शेवगाव राज्य शासनाच्या मुख्यमंत्री समृद्ध पंचायत राज अभियान अंतर्गत पार पडलेल्या मूल्यमापन प्रक्रियेत शेवगाव तालुक्यातील दहिगाव शे. ग्रामपंचायतीने उल्लेखनीय कामगिरी करत तालुका स्तरावर प्रथम क्रमांक पटकावला आहे. ग्रामपंचायतीने राबवलेली विविध विकासकामे, स्वच्छता मोहीम, लोकसहभाग, पारदर्शक प्रशासन आणि शासकीय योजनांची प्रभावी अंमलबजावणी यामुळे हा बहुमान मिळाला आहे. तालुका स्तरावरील या यशानंतर आता या गावाची निवड जिल्हास्तरीय स्पर्धेसाठी करण्यात आली आहे. शेवगाव पंचायत समितीच्या गटविकास अधिकारी सोनल शहा यांच्या कुशल मार्गदर्शनाखाली दहिगाव शे. मध्ये लोकसहभागातून अनेक नाविन्यपूर्ण योजना यशस्वीपणे राबविण्यात आल्या. याच बळावर या गावाने जिल्हा स्तरापर्यंत मजल मारली आहे. याच पार्श्वभूमीवर, जिल्हास्तरीय मूल्यमापन समितीने नुकतीच दहिगाव शे. ग्रामपंचायतीला भेट देऊन प्रत्यक्ष पाहणी केली. या वेळी समितीच्या सदस्यांनी गावातील विकासकामे, उपलब्ध सोयी-सुविधा आणि योजनांच्या दप्तराची सविस्तर पडताळणी केली. ग्रामपंचायत पदाधिकारी, अधिकारी व ग्रामस्थांनी समितीला गावाच्या प्रगतीचा आलेख सादर केला. तालुक्यात प्रथम क्रमांक मिळाल्याने गावकऱ्यांमध्ये आनंदाचे वातावरण आहे. प्रशासकीय अधिकारी आणि ग्रामस्थांच्या एकजुटीमुळे हे शक्य झाले. जिल्हा स्तरावरही दहिगाव शे. उत्कृष्ट कामगिरी करून गावाचा गौरव वाढवेल, असे सरपंच रामेश्वर भापकर यांनी सांगितले. दहिगाव शे गावाची पाहणी करण्यासाठी आलेली मुख्यमंत्री समृद्ध पंचायत राज अभियान जिल्हा कमिटी .
Source link
आता जिल्हास्तरीय बहुमानासाठी सज्ज:"मुख्यमंत्री समृद्ध पंचायत राज अभियानात' दहिगाव-शे ग्रामपंचायत तालुक्यात प्रथम
