खरीप हंगाम अवघ्या काही दिवसांवर येऊन ठेपला असताना, शेतकऱ्यांची फसवणूक करणाऱ्या बोगस बियाणे विक्रेत्यांवर कृषी विभाग आणि पोलिसांनी मोठी संयुक्त कारवाई केली आहे. आर्वी तालुक्यातील शिरपूर (बोके) येथे एका गोदामावर छापा टाकून तब्बल २९ लाख ४६ हजार ८४६ रुपये किमतीचा एचटीबीटी (HTBT) बोगस बियाण्यांचा साठा जप्त करण्यात आला आहे. या प्रकरणी एका ५२ वर्षीय आरोपीला बेड्या ठोकण्यात आल्या असून, ऐन खरीप हंगामापूर्वी झालेल्या या कारवाईमुळे बोगस बियाणे विक्रेत्यांमध्ये मोठी खळबळ उडाली आहे. खरीप हंगामाच्या पार्श्वभूमीवर जिल्ह्यात अनधिकृत आणि बोगस बियाण्यांची विक्री होत असल्याच्या तक्रारी कृषी विभागाला सातत्याने प्राप्त होत होत्या. महागडे बियाणे खरेदी करूनही अपेक्षित उत्पादन मिळत नसल्याने शेतकऱ्यांना मोठा आर्थिक फटका बसत होता. या वाढत्या तक्रारींची गंभीर दखल घेत कृषी विभागाने संशयित गोदामांवर विशेष पाळत ठेवली होती. त्यानंतर, कृषी अधिकारी संजय बनसोडे यांनी दिलेल्या अधिकृत तक्रारीवरून आर्वी पोलिसांनी गुन्हा दाखल करत तपासाची चक्रे वेगाने फिरवली. पोलिसांनी तातडीने सूत्रे हलवत शिरपूर (बोके) येथील संजय मारोतराव गोपाळे (वय ५२) याच्या मालकीच्या गोदामावर धाड टाकली. या छाप्यात गोदामात मोठ्या प्रमाणावर साठवून ठेवलेला बोगस एचटीबीटी बियाण्यांचा साठा आढळून आला. पोलिसांनी घटनास्थळावरून सुमारे २९ लाख ४६ हजार ८४६ रुपयांचा मुद्देमाल जप्त केला असून आरोपी संजय गोपाळे याला अटक केली आहे. प्राथमिक तपासात अशी धक्कादायक माहिती समोर आली आहे की, हे बोगस बियाणे थेट गुजरातमधून आणले जात होते आणि येथे त्याचे बनावट पॅकिंग करून ते विक्रीसाठी बाजारात आणले जात होते. बोगस बियाण्यांच्या या आंतरराज्यीय रॅकेटची पाळेमुळे कुठपर्यंत रुजलेली आहेत आणि यात आणखी कोणाचा सहभाग आहे का, याचा सखोल तपास आता पोलिसांकडून केला जात आहे. ही धडक कारवाई कृषी विभागाचे अधिकारी संजय बनसोडे आणि उपविभागीय पोलीस अधिकारी चंद्रकांत ढोले यांच्या मार्गदर्शनाखाली, पोलीस निरीक्षक सतीश डेहनकर यांच्या नेतृत्वात पोलीस उपनिरीक्षक संतोष चव्हाण व त्यांच्या पथकाने यशस्वीरीत्या पार पाडली.
Source link
पेरणी हंगाम पूर्वीच आर्वीत बनावट बोगस बियाणे रॅकेटवर धाड:आर्वीत २९ लाखांचे बोगस बियाणे जप्त
