मुंबईतील 36 आमदारांच्या कामगिरीचा लेखाजोखा मांडणारा प्रजा फाउंडेशनचा वार्षिक आमदार प्रगती अहवाल 2026 जाहीर झाला आहे. या अहवालात मुंबईच्या प्रश्नांसाठी विधानसभेत आमदार किती सक्रिय आहेत, नागरिकांचे प्रश्न किती प्रभावीपणे मांडले जातात, सभागृहातील उपस्थि
.
या अहवालात काँग्रेसचे तीन आमदार अव्वल तीन स्थानांवर असून ठाकरे गटाच्या दोन आमदारांनीही पहिल्या पाचमध्ये स्थान मिळवले आहे. विशेष म्हणजे मुंबईत सत्ताधारी असलेल्या भाजप आणि शिवसेना (शिंदे गट) यापैकी एकाही आमदाराला पहिल्या पाचमध्ये स्थान मिळवता आलेले नाही. दुसरीकडे तळाच्या पाचमध्ये भाजप आणि शिंदे गटाच्या आमदारांचे वर्चस्व दिसून आले आहे.
मुंबादेवीचे आमदार अमीन पटेल यांनी 82 टक्के गुणांसह प्रथम क्रमांक पटकावला आहे. मालाडचे आमदार अस्लम शेख 80.58 टक्के गुणांसह दुसऱ्या, तर धारावीच्या आमदार ज्योती गायकवाड 80.30 टक्के गुणांसह तिसऱ्या क्रमांकावर आहेत. दिंडोशीचे ठाकरे गटाचे आमदार सुनील प्रभू चौथ्या, तर भायखळ्याचे आमदार मनोज जामसूतकर पाचव्या क्रमांकावर आहेत.
पहिल्या पाचमध्ये काँग्रेस-ठाकरे गटाचेच आमदार
प्रजा फाउंडेशनच्या अहवालानुसार मुंबईतील उत्कृष्ट कामगिरी करणाऱ्या पहिल्या पाच आमदारांमध्ये सत्ताधारी महायुतीतील एकाही आमदाराचा समावेश नाही.
| क्रमांक | आमदार | पक्ष | गुण |
| 1 | अमीन पटेल | काँग्रेस | 82% |
| 2 | अस्लम शेख | काँग्रेस | 80.58% |
| 3 | ज्योती गायकवाड | काँग्रेस | 80.30% |
| 4 | सुनील प्रभू | शिवसेना (ठाकरे गट) | — |
| 5 | मनोज जामसूतकर | शिवसेना (ठाकरे गट) | — |
यामुळे मुंबईतील विरोधी पक्षांच्या आमदारांनी विधानसभेतील कामगिरीत सत्ताधारी आमदारांवर आघाडी घेतल्याचे चित्र अहवालातून समोर आले आहे.
आदित्य ठाकरे 18व्या स्थानावर
ठाकरे गटाचे प्रमुख नेते आणि वरळीचे आमदार आदित्य ठाकरे यांना या अहवालात 18वे स्थान मिळाले आहे. ठाकरे गटाचे सुनील प्रभू आणि मनोज जामसूतकर पहिल्या पाचमध्ये असताना आदित्य ठाकरे यांचे स्थान मात्र त्यांच्यापेक्षा बरेच खाली आहे.
त्यामुळे मुंबईतील ठाकरे गटाच्या आमदारांच्या कामगिरीतही मोठी तफावत असल्याचे या अहवालातून दिसते.
तळाच्या पाचमध्ये शिंदे गट-भाजपचे आमदार
अहवालातील निकृष्ट कामगिरी करणाऱ्या पाच आमदारांच्या यादीत शिंदे गटाचे तीन आणि भाजपचे दोन आमदार आहेत.
मागाठाणेचे शिवसेना (शिंदे गट) आमदार प्रकाश सुर्वे 28 टक्के गुणांसह सर्वात शेवटच्या स्थानावर आहेत. त्यानंतर भांडुपचे आमदार अशोक पाटील, घाटकोपरचे भाजप आमदार राम कदम, चांदिवलीचे शिंदे गटाचे आमदार दिलीप लांडे आणि भाजपचे आमदार कालिदास कोळंबकर यांचा क्रमांक लागतो.
| क्रमांक | आमदार | पक्ष |
| 36 | प्रकाश सुर्वे | शिवसेना (शिंदे गट) |
| 35 | अशोक पाटील | शिवसेना (शिंदे गट) |
| 34 | राम कदम | भाजप |
| 33 | दिलीप लांडे | शिवसेना (शिंदे गट) |
| 32 | कालिदास कोळंबकर | भाजप |
विशेष म्हणजे सत्ताधारी भाजप आणि शिंदे गटाच्या एकाही आमदाराला पहिल्या पाचमध्ये स्थान मिळालेले नाही, तर तळाच्या पाचमध्ये त्यांच्याच आमदारांचा समावेश आहे.
आमदारांकडून प्रश्न विचारण्याचे प्रमाण तब्बल 72 टक्क्यांनी घटले
प्रजा फाउंडेशनच्या अहवालातील सर्वात महत्त्वाची बाब म्हणजे विधानसभेतील आमदारांच्या प्रश्न विचारण्याच्या प्रमाणात झालेली मोठी घट. हिवाळी अधिवेशन 2024 ते पावसाळी अधिवेशन 2025 या कालावधीत मुंबईतील आमदारांनी एकूण 2,213 प्रश्न विचारले.
याउलट 2009-10 या कालावधीत मुंबईतील आमदारांनी तब्बल 7,955 प्रश्न विचारले होते. म्हणजेच या दोन कालखंडांची तुलना करता प्रश्न विचारण्याचे प्रमाण तब्बल 72 टक्क्यांनी घटले आहे.
