नेपाळच्या महापुरात महाराष्ट्रातील पर्यटकांची चिंता वाढली:80 जण गेले, फक्त चौघांशीच संपर्क, गिरीश महाजनांचे आवाहन– ‘नातेवाईकांची माहिती तातडीने द्या’

नेपाळ-तिबेट सीमेवर आलेल्या भीषण महापुरामुळे मोठी जीवितहानी झाली असून, कैलास मानसरोवर यात्रेसाठी गेलेल्या भारतीय पर्यटकांच्या सुरक्षिततेचा प्रश्न गंभीर बनला आहे. या पार्श्वभूमीवर महाराष्ट्र सरकारनेही आपली यंत्रणा सतर्क केली आहे. महाराष्ट्रातून नेपाळला गेलेल्या सुमारे 80 पर्यटकांची माहिती राज्य सरकारकडे आली असून, त्यापैकी आतापर्यंत केवळ चार जणांशी संपर्क होऊ शकला आहे, अशी माहिती राज्याचे मंत्री गिरीश महाजन यांनी दिली. महत्त्वाचे म्हणजे, महाराष्ट्रातील नेपाळमध्ये अडकलेल्या नागरिकांची संख्या याबाबत सुरुवातीला वेगवेगळे आकडे समोर येत आहेत. राज्य आपत्ती व्यवस्थापन यंत्रणेने सध्या 80 पर्यटकांचा मागोवा घेण्याचे काम सुरू केले आहे. त्यापैकी चार जण सुरक्षित असल्याची खात्री झाली असून, उर्वरित पर्यटकांशी संपर्क साधण्याचे प्रयत्न सुरू आहेत. त्यामुळे नागरिकांनी आपल्या नातेवाईकांची किंवा परिचितांची माहिती प्रशासनाला देण्याचे आवाहन गिरीश महाजन यांनी केले आहे. 80 पैकी फक्त चौघांशी संपर्क झाला नेपाळमधील परिस्थितीबाबत पत्रकारांशी संवाद साधताना गिरीश महाजन यांनी सांगितले की, रिचा टूर्स अँड ट्रॅव्हल्सच्या दोन वाहनांमधून महाराष्ट्रातील पर्यटकांसह सुमारे 80 जण मानसरोवरच्या दिशेने गेले होते. यापैकी आतापर्यंत चार जणांशी संपर्क झाला आहे. हे चार जण सुरक्षित असल्याची माहिती मिळाली आहे. मात्र, या गटातील इतर नागरिकांची नेमकी स्थिती अद्याप स्पष्ट झालेली नाही. या वाहनांमध्ये महाराष्ट्राबरोबरच आंध्र प्रदेश आणि दक्षिण भारतातील अन्य राज्यांतील नागरिकही असल्याचे महाजन यांनी सांगितले. त्यामुळे या 80 जणांपैकी नेमके किती जण महाराष्ट्रातील आहेत, याचीही पडताळणी सुरू आहे. महाजन यांनी स्वतःच्या परिचयातील एका कुटुंबाचे उदाहरण देताना सांगितले की, त्यांच्या शेजारी राहणारे एक कुटुंब काही दिवसांपूर्वी नेपाळला गेले होते. त्यांच्याशी सुरुवातीला संपर्क झाला होता. मात्र त्यानंतर पुन्हा संपर्क साधण्याचा प्रयत्न केला असता संपर्क होऊ शकला नाही. हे लोक यात्रेच्या मार्गावर प्रदक्षिणा करत असल्याची माहिती मिळाली होती. तुमच्या ओळखीचे कोणी नेपाळला गेले असेल तर माहिती द्या नेपाळमधील संपर्क व्यवस्था विस्कळीत झाल्यामुळे अनेक पर्यटकांशी थेट संपर्क होणे कठीण झाले आहे. त्यामुळे नागरिकांनी प्रशासनाला मदत करण्याचे आवाहन महाजन यांनी केले. “तुमचे नातेवाईक, शेजारी किंवा ओळखीचे कोणी नेपाळला गेले असतील तर त्यांची माहिती आम्हाला द्या. जिल्हाधिकाऱ्यांना कळवा. उपलब्ध माहितीच्या आधारे संबंधित व्यक्तींचा शोध घेण्याचे प्रयत्न केले जातील,” असे महाजन यांनी