विद्यार्थी उतरले रस्त्यावर:मुंबईत परवानगीशिवाय आंदोलने; पाच दिवसांत 400 जणांवर गुन्हे दाखल

मुंबई पोलिसांनी १८ जुलै ते २२ जुलैदरम्यान बेकायदेशीर जमाव जमवणे आणि जमावबंदीच्या आदेशांचे उल्लंघन करून आंदोलने केल्याप्रकरणी ४०० जणांवर गुन्हे दाखल केले. विविध पोलिस ठाण्यांमध्ये हे गुन्हे दाखल करण्यात आले असून गुन्ह्यात नावे असलेल्यांना नोटीस बजावून सोडण्यात आले, असे अधिकाऱ्यांनी बुधवारी सांगितले. नवी दिल्लीत कॉक्रोच जनता पार्टीच्या नेतृत्वाखाली सुरू असलेल्या विद्यार्थी आंदोलनाला पाठिंबा देण्यासाठी मुंबईत निदर्शने केली जात आहेत. शिवाजी पार्क, चैत्यभूमी, चेंबूर आणि शिवसेना भवन यांसह विविध ठिकाणी निदर्शने करण्यात आली असली तरी त्यासाठी कोणतीही परवानगी देण्यात आली नव्हती, असे एका अधिकाऱ्याने सांगितले. दिल्लीतील जंतर मंतर आंदोलनस्थळावरून उपोषणकर्ते कार्यकर्ते सोनम वांगचुक यांना सफदरजंग रुग्णालयात दाखल केल्याच्या निषेधार्थ १९ जुलै रोजी शिवाजी पार्क येथे आयोजित सभेला शिवसेना पक्षप्रमुख उद्धव ठाकरे यांनी संबोधित केले होते. पोलिसांच्या माहितीनुसार, कडेकोट पोलिस बंदोबस्तात चेंबूर येथील डॉ. बाबासाहेब आंबेडकर उद्यानात शेकडो आंदोलक जमले होते. पोलिसांनी अनेक आंदोलकांना ताब्यात घेतले, तर काहींना जबरदस्तीने पोलिस गाड्यांमध्ये बसवून स्थानिक पोलिस ठाण्यात नेल्याचा आरोप प्रत्यक्षदर्शींनी केला आहे. चेंबूरमधील आंदोलकांच्या हातात शिक्षण व्यवस्थेत सुधारणा करणे आणि कथित पेपर फुटीवर कारवाई करण्याची मागणी करणारे फलक होते. काही आंदोलकांना ताब्यात घेतल्यानंतर पोलिसांनी उर्वरित गर्दी पांगवली. दादर येथील शिवसेना भवनाबाहेरही मोठा जनसमुदाय जमला होता आणि त्यांनी केंद्रीय शिक्षणमंत्री धर्मेंद्र प्रधान यांच्याविरोधात घोषणाबाजी केली. कोणताही अनुचित प्रकार घडू नये यासाठी पोलिसांनी सर्व आंदोलनस्थळी कडेकोट बंदोबस्त ठेवला होता. बेकायदेशीर अडवणूक, जमाव जमवणे यासह विविध कलमे लावली दादर येथील चैत्यभूमीवर सोमवारी विनापरवानगी केलेल्या आंदोलनाप्रकरणीही मुंबई पोलिसांनी कारवाई सुरू केली असून एफआयआर नोंदवण्याची प्रक्रिया सुरू आहे, असे अधिकाऱ्याने सांगितले. सर्व १३ प्रकरणांत सरकारी कर्मचाऱ्याच्या आदेशाचे उल्लंघन करणे, बेकायदेशीर अडवणूक करणे आणि बेकायदेशीर जमाव जमवणे यांसह विविध कलमांखाली गुन्हे दाखल केले.परीक्षांमधील कथित गैरव्यवहाराविरोधात सीजेपीने सुरू केलेल्या आंदोलनाला पाठिंबा देण्यासाठी बुधवारी मुंबईत अनेक ठिकाणी निदर्शने करण्यात आली.



Source link