महाराष्ट्राचे माजी उपमुख्यमंत्री अजित पवार यांच्या विमान अपघाती निधनानंतर इस्कॉन खारघरचे अध्यक्ष डॉ. सूरदासजी यांनी केलेल्या एका वक्तव्यामुळे नवा वाद निर्माण होण्याची शक्यता आहे. ‘श्रीमद्भागवत’ ग्रंथ वाचल्यास अपघाती मृत्यू होत नाही, असा वैयक्तिक दावा त्यांनी केला आहे. विशेष म्हणजे, आषाढी एकादशीच्या दिवशी आपण अजित पवारांना हा ग्रंथ भेट दिला होता आणि तो आवर्जून वाचण्याची विनंतीही केली होती, असे डॉ. सूरदास यांनी सांगितले. अजित पवारांनी हा ग्रंथ वाचला नसावा, असा आपला विश्वास असल्याचेही त्यांनी म्हटले. मी अजित पवारांना स्वतःच्या हाताने ग्रंथ दिला होता डॉ. सूरदास यांनी माध्यमांशी बोलताना सांगितले की, मागील आषाढी एकादशीच्या दिवशी त्यांनी अजित पवारांच्या कार्यालयात जाऊन त्यांना ‘श्रीमद्भागवत’ ग्रंथ भेट दिला होता. यावेळी उपस्थित असलेल्या पत्रकारांना कदाचित हा प्रसंग आठवत असेल, असेही त्यांनी म्हटले. “मी त्यांना हा ग्रंथ स्वतःच्या हाताने भेट दिला होता. कृपया हा ग्रंथ जरूर वाचा, अशी विनंती मी त्यांना वारंवार केली होती. हा केवळ एखाद्या पुस्तकासारखा वाचू नका,” असे सूरदास यांनी सांगितले. यानंतर त्यांनी या ग्रंथाच्या वाचनासंदर्भात आपला वैयक्तिक विश्वास व्यक्त केला. “जो कोणी हा ग्रंथ संपूर्णपणे आपल्या जीवनात वाचतो, त्याचा अपघाती मृत्यू होत नाही,” असा दावा त्यांनी केला. अजित पवार यांच्यासोबत घडलेली घटना अत्यंत दुर्दैवी असल्याचेही सूरदास यांनी यावेळी नमूद केले. अजित पवारांना नेमका कधी दिला होता ग्रंथ? सूरदास यांच्या म्हणण्यानुसार, त्यांनी मागील आषाढी एकादशीला अजित पवारांना ‘श्रीमद्भागवत’ ग्रंथ भेट दिला होता. त्या वेळी अजित पवारांच्या कक्षात अनेक पत्रकार उपस्थित होते आणि आपण त्यांना हा ग्रंथ आवर्जून वाचण्यास सांगितले होते, असा त्यांचा दावा आहे. ‘ग्रंथ न वाचल्यामुळे अपघात झाला’ असा निष्कर्ष काढता येत नाही. सूरदास यांनीही याबाबत निश्चित तथ्य मांडण्याऐवजी आपला विश्वास व्यक्त केला आहे. अजित पवारांचा बारामतीत विमान अपघातात मृत्यू अजित पवार यांचा 28 जानेवारी 2026 रोजी बारामती विमानतळाजवळ विमान अपघातात मृत्यू झाला. मुंबईहून बारामतीकडे जाणारे त्यांचे चार्टर विमान बारामती विमानतळावर उतरण्याचा प्रयत्न करत असताना दुर्घटनाग्रस्त झाले. या अपघातात अजित पवार यांच्यासह विमानातील अन्य चार जणांचा मृत्यू झाला. अपघातग्रस्त विमान Learjet 45 (VT-SSK) होते. विमान मुंबईतील छत्रपती शिवाजी महाराज आंतरराष्ट्रीय विमानतळावरून बारामतीच्या दिशेने रवाना झाले होते. लँडिंगच्या प्रयत्नादरम्यान विमान दुर्घटनाग्रस्त