सांगितले. राज्य सरकारकडून जिल्हाधिकाऱ्यांनाही त्यांच्या जिल्ह्यातून नेपाळला गेलेल्या नागरिकांची माहिती गोळा करण्याच्या सूचना देण्यात आल्या आहेत. यासाठी ऑनलाइन माहिती नोंदवण्याची सुविधाही उपलब्ध करून देण्यात आली असून, राज्याची आपत्ती व्यवस्थापन यंत्रणा परिस्थितीवर लक्ष ठेवून आहे. महाराष्ट्र सरकार २४ तास ‘अलर्ट मोड’वर नेपाळमधील आपत्तीची तीव्रता लक्षात घेऊन महाराष्ट्र सरकारने २४ तास नियंत्रण कक्ष कार्यरत ठेवला आहे. केंद्र सरकार, दिल्लीतील यंत्रणा आणि नेपाळमधील संबंधित अधिकाऱ्यांशी संपर्क साधून महाराष्ट्रातील नागरिकांची माहिती मिळवण्याचे प्रयत्न सुरू आहेत. गिरीश महाजन यांनी सांगितले की, राज्य सरकारकडून सातत्याने माहिती घेतली जात आहे. नेपाळ सरकारच्या संपर्कात राहून अडकलेल्या भारतीय नागरिकांच्या बचावासाठी सुरू असलेल्या प्रयत्नांची माहितीही घेतली जात आहे. दरम्यान, महाराष्ट्रातील चार पर्यटकांशी संपर्क झाल्याचे राज्य आपत्ती व्यवस्थापन विभागानेही स्पष्ट केले आहे. उपलब्ध माहितीनुसार यामध्ये मुंबईतील दोन आणि पुण्यातील दोन पर्यटकांचा समावेश आहे. हे चारही जण सुरक्षित असून, ते सध्या बाधित भागातून बाहेर पडण्याच्या प्रतीक्षेत असल्याचे वृत्त आहे. नेपाळमध्ये नेमकं काय घडलं? नेपाळच्या रासुवा जिल्ह्यासह तिबेटच्या सीमावर्ती भागात बुधवारी अचानक आलेल्या भीषण पुरामुळे मोठी हानी झाली. तिबेटच्या बाजूने आलेल्या प्रचंड पाण्याच्या लोंढ्याने भोटे कोशी आणि त्रिशुली नदी परिसरात अक्षरशः हाहाकार माजवला. अनेक पूल, रस्ते, घरे आणि इतर पायाभूत सुविधा वाहून गेल्या. प्राथमिक माहितीनुसार, हिमालयीन भागातील बर्फ, दगड आणि मातीच्या मोठ्या प्रमाणातील घसरणीमुळे अचानक पाण्याचा प्रचंड लोंढा निर्माण झाला. सुरुवातीला या घटनेमागे भूकंप असल्याचा अंदाज व्यक्त झाला होता; मात्र नंतर ग्लेशियरशी संबंधित घसरण हे संभाव्य कारण असल्याचे अहवाल समोर आले. या आपत्तीत मृतांचा आकडा १६०च्या आसपास पोहोचला असून शेकडो लोक अद्याप बेपत्ता आहेत. बचावकार्य युद्धपातळीवर सुरू आहे. कैलास मानसरोवर यात्रेकरूंना मोठा फटका नेपाळमधील आपत्तीचा सर्वाधिक फटका कैलास मानसरोवर यात्रेच्या मार्गावर असलेल्या पर्यटक आणि यात्रेकरूंना बसला आहे. तिबेटच्या दिशेने जाणाऱ्या मार्गावरील संपर्क तुटल्याने अनेक यात्रेकरूंची माहिती मिळणे कठीण झाले आहे. उपलब्ध माहितीनुसार, १३३ भारतीय नागरिक बेपत्ता असल्याची माहिती समोर आली आहे. यातील मोठा भाग कैलास मानसरोवर यात्रेसाठी गेलेल्या भाविकांचा आहे. कैलास यात्रेसाठी विविध ट्रॅव्हल एजन्सींच्या माध्यमातून गेलेल्या शेकडो यात्रेकरूंचा संपर्क तुटल्याची माहितीही समोर आली आहे. काही यात्रेकरू सुरक्षितपणे परतले असून काही जण तिबेटमध्ये आहेत, तर काहींच्या ठिकाणाबाबत अद्याप अधिकृत माहिती उपलब्ध झालेली नाही. संपर्क