरोपींनी सोडले नाही; तिच्या डोक्यात शस्त्राने वार करून तिला गंभीर जखमी केले. या घटनेमुळे संपूर्ण परिसरात तीव्र दहशतीचे वातावरण पसरले असून कायदा-सुव्यवस्थेचा प्रश्न पुन्हा ऐरणीवर आला आहे. मिळालेल्या माहितीनुसार, कोपरखैरणे गावातील सेक्टर-19 मधील योगिता मेडिकलजवळील एका घरासमोर काही तरुण नियमितपणे अड्डा जमावून बसत असत. एका स्थानिक महिलेने या त्रासाला कंटाळून त्यांना तिथे बसण्यास ठाम विरोध केला होता. याच गोष्टीचा राग मनात धरून संतापलेल्या आरोपींनी त्या महिलेच्या मुलाला शिवसेना शाखेसमोर गाठले. काही समजण्याच्या आतच आरोपींनी तलवार आणि चॉपरसारख्या धारदार शस्त्रांनी त्याच्यावर हल्ला केला. मुलाला वाचवण्यासाठी आई पुढे धावली असता, नराधमांनी तिच्यावरही वार केले. या हल्ल्यात आई आणि मुलगा दोघेही गंभीर जखमी झाले असून त्यांच्यावर रुग्णालयात उपचार सुरू आहेत. एकाला अटक, फरार साथीदाराचा शोध सुरू या घटनेची गंभीर दखल घेत कोपरखैरणे पोलिस ठाण्यात आरोपींविरोधात ‘भारतीय न्याय संहिता’ (BNS), ‘शस्त्र अधिनियम’ तसेच ‘महाराष्ट्र पोलिस अधिनियमा’अंतर्गत गंभीर गुन्हे दाखल करण्यात आले आहेत. पोलिसांनी तात्काळ कारवाई करत एका आरोपीला बेड्या ठोकल्या आहेत, तर त्याचा दुसरा साथीदार अद्याप फरार आहे, घटनास्थळावरील सीसीटीव्ही फुटेज आणि तांत्रिक पुराव्यांच्या आधारे तपास वेगाने सुरू आहे. फरार आरोपीचा शोध घेण्यासाठी विशेष पथक तयार करण्यात आले असून त्याला लवकरच गजाआड केले जाईल, असे कोपरखैरणे पोलिस सांगितले आहे.
Source link
नवी मुंबईत गुंडांचा हैदोस:घरासमोर बसू नको म्हणाणाऱ्या तरुणासह आईवर तलवार अन् चॉपरने जीवघेणा हल्ला, एकाला अटक