झाले. या दुर्घटनेच्या कारणांचा तपास AAIB कडून करण्यात आला. अपघाताबाबतच्या प्राथमिक तपासात काय समोर आले? या घटनेनंतर अपघाताच्या कारणांचा सखोल तपास सुरू करण्यात आला. AAIB च्या प्राथमिक अहवालानुसार, विमान बारामतीत उतरण्याचा प्रयत्न करत असताना दृश्यमानता निर्धारित मर्यादेपेक्षा कमी होती. अहवालात लँडिंगच्या वेळी दृश्यमानता सुमारे ३ किलोमीटर असल्याचे नमूद करण्यात आले असून, ही परिस्थिती विमानाच्या सुरक्षित लँडिंगसाठी महत्त्वाची ठरू शकते, असे तपासातून समोर आले. तपासात बारामती विमानतळाच्या धावपट्टीची स्थिती, दृश्यमानता आणि विमानतळावरील काही पायाभूत सुविधांबाबतही निरीक्षणे नोंदवण्यात आली. त्यामुळे अजित पवार यांच्या मृत्यूमागील कारणांचा अंतिम निष्कर्ष अधिकृत तपास पूर्ण झाल्यानंतरच स्पष्ट होणार आहे. विमानातील डिजिटल फ्लाइट डेटा रेकॉर्डरमधील माहितीही तपास यंत्रणांनी मिळवली होती, तर कॉकपिट व्हॉइस रेकॉर्डरला आगीमुळे नुकसान झाल्याचे नागरी विमान वाहतूक मंत्रालयाने सांगितले होते. सूरदास यांच्या वक्तव्यामुळे चर्चेला उधाण अजित पवारांच्या अपघाती निधनाची अधिकृत चौकशी सुरू असताना धार्मिक ग्रंथाच्या वाचनाचा आणि अपघाती मृत्यूचा संबंध जोडणारे सूरदास यांचे वक्तव्य समोर आले आहे. त्यामुळे या वक्तव्यावरून धार्मिक श्रद्धा, वैज्ञानिक दृष्टिकोन आणि अपघाताच्या कारणांबाबत नव्याने चर्चा होण्याची शक्यता आहे. महत्त्वाचे म्हणजे, अजित पवारांचा मृत्यू विमान अपघातात झाला, ही अधिकृतरीत्या नोंदलेली बाब आहे; मात्र ‘श्रीमद्भागवत वाचले असते तर त्यांचा मृत्यू झाला नसता’ हा सूरदास यांचा वैयक्तिक दावा आहे. या दाव्याला अपघाताच्या अधिकृत तपास अहवालाचा आधार नाही. हेही वाचा… मुलींचा हात धराल तर मार खाल!:विलेपार्ले येथील साठ्ये कॉलेजमधील राड्यानंतर अमित ठाकरेंचा अभाविपला इशारा विलेपार्ले येथील साठ्ये महाविद्यालयाबाहेर सदस्य नोंदणी मोहिमेवरून महाराष्ट्र नवनिर्माण विद्यार्थी सेना आणि अखिल भारतीय विद्यार्थी परिषद (अभाविप) यांच्या कार्यकर्त्यांमध्ये झालेल्या राड्याचे पडसाद आता राजकीय पातळीवर उमटू लागले आहेत. महाराष्ट्र नवनिर्माण विद्यार्थी सेनेचे अध्यक्ष अमित ठाकरे यांनी या घटनेवरून अभाविपला थेट इशारा दिला आहे. “तुम्ही मुलींवर हात टाकलात तर आम्ही तुम्हाला मारणारच. आमच्या नादाला लागू नका,” असा आक्रमक इशारा अमित ठाकरे यांनी दिला. येथे वाचा संपूर्ण बातमी
Source link
श्रीमद्भागवत वाचलं असतं तर अपघाती मृत्यू झाला नसता:अजित पवारांबाबत इस्कॉन अध्यक्ष डॉ. सूरदास यांचा दावा, म्हणाले- ‘मी स्वतः ग्रंथ भेट दिला होता’
