शिवसेना (उद्धव बाळासाहेब ठाकरे) पक्षातील सहा खासदारांनी बंडखोरी करत उपमुख्यमंत्री एकनाथ शिंदे यांच्या नेतृत्वाखालील शिवसेनेत जाण्याचा निर्णय घेतल्याने राज्याच्या राजकारणात मोठी खळबळ उडाली आहे. या घडामोडींच्या पार्श्वभूमीवर पक्षप्रमुख उद्धव ठाकरे यांन
.
शिवालयात ठाकरेंची आमदारांसोबत महत्त्वाची बैठक
विधिमंडळाच्या पावसाळी अधिवेशनाच्या पहिल्याच दिवशी उद्धव ठाकरे यांनी विधानसभा आणि विधान परिषदेतील आमदारांची बैठक घेतली. अधिवेशनादरम्यान पक्षाची भूमिका, जनतेचे प्रश्न, सरकारविरोधातील मुद्दे आणि पुढील राजकीय रणनीती यावर या बैठकीत चर्चा झाल्याची माहिती मिळत आहे. या बैठकीला सुनील प्रभू, भास्कर जाधव, अनिल परब, सचिन अहीर यांच्यासह बहुतेक आमदार उपस्थित होते. विशेष म्हणजे, अलीकडेच भास्कर जाधव आणि मिलिंद नार्वेकर यांच्यात निर्माण झालेल्या वादानंतर दोघेही एकाच बैठकीत सहभागी झाल्याने पक्षांतर्गत मतभेदांवर पडदा टाकण्याचा प्रयत्न झाल्याचे मानले जात आहे.
बैठकीला कोणते आमदार गैरहजर?
सुरुवातीला तीन आमदार अनुपस्थित असल्याची चर्चा होती. मात्र नंतर समोर आलेल्या माहितीनुसार चार आमदार बैठकीला उपस्थित राहिले नाहीत. अनुपस्थित आमदारांमध्ये संजय देरकर, राहुल पाटील, संजय पोतनीस, सुनील शिंदे यांचा समावेश आहे. यामुळे राजकीय चर्चांना उधाण आले असले तरी पक्षातील सूत्रांनी या गैरहजेरीमागे बंडखोरी नसल्याचा दावा केला आहे.
पक्षाकडून गैरहजेरीचे स्पष्टीकरण
पक्षातील सूत्रांच्या माहितीनुसार, संजय देरकर आणि सुनील शिंदे हे त्यांच्या मतदारसंघातील पूर्वनियोजित कार्यक्रमांमुळे गावाकडे होते. परभणी विधान परिषद निवडणुकीच्या निकाल आणि त्यासंदर्भातील प्रक्रियेत व्यस्त असल्याने राहुल पाटील उपस्थित राहू शकले नाहीत. तर संजय पोतनीस यांच्याशी संपर्क होऊ शकला नसल्याची माहिती देण्यात आली. ठाकरे गटाच्या 17 विधानसभा आमदारांपैकी बहुसंख्य आमदार आणि विधान परिषदेतील पाचही आमदार बैठकीला उपस्थित असल्याचा दावा पक्षाने केला आहे.
सहा खासदारांच्या बंडानंतर ‘डॅमेज कंट्रोल’ मोडमध्ये ठाकरे
दरम्यान, शिवालयातील ही बैठक सुरू असतानाच अवघ्या काहीशे मीटर अंतरावर असलेल्या यशवंतराव चव्हाण प्रतिष्ठानमध्ये ठाकरे गटातील सहा खासदार शिंदे गटात प्रवेश करण्याची तयारी सुरू होती. त्यामुळे उद्धव ठाकरे यांच्यासमोर पक्ष संघटना मजबूत ठेवण्याचे मोठे आव्हान उभे राहिले आहे. राजकीय सूत्रांच्या माहितीनुसार, या बैठकीत खासदारांच्या बंडानंतर निर्माण झालेल्या परिस्थितीवर सविस्तर चर्चा झाली. पक्षाची संघटना मजबूत ठेवणे, कार्यकर्त्यांचे मनोबल वाढवणे आणि संबंधित मतदारसंघांमध्ये पक्षाची पकड कायम ठेवण्यासाठी कोणती पावले उचलायची याबाबतही मार्गदर्शन करण्यात आले.
आमदारांना दिल्या महत्त्वाच्या सूचना
दरवेळी अधिवेशन सुरू होताना उद्धव ठाकरे आमदारांची बैठक घेतात. विधानसभेत कोणते मुद्दे मांडायचे, सरकारला कोणत्या प्रश्नांवर घेरायचे आणि मतदारसंघातील समस्या कशा मांडायच्या याबाबत मार्गदर्शन केले जाते. मात्र यावेळी परिस्थिती वेगळी होती. कारण खासदारांनी पक्ष सोडताना “निधी मिळत नाही” हे प्रमुख कारण पुढे केले आहे. त्यामुळे आमदारांच्या अडचणी, निधीचा प्रश्न आणि सरकारकडून होणारा कथित भेदभाव यावरही बैठकीत चर्चा झाल्याचे सांगितले जात आहे.
‘ऑपरेशन टायगर’ला उत्तर देण्यासाठी रणनीती
गेल्या काही दिवसांपासून राज्याच्या राजकारणात ‘ऑपरेशन टायगर’ची चर्चा सुरू आहे. ठाकरे गटातील अनेक खासदार आणि नेते शिंदे गटाच्या संपर्कात असल्याच्या चर्चा रंगल्या होत्या. अखेर सहा खासदारांनी पक्षाला धक्का दिल्यानंतर आता उद्धव ठाकरे स्वतः मैदानात उतरण्याच्या तयारीत असल्याची माहिती आहे. बैठकीत संबंधित मतदारसंघांचा दौरा, कार्यकर्त्यांशी संवाद आणि पक्षबांधणीसाठी विशेष मोहिम राबवण्याबाबत चर्चा झाल्याचे समजते.
सहा खासदारांच्या पत्रकार परिषदेकडेही लक्ष
शिवालयातील बैठकीसोबतच सर्वांचे लक्ष शिंदे गटात प्रवेश करणाऱ्या सहा खासदारांच्या पत्रकार परिषदेकडे लागले होते. यापूर्वी मातोश्रीवर झालेल्या बैठकीत काही खासदार ऑनलाइन सहभागी झाले होते. मात्र त्यानंतर त्यांनी बंडाचा मार्ग स्वीकारला. त्यामुळे आता हे खासदार पक्ष सोडण्यामागील नेमकी कारणे काय सांगतात, याकडे राजकीय निरीक्षकांचे लक्ष लागले आहे. सहा खासदारांच्या निर्गमनानंतर उद्धव ठाकरे यांच्यासमोर पक्ष संघटना एकसंध ठेवण्याचे मोठे आव्हान निर्माण झाले आहे. बैठकीला चार आमदार गैरहजर राहिल्याने चर्चांना उधाण आले असले तरी पक्षाकडून त्यामागे कोणतेही राजकीय कारण नसल्याचा दावा करण्यात येत आहे. तथापि, खासदारांच्या बंडानंतर प्रत्येक आमदाराच्या भूमिकेकडे आता राज्याच्या राजकारणाचे लक्ष लागले असून, पुढील काही दिवस ठाकरे गटासाठी अत्यंत महत्त्वाचे ठरणार आहेत. येथे वाचा संपूर्ण बातमी