मुंबईसारख्या देशातील सर्वात मोठ्या महानगरांपैकी एका शहरातील पायाभूत सुविधा, वाहतूक, पाणी, प्रदूषण, आरोग्य, शिक्षण, गृहनिर्माण, झोपडपट्टी पुनर्वसन आणि रोजगार यांसारखे अनेक प्रश्न असताना आमदारांकडून विधानसभेत प्रश्न विचारण्याचे प्रमाण कमी होणे ही चिंतेची बाब असल्याचे प्रजा फाउंडेशनने नमूद केले आहे.
आमदारांच्या सरासरी गुणांमध्येही मोठी घसरण
प्रजा फाउंडेशनचे मुख्य कार्यकारी अधिकारी मिलिंद म्हस्के यांनी आमदारांच्या कामगिरीबाबत चिंता व्यक्त केली आहे. त्यांच्या मते, नागरिकांचे प्रश्न आमदारांच्या माध्यमातून विधानसभेत पोहोचतात का, हा आमदारांच्या कामगिरीचा सर्वात मूलभूत निकष आहे. बाराव्या विधानसभेच्या काळात आमदारांना मिळालेले सरासरी गुण 61 होते. चौदाव्या विधानसभेत ही सरासरी 54 वर आली. पंधराव्या विधानसभेत त्यात किंचित सुधारणा होऊन ती 55 झाली आहे. ही केवळ आकडेवारीतील चढ-उतार म्हणून पाहता येणार नाही. या गुणांमधून लोकप्रतिनिधींच्या कामगिरीचे वास्तव चित्र समोर येते, असे म्हस्के यांनी स्पष्ट केले.
कोणत्या निकषांवर ठरते आमदारांची कामगिरी?
प्रजा फाउंडेशनकडून आमदारांच्या कामगिरीचे मूल्यांकन करताना विविध बाबींचा विचार केला जातो. यामध्ये विधानसभेतील उपस्थिती, सभागृहात विचारलेले प्रश्न, नागरिकांशी संबंधित प्रश्न मांडण्याची सक्रियता, शैक्षणिक पात्रता आणि गुन्हेगारी पार्श्वभूमी यांसारख्या निकषांचा समावेश आहे. त्यामुळे केवळ किती प्रश्न विचारले यावरच हा अहवाल आधारित नसून आमदारांच्या एकूण सार्वजनिक कामगिरीचा आढावा घेण्याचा प्रयत्न करण्यात आला आहे.
सत्ताधारी आमदारांसाठी अहवाल धोक्याची घंटा?
मुंबई महापालिकेपासून विधानसभा राजकारणापर्यंत सत्ताधारी महायुतीसमोर विरोधकांकडून सातत्याने प्रश्न उपस्थित केले जात असताना प्रजा फाउंडेशनच्या अहवालाने आणखी एक मुद्दा समोर आणला आहे. मुंबईतील सत्ताधारी पक्षांच्या आमदारांची विधानसभेतील सक्रियता अपेक्षेइतकी आहे का? असा प्रश्न या अहवालामुळे निर्माण झाला आहे. एकीकडे काँग्रेस आणि ठाकरे गटाच्या आमदारांनी पहिल्या पाचमध्ये स्थान मिळवले आहे, तर दुसरीकडे भाजप आणि शिंदे गटाच्या आमदारांचे पाचही स्थान तळाच्या यादीत आहेत. त्यामुळे आगामी काळात मुंबईतील आमदार आपल्या मतदारसंघातील प्रश्न विधानसभेत किती प्रभावीपणे मांडतात, याकडे अधिक लक्ष राहणार आहे. एकूणच, मुंबईतील आमदारांच्या कामगिरीचे हे प्रगतीपुस्तक सत्ताधारी आणि विरोधक या दोन्ही बाजूंना आत्मपरीक्षण करण्याची संधी देणारे ठरले आहे. विशेषतः गेल्या दशकाच्या तुलनेत आमदारांकडून विचारल्या जाणाऱ्या प्रश्नांमध्ये झालेली 72 टक्क्यांची घट हा अहवालातील सर्वाधिक लक्षवेधी मुद्दा ठरला आहे.
हेही वाचा…
गणपतीत आता गरबा खेळायचा बाकी राहिलाय!:लालबागचा राजा मंडळावर संदीप देशपांडेंचा हल्लाबोल; म्हणाले- मराठी सण गुजरात्यांच्या हातात देणार का?
मुंबईतील गणेशोत्सवाला सध्या येत असलेल्या कॉर्पोरेट स्वरूपावरून महाराष्ट्र नवनिर्माण सेनेचे (मनसे) नेते संदीप देशपांडे यांनी तीव्र संताप व्यक्त केला आहे. “गणेशोत्सव हा मराठी मातीतील आणि मराठी माणसाचा सण आहे. मात्र, लालबागचा राजा आणि चिंतामणी यांसारखी मंडळे उद्योगपतींना सल्लागार म्हणून नेमून गणेशोत्सवाला कॉर्पोरेट वॉरचे ठिकाण बनवत आहेत. उद्या गणेशोत्सवात आपण फक्त गरबा बघायचा का?” असा बोचरा सवाल त्यांनी उपस्थित केला. बुधवारी मुंबईत आयोजित पत्रकार परिषदेत संदीप देशपांडे यांनी गणेशोत्सवातील वाढते कॉर्पोरेट वर्चस्व, एमपीएससी पेपरफुटी आणि कंत्राटदारांचे रखडलेले पेमेंट यांसारख्या विविध ज्वलंत मुद्द्यांवर सरकार आणि संबंधित प्रशासनाला धारेवर धरले. येथे वाचा संपूर्ण बातमी
