पुणे शहरातील फरासखाना पोलिस ठाण्यातील दोन पोलिस शिपायांविरुद्ध खंडणीचा गुन्हा दाखल करण्यात आला आहे. बुधवार पेठेत तीन तरुणांना गुन्हा दाखल करण्याची धमकी देऊन त्यांच्याकडून दोन हजार रुपये उकळल्याचा आरोप त्यांच्यावर आहे. या प्रकरणी पोलिस शिपाई विवेक पाटील आणि राहुल दाभाडे यांच्याविरुद्ध गुन्हा नोंदवण्यात आला आहे. याबाबत एका २४ वर्षीय तरुणाने फरासखाना पोलिस ठाण्यात फिर्याद दिली आहे. पोलिसांनी दिलेल्या माहितीनुसार, फिर्यादी तरुण हडपसर येथे राहतो आणि एका हॉटेलमध्ये कामाला आहे. २९ जुलै रोजी तो आपल्या दोन मित्रांसह शनिवारवाडा पाहण्यासाठी आला होता. त्यानंतर ते लक्ष्मी रस्त्याकडे फिरत गेले. रात्री साडेअकराच्या सुमारास ते बुधवार पेठ परिसरातून जात असताना, तेथे नाकाबंदी लावण्यात आली होती. त्यावेळी दुचाकीवरून आलेले पोलिस शिपाई विवेक पाटील आणि राहुल दाभाडे यांनी या तरुणांना अडवले. त्यांनी ओळखपत्राची मागणी केली, जी तरुणांनी मोबाईलमधील आधारकार्ड दाखवून पूर्ण केली. त्यानंतर दोन्ही पोलिसांनी तरुणांना धमकावले. ‘तुमच्याविरुद्ध गुन्हा दाखल होईल आणि तुम्हाला न्यायालयात जावे लागेल,’ असे सांगून त्यांना घाबरवले. कारवाई टाळण्यासाठी पाटील आणि दाभाडे यांनी तिघांकडून प्रत्येकी पाच हजार रुपये, असे एकूण १५ हजार रुपयांची मागणी केली. तरुणाने आपल्याकडे एवढे पैसे नसल्याचे सांगितले आणि मित्राकडून दोन हजार रुपये ऑनलाइन मागवून घेतो, असे म्हटले. त्यानंतर पोलिसांनी त्याला दुचाकीवरून बुधवार पेठेत नेले आणि एका ओळखीच्या महिलेच्या मोबाईलवर ऑनलाइन पद्धतीने दोन हजार रुपये पाठवण्यास सांगितले. तरुणाने हॉटेल मालकाशी संपर्क साधून तातडीने पैसे पाठवण्याची विनंती केली. महिलेच्या खात्यात पैसे जमा झाल्यानंतर, हा प्रकार कोणालाही न सांगण्याची धमकी पोलिस शिपाई पाटील आणि दाभाडे यांनी दिली. या घटनेनंतर तरुण आणि त्याचे मित्र घरी परतत असताना, त्यांनी कॅबचालकाला घडलेला प्रकार सांगितला. कॅबचालकाने या घटनेची चित्रफीत समाज माध्यमांवर प्रसारित केली. ही माहिती वरिष्ठ अधिकाऱ्यांपर्यंत पोहोचल्यानंतर त्यांनी चौकशीचे आदेश दिले. चौकशीत दोन्ही पोलिस शिपायांनी बुधवार पेठेत तरुणांना धमकावून पैसे घेतल्याचे उघडकीस आले. त्यानंतर त्यांच्याविरुद्ध खंडणीचा गुन्हा दाखल करण्यात आला.
Source link
दोन पोलिस शिपायांविरुद्ध खंडणीचा गुन्हा:बुधवार पेठेत तरुणांना धमकावून पैसे उकळल्याचा आरोप
