पुणे ग्रामीण पोलिसांनी शिरूर परिसरात अमली पदार्थांच्या अवैध विक्रीविरोधात मोठी कारवाई केली आहे. सलग दोन दिवस केलेल्या या कारवाईत दोन स्वतंत्र प्रकरणांत दोन आरोपींना अटक करण्यात आली. पोलिसांनी सुमारे ३१ लाख रुपयांचा मुद्देमाल जप्त केला असून, यामध्ये ११० ग्रॅम प्रतिबंधित एमडी अमली पदार्थ, २० ग्रॅम एमडी, एक स्कॉर्पिओ कार आणि एक मोटारसायकल यांचा समावेश आहे. ‘नशामुक्त भारत अभियान’ आणि ‘ड्रग्स फ्री महाराष्ट्र’ उपक्रमांतर्गत ही कारवाई करण्यात आली. स्थानिक गुन्हे शाखेच्या पथकाने शिरूर परिसरात गस्त घालत असताना दोन संशयितांना ताब्यात घेतले. त्यांच्याकडून ११० ग्रॅम प्रतिबंधित एमडी अमली पदार्थ आणि एक मोटारसायकल असा सुमारे २२ लाख रुपयांचा मुद्देमाल जप्त करण्यात आला. याप्रकरणी शिरूर पोलिस ठाण्यात गुन्हा दाखल करण्यात आला आहे. दरम्यान, २० ऑगस्ट रोजी पोलिसांना अमली पदार्थांची बेकायदा देवाण-घेवाण होणार असल्याची माहिती मिळाली होती. त्यानुसार, स्थानिक गुन्हे शाखा आणि शिरूर पोलिसांनी संयुक्तपणे कारवाई करत स्कॉर्पिओ कारमधून एमडी अमली पदार्थ आणणाऱ्या दोन व्यक्तींना ताब्यात घेतले. त्यांच्याकडून २० ग्रॅम एमडी आणि स्कॉर्पिओ कार असा ९ लाख १० हजार रुपयांचा मुद्देमाल जप्त करण्यात आला. आरोपी दादा बाबन धावडे (२७, रा. कोल्हेवाडी, ता. श्रीगोंदा, जि. अहिल्यानगर) आणि अमोल राजाराम पोटावळे (३५, रा. राजापूर, ता. श्रीगोंदा) यांच्याविरुद्ध गुन्हा दाखल करण्यात आला आहे. अमली पदार्थांची विक्री व वाहतूक करणाऱ्यांविरोधात कठोर कारवाई सुरूच राहणार असल्याचे पोलिसांनी स्पष्ट केले आहे. पोलिस अधीक्षक संदीप सिंग गिल यांनी नागरिकांना आवाहन केले आहे की, परिसरात अमली पदार्थांची विक्री किंवा वाहतूक होत असल्याची माहिती पोलिसांना द्यावी. माहिती देणाऱ्याची ओळख पूर्णपणे गोपनीय ठेवली जाईल, असेही त्यांनी सांगितले.
Source link
शिरूरमध्ये 2 दिवसांत अमली पदार्थांवर मोठी कारवाई:31 लाखांचा मुद्देमाल जप्त, 2 आरोपींना अटक
