सावकारी पाशातून मुक्तीसाठी पथनाट्य:रेवसा गावात 'लोकसंवाद' कार्यक्रमातून जनजागृती

अमरावती जिल्ह्यातील रेवसा गावात ‘लोकसंवाद’ कार्यक्रमाचे आयोजन करण्यात आले होते. जिल्हा उपनिबंधक कार्यालयाच्या अधिकारी-कर्मचाऱ्यांनी सावकारी पाशातून शेतकऱ्यांची सुटका करण्यासाठी जनजागृती केली. यावेळी ‘सावकारी पाश’ हे पथनाट्य सादर करण्यात आले. कमी पाऊस आणि नापिकीमुळे शेतकरी सावकारांकडून कर्ज कसे घेतात आणि या सावकारीमुळे कुटुंब व समाजावर कसा वाईट परिणाम होतो, हे पथनाट्यातून दाखवण्यात आले. जिल्हा उपनिबंधक कार्यालयाच्या अधिकारी-कर्मचाऱ्यांनी ही माहिती प्रभावीपणे मांडली. ‘पुण्यश्लोक अहिल्यादेवी होळकर शेतकरी कर्जमुक्ती योजने’चा गावकऱ्यांनी कसा लाभ घेतला, त्यांना कोणत्या अडचणी येत आहेत, याबद्दल त्यांच्या भावना जाणून घेण्यात आल्या. तसेच, या अडचणी सोडवण्यासाठी उपलब्ध कार्यालये, यंत्रणा आणि संकेतस्थळे यांची माहितीही देण्यात आली. तत्पूर्वी, जिल्हा माहिती कार्यालयाचे माहिती अधिकारी रितेश भुयार यांनी ‘सेवासंकल्प मोहिमे’अंतर्गत राज्यभर राबवण्यात येत असलेल्या ‘लोकसंवाद’ कार्यक्रमाची माहिती गावकऱ्यांना दिली. त्यानंतर, सहायक निबंधक स्वाती गुडधे यांच्या नेतृत्वाखाली सहायक निबंधक अनिरुद्ध राऊत, छाया देशमुख आणि इतर कर्मचाऱ्यांच्या १५ जणांच्या चमूने ‘सावकारी पाश’ हे पथनाट्य सादर केले. पथनाट्याच्या सादरीकरणानंतर जनतेशी थेट संवाद साधण्यात आला. महाराष्ट्र सावकारी (नियमन) अधिनियम, २०१४ या कायद्याबद्दल माहिती देण्यात आली. हा कायदा गरिबांचे, शेतकऱ्यांचे आणि सामान्य लोकांचे बेकायदेशीर सावकारीच्या जाचातून संरक्षण करतो. रेवसा गावच्या पोलीस पाटील छाया वानखडे यांनीही मार्गदर्शन केले आणि ‘लोकसंवाद’ उपक्रमाबद्दल समाधान व्यक्त केले. शिव तांडव गणेशोत्सव मंडळाचे अध्यक्ष ज्ञानेश्वर वानखडे, मंडळाचे पदाधिकारी, महिला, पुरुष आणि तरुण-तरुणी मोठ्या संख्येने उपस्थित होते. माहिती व जनसंपर्क विभागाद्वारे १६ ते २४ सप्टेंबर या काळात संपूर्ण राज्यभर जिल्हा माहिती कार्यालयांच्या माध्यमातून ‘लोकसंवाद’ उपक्रम राबवण्यात येत आहे. कृषी विभागाच्या वतीने रेवसा येथील सहायक कृषी अधिकारी छाया देशमुख यांनी शेतकऱ्यांना विविध कृषी योजनांची माहिती दिली. यामध्ये प्रधानमंत्री कृषी सिंचन योजना, कृषी यांत्रिकीकरण उप-अभियान, मुख्यमंत्री शाश्वत कृषी सिंचन योजना, मागेल त्याला शेततळे, नमो शेतकरी महासन्मान निधी योजना, प्रधानमंत्री किसान सन्मान निधी योजना, नानाजी देशमुख कृषी संजीवनी योजना, राष्ट्रीय अन्न सुरक्षा अभियान आणि फलोत्पादन विकास या योजनांचा समावेश होता.



Source link