सेनगाव पोलिस ठाण्याच्या ह्द्दीमध्ये गणेशपूर ते हत्ता रोडवर वाहनांची तपासणी करणाऱ्या जमादारावर हल्ला करून जखमी करणाऱ्या चौघांवर सेनगाव पोलिस ठाण्यात रविवारी ता. 12 रात्री उशीरा गुन्हा दाखल झाला आहे. पोलिसांनी तातडीने पथके स्थापन करून दोघांना अटक केली असून अन्य दोघांचा शोध सुरु करण्यात आला आहे. पोलिसांनी दिलेल्या माहितीनुसार, जिल्हाभरात अवैध गौणखणीज वाहतूक तसेच अवैध वाहतूक करणाऱ्या वाहनांवर कारवाई करण्याचे आदेश वरिष्ठ पातळीवरून देण्यात आले आहेत. त्यानुसार जिल्हाभरात वाहनांची तपासणी मोहिम हाती घेतली जात असून यामध्ये वाहनांवर कारवाई केली जात आहे. दरम्यान, सेनगाव पोलिस ठाण्याचे जमादार जीवन मस्के हे त्यांच्या पथकासह रविवारी ता. 12 सायंकाळी पाच वाजण्याच्या सुमारास गणेशपूर ते हत्ता मार्गावर वाहनांची तपासणी करीत होते. यावेळी पोलिसांनी एक पिकअप वाहन थांबवून चौकशी करण्यास सुरवात केली. यावेळी गजानन चव्हाण, सुदाम चव्हाण, राजेश चव्हाण, वामन चव्हाण (सर्व रा. गणेश नगर तांडा ता. जिंतूर जि. परभणी) यांनी पोलिसांच्या प्रश्नाला उत्तरे देण्या ऐवजी जमादार मस्के यांना शिवीगाळ करण्यास सुरवात केली. यावेळी चौघांनी मिळून जमादार मस्के यांना मारहाण केली तसेच दगडाने मारून जखमी केले. यासोबतच जीवे मारण्याची धमकी दिली. या मारहाणीत मस्के जखमी झाले. या प्रकरणी मस्के यांच्या तक्रारीवरून वरील चौघांवर सेनगाव पोलिस ठाण्यात शासकिय कामात अडथळा आणल्याच्या आरोपावरून गुन्हा दाखल केला आहे. या प्रकरणात सहाय्यक पोलिस निरीक्षक संग्राम जाधव, उपनिरीक्षक रविकिरण खंदारे, जमादार सुभाष चव्हाण, जी. एस. पाचपुते यांनी तातडीने आरोपींचा शोध घेतला. यामध्ये सुदाम व राजेश यांना अटक केली असून उर्वरीत दोघांच्या शोधासाठी पोलिसांनी दोन पथके रवाना केली आहेत.
Source link
सेनगावमध्ये वाहन तपासणी करणाऱ्या पोलिसांवर हल्ला:जमादाराला दगडाने मारून जखमी करणाऱ्या चौघांवर गुन्हा दाखल, दोघांना अटक
