गणेशोत्सवात सुरक्षित अन्नाचा संदेश द्या, स्वतःची शक्ती कमी होऊ देऊ:एफडीए आयुक्त तुकाराम मुंढेंचे वाद्यपथकांना आवाहन

राज्याचे अन्न व औषध प्रशासन आयुक्त तुकाराम मुंढे यांनी गणेशोत्सवादरम्यान वाद्यपथकांना ‘सुरक्षित अन्न, सुरक्षित औषध, सुरक्षित महाराष्ट्र’ हा संदेश देण्याचे आवाहन केले आहे. पुणे येथे अभेद्य वाद्यपथकाने आयोजित केलेल्या कार्यक्रमात ते बोलत होते, जिथे त्यांच्या कार्याला मानवंदनाही देण्यात आली. मुंढे यांनी वाद्यपथकातील वादकांना तळलेले पदार्थ आणि एनर्जी ड्रिंक्स टाळून सकस आहार घेण्याचा सल्ला दिला. शक्य असल्यास घरचा डबा सोबत न्यावा आणि परवानाधारक विक्रेत्यांकडूनच खाद्यपदार्थ घ्यावेत, असे त्यांनी सांगितले. गणेशाची भक्ती करताना स्वतःची शक्ती कमी होऊ देऊ नका, असेही ते म्हणाले. सक्षम महाराष्ट्र घडवण्यासाठी तो सुरक्षित असणे आवश्यक आहे, यावर त्यांनी भर दिला. हा कार्यक्रम अभेद्य वाद्यपथक, कलावंत वाद्यपथक, ढोल ताशा महासंघ महाराष्ट्र आणि नू.म.वि. प्रशाला यांच्या संयुक्त विद्यमाने श्रीमंत थोरले बाजीराव पेशवे रस्त्यावरील नू.म.वि. प्रशालेत आयोजित करण्यात आला होता. यावेळी ढोल ताशा महासंघ महाराष्ट्रचे अध्यक्ष पराग ठाकूर, नगरसेवक भारत भूषण बराटे, अभेद्य वाद्य पथकाचे अध्यक्ष रोहन जोशी, सौरभ गुजर, दीपा कुलकर्णी, कलावंत वाद्य पथकाचे सौरभ गोखले, भूषण ताकवले आदी उपस्थित होते. वादकांनी आपल्या वादनातून तुकाराम मुंढे यांच्या कार्याला मानवंदना दिली. गणेशोत्सवात प्रसाद म्हणून वाटले जाणारे पेढे, लाडू आदी पदार्थ सुरक्षित आहेत का, हा प्रश्न विचारण्याची गरज मुंढे यांनी व्यक्त केली. नागरिकांना सुरक्षित अन्न पुरवणे ही आपली भूमिका असून त्यात कोणतीही तडजोड स्वीकारली जाणार नाही, असे त्यांनी स्पष्ट केले. गणेशोत्सव मंडळांनी अन्नाच्या सुरक्षिततेची विशेष काळजी घ्यावी आणि अन्न व औषध प्रशासनाकडून तपासणी करून घ्यावी, असे आवाहन त्यांनी केले. प्रत्येक भक्ताला सुरक्षितपणे घरी पाठवण्याची जबाबदारी मंडळांची आहे, असेही ते म्हणाले. भारताला महासत्ता बनवण्यासाठी केवळ आर्थिक शक्ती पुरेशी नाही, तर वैचारिक अभेद्यताही निर्माण करणे आवश्यक आहे, असे मुंढे यांनी नमूद केले. आर्थिक, सामाजिक आणि वैचारिकदृष्ट्या सक्षम भारत घडवण्यासाठी प्रत्येकाने आपली भूमिका पार पाडली पाहिजे. यशस्वी होण्यासाठी शिस्त हे सर्वात चांगले हत्यार असून, ही गोष्ट वाद्यपथकांमध्ये चांगल्या प्रकारे दिसून येते, असे त्यांनी कौतुक केले. कोणत्याही देशाचे भविष्य तरुणाईच्या विचारांवर अवलंबून असते आणि वाद्यपथकांनी निःस्वार्थपणे केलेले सामाजिक कार्य वाखाणण्याजोगा आहे, असेही ते म्हणाले.



Source link