महाराष्ट्र लोकसेवा आयोगाच्या (MPSC) औषध निरीक्षक भरती परीक्षेच्या पेपरफुटीच्या आरोपावरून आता राजकीय वातावरण तापण्याची शक्यता आहे. पेपरफुटीचा आरोप करणाऱ्या विद्यार्थ्यांनी महाराष्ट्र नवनिर्माण सेनेचे अध्यक्ष राज ठाकरे यांची भेट घेतली. विद्यार्थ्यांनी
.
दरम्यान, या प्रकरणात अद्याप गुन्हा दाखल का करण्यात आलेला नाही, असा थेट सवाल मनसेने सरकारला केला आहे. विद्यार्थ्यांनी पुरावे दिले असतील, प्रकरणाचा तपास पोलिसांकडे गेला असेल, तर आधी गुन्हा दाखल करून त्यानंतर तपास का केला जात नाही? आणखी कोणता पुरावा सरकारला हवा आहे?, असा प्रश्न संदीप देशपांडे यांनी उपस्थित केला.
40 हजारांहून अधिक विद्यार्थी परीक्षेला
औषध निरीक्षक पदाच्या भरतीसाठी एमपीएससीकडून परीक्षा घेण्यात आली होती. या परीक्षेला 40 हजारांहून अधिक विद्यार्थी बसल्याचा दावा मनसेने केला आहे. मात्र, परीक्षेच्या दोन दिवस आधीच प्रश्नपत्रिका फुटल्याचा आरोप काही विद्यार्थ्यांनी केला आहे. पेपरफुटीच्या आरोपानंतर विद्यार्थ्यांनी संबंधित पुरावे समोर आणले. त्यानंतर या प्रकरणाचा तपास मुंबई पोलिसांकडे गेला असल्याचे सांगण्यात येत आहे. मात्र, अद्याप गुन्हा दाखल झालेला नसल्याचा आरोप मनसेने केला आहे. याच मुद्द्यावरून विद्यार्थ्यांनी राज ठाकरे यांची भेट घेतली. या भेटीत विद्यार्थ्यांनी आपली बाजू आणि उपलब्ध पुरावे त्यांच्यासमोर मांडले. विद्यार्थ्यांची संपूर्ण माहिती घेतल्यानंतर राज ठाकरे मुख्यमंत्री देवेंद्र फडणवीस यांच्याशी या विषयावर चर्चा करणार असल्याचे संदीप देशपांडे यांनी सांगितले.
आता आणखी काय पुरावे पाहिजेत?
एमपीएससीने यापूर्वी पेपरफुटीचा आरोप फेटाळल्याचे सांगत मनसेने या प्रकरणाच्या तपासाची मागणी केली आहे. “विद्यार्थ्यांनी पेपरफुटीचे आरोप केल्यानंतर पुरावेही समोर आणले. हे प्रकरण मुंबई पोलिसांकडे आले आहे. मात्र, अद्याप गुन्हा दाखल झालेला नाही. आता गुन्हा दाखल करण्यासाठी आणखी काय द्यावे लागणार? आणखी कोणते पुरावे सरकारला पाहिजेत?” असा सवाल संदीप देशपांडे यांनी केला. “आम्ही आंदोलन केले की लगेच गुन्हा दाखल केला जातो. मग या प्रकरणात आधी एफआयआर दाखल करून चौकशी का केली जात नाही?” असा सवालही त्यांनी उपस्थित केला. मनसेच्या या भूमिकेमुळे एमपीएससीच्या भरती प्रक्रियेतील कथित पेपरफुटीचा मुद्दा पुन्हा चर्चेत आला आहे.
शासन कोणाला वाचवण्याचा प्रयत्न करत आहे?
पेपरफुटीच्या आरोपामागे नेमके कोण आहेत, याचा सखोल तपास करण्याची मागणी मनसेने केली आहे. या प्रकरणात कोणाला वाचवण्याचा प्रयत्न होत आहे का, याचीही चौकशी झाली पाहिजे, असे देशपांडे म्हणाले. “शासन कोणाला वाचवण्याचा प्रयत्न करत आहे? यामध्ये भाजपचे कोणी कार्यकर्ते, पदाधिकारी किंवा इतर संबंधित व्यक्ती सहभागी आहेत का, या आरोपांचीही चौकशी झाली पाहिजे,” असे ते म्हणाले. मात्र, हे आरोप मनसेकडून उपस्थित केलेले प्रश्न असून त्याबाबत