एखाद्या शहराची ओळख केवळ रस्ते किंवा इमारतींवरून होत नाही, तर तेथील प्रशासन मानवी मूल्यांशी किती संवेदनशीलतेने वागते यावरून ठरते. मात्र, अमळनेर शहरात मानवता काळवंडणारा एक अत्यंत संतापजनक प्रकार समोर आला आहे. शहरात आढळलेल्या एका बेवारस मृतदेहाची शवविच्छेदनानंतर दफनविधीसाठी चक्क कचरा वाहणाऱ्या “घंटागाडी’तून वाहतूक करण्यात आल्याचा धक्कादायक प्रकार ग्रामीण रुग्णालयात घडला. नियमानुसार, शहरातील बेवारस मृतदेहांची सन्मानाने विल्हेवाट लावण्यासाठी किंवा दफनविधीसाठी स्वतंत्र आणि योग्य वाहनाची व्यवस्था करणे कचरा संकलन ठेकेदाराला बंधनकारक आहे. असे असतानाही, संबंधित ठेकेदाराने सर्व नियम आणि मानवी संवेदनशीलता धाब्यावर बसवून मृतदेह थेट घंटागाडीत टाकून नेला. दरम्यान, ठेकेदाराविरुद्ध नियमानुसार कायदेशीर कारवाई करण्याचे आश्वासन नगराध्यक्ष डॉ. परीक्षित बाविस्कर यांनी दिली. कठोर कारवाई करू कचरा संकलन करणाऱ्या ठेकेदाराला बेवारस प्रेताची विल्हेवाट लावण्यासाठी स्वतंत्र वाहनाची सोय करणे बंधनकारक आहे. तरीदेखील संबंधित ठेकेदाराने अक्षम्य चूक केली आहे. या प्रकरणी त्याला नोटीस बजावून कायदेशीर कारवाई करण्यात येईल. तसेच याबाबत चौकशी होईल. -गणेश शिंदे, मुख्याधिकारी, अमळनेर नगर परिषद ठेकेदाराची चौकशी करून कारवाई करण्याचे आदेश एकीकडे शहराच्या विकासाच्या मोठ्या घोषणा केल्या जात असताना, दुसरीकडे मृतदेहाच्या अंतिम प्रवासाची ही दुरवस्था प्रशासनाच्या कारभाराचे वाभाडे काढणारी आहे. या अत्यंत संवेदनशील आणि गंभीर प्रकरणाची उच्चस्तरीय चौकशी करून दोषी ठेकेदार व संबंधित अधिकाऱ्यांवर कारवाईची मागणी होत आहे.
Source link
संतापजनक:दफनविधीसाठी बेवारस मृतदेह नेला घंटागाडीतून!, अमळनेर ग्रामीण रुग्णालयातील असंवेदनशील कारभारावर व्यक्त होतोय संताप
