प्रतिनिधी | कोपरगाव शेतमालाला योग्य दर आणि बाजारभाव मिळाला पाहिजे, हीच आमची मुख्य भूमिका आहे. विधान परिषदेच्या माध्यमातून वरिष्ठ सभागृहात शेतकरी हितासाठी सरकारकडे आग्रही राहणारा आणि युवकांचा हक्काचा प्रतिनिधी म्हणून मी काम करणार आहे. तुमच्या न्याय आणि हक्कासाठी आवाज उठवणारा तुमच्या घरातील व्यक्तीच आता विधान परिषदेमध्ये गेला आहे, असे प्रतिपादन आमदार विवेक कोल्हे यांनी केले. सिन्नर तालुक्यातील पाथरे येथे आमदार कोल्हे यांच्या भव्य नागरी सत्काराचा सोहळा मोठ्या उत्साहात संपन्न झाला, त्याप्रसंगी सत्कारमूर्ती म्हणून ते बोलत होते. अध्यक्षस्थानी खासदार राजाभाऊ वाजे हे होते. पाथरे ग्रामस्थांच्या वतीने आमदार कोल्हे यांची वाजतगाजत मिरवणूक काढून त्यांचा नागरी सत्कार करण्यात आला. आमदार कोल्हे म्हणाले, या आमदारकीचा सातबारा जरी माझ्या नावावर असला, तरी या सातबाराच्या पोटहिश्शात माझ्या प्रत्येक कष्टकरी कार्यकर्त्याचा समान हिस्सा आहे. कोल्हे कुटुंबीय आणि पाथरे पंचक्रोशीच्या जुन्या आठवणींना उजाळा देत ते म्हणाले, “संजीवनी सहकारी साखर कारखान्याच्या उभारणीच्या काळापासून या भागातील अनेक सभासद, कर्मचारी आणि शेतकरी केवळ ‘तीन रुपये हजेरी’ प्रमाणे कामाला येत होते. त्या काळापासून सुरू झालेला हा जिव्हाळा आज आमच्या तिसऱ्या पिढीपर्यंत पोहोचला आहे. अनेक ज्येष्ठ सहकाऱ्यांनी स्वर्गीय शंकरराव कोल्हे साहेबांसोबत खांद्याला खांदा लावून कार्य केले आहे. पूर्वी हा भाग दुष्काळी म्हणून ओळखला जात होता, मात्र कोल्हे साहेबांच्या दूरदृष्टीमुळे या भागाचे चित्र बदलले. हा जिव्हाळा मी पुढेही असाच जपून ठेवेन. या सोहळ्याला भाजपचे नेते भारत कोकाटे, माजी जिल्हा परिषद सदस्य राजेंद्र चव्हाणके, माजी पंचायत समिती सभापती बाळासाहेब वाघ, माजी कृषी उत्पन्न बाजार समितीचे सभापती विठ्ठलराजे भोसले, राजेश गडाख, प्रणव पवार, अंबादास कदम उपस्थित होते. प्रास्ताविक जालिंदर थोरात यांनी, सूत्रसंचालन मनोज गवळी यांनी, तर आभार कृष्णा घुमरे यांनी मानले. विधान परिषदेचे आमदार विवेक कोल्हे यांचा पाथरे येथे ग्रामस्थांच्या वतीने सत्कार करण्यात आला.
Source link
वरिष्ठ सभागृहात शेतकऱ्यांच्या न्यायासाठी आवाज उठवणार:आमदार विवेक कोल्हे; भव्य नागरी सत्काराचा सोहळा मोठ्या उत्साहात संपन्न