व्यवस्था सुरळीत होईपर्यंत अडचणी राहणार या नैसर्गिक आपत्तीमुळे रस्ते आणि पूल उद्ध्वस्त झाल्याने प्रभावित भागांशी संपर्क साधणे हे प्रशासनासमोरचे मोठे आव्हान बनले आहे. त्यामुळे एखाद्या पर्यटकाचा फोन लागत नाही म्हणजे तो बेपत्ता आहे, असा थेट निष्कर्ष काढता येत नसल्याचेही प्रशासनाच्या प्रयत्नांवरून स्पष्ट होते. महाराष्ट्र सरकारकडून सध्या उपलब्ध असलेल्या प्रत्येक माहितीची पडताळणी केली जात आहे. त्यामुळे नागरिकांनी अफवा किंवा अपूर्ण माहितीवर विश्वास न ठेवता अधिकृत यंत्रणेशी संपर्क साधण्याचे आवाहन करण्यात आले आहे. केंद्र आणि नेपाळ सरकारकडून बचावकार्य नेपाळमध्ये अडकलेल्या भारतीयांच्या सुटकेसाठी भारतीय यंत्रणाही नेपाळ सरकारच्या संपर्कात आहे. भारतीय दूतावासाकडूनही परिस्थितीवर लक्ष ठेवण्यात येत आहे. नेपाळच्या सुरक्षा दलांनी हेलिकॉप्टरच्या मदतीने शोध आणि बचाव मोहीम सुरू केली आहे. या पार्श्वभूमीवर महाराष्ट्रातील पर्यटकांच्या कुटुंबीयांची चिंता वाढली आहे. मात्र राज्य सरकारने उपलब्ध माहितीच्या आधारे शोधमोहीम सुरू केली असून, सध्या चार महाराष्ट्रातील पर्यटक सुरक्षित असल्याची माहिती मिळाली आहे. उर्वरित नागरिकांशी संपर्क साधण्यासाठी प्रयत्न सुरू आहेत. गिरीश महाजनांचे नागरिकांना आवाहन नेपाळमध्ये गेलेल्या आपल्या नातेवाईकांची किंवा परिचितांची माहिती नागरिकांकडे असल्यास ती प्रशासनाला देण्याचे आवाहन गिरीश महाजन यांनी केले आहे. “माहिती लपवू नका; प्रशासनाला कळवा. त्यामुळे संबंधित व्यक्तीचा शोध घेण्यास मदत होईल,” असा संदेश त्यांनी दिला आहे. त्यामुळे महाराष्ट्रातील नागरिकांनी आपल्या कुटुंबातील किंवा परिचयातील कोणी नेपाळ, कैलास मानसरोवर किंवा संबंधित मार्गावर गेले असल्यास त्याची माहिती तातडीने प्रशासनाकडे नोंदवणे महत्त्वाचे ठरणार आहे. सध्या महाराष्ट्र सरकारकडून या संपूर्ण परिस्थितीवर २४ तास लक्ष ठेवले जात असून, केंद्र आणि नेपाळमधील यंत्रणांशी समन्वय साधून बेपत्ता किंवा संपर्काबाहेर असलेल्या नागरिकांचा शोध घेण्याचे प्रयत्न सुरू आहेत. हेही वाचा… LIVE नेपाळमध्ये भूस्खलनामुळे आला विनाशकारी पूर, 178 मृत्यू: 1500 बेपत्ता; 300 भारतीयांचा शोध सुरू, आज 21 भारतीयांची सुटका नेपाळ-तिबेट सीमेवर बुधवारी सकाळी आलेल्या अचानक पुरामुळे 178 लोकांचा मृत्यू झाला. यात नेपाळमधील 175 आणि तिबेटमधील 3 लोकांचा समावेश आहे. सुमारे 1,500 लोक अजूनही बेपत्ता आहेत. नेपाळचे परराष्ट्र मंत्री शिशिर खनाल यांच्या मते, तेथे एकूण 826 लोक बेपत्ता आहेत. यात 300 हून अधिक भारतीय आहेत. खराब हवामान आणि तुटलेल्या रस्त्यांमुळे लोकांचा शोध सुरू आहे. नेपाळी सैन्याने रसुवा येथील टिमुरे येथून आज सकाळी 116 लोकांना सुरक्षित बाहेर काढले आहे. यात 95 नेपाळी आणि 21 भारतीय आहेत. येथे वाचा संपूर्ण बातमी



Source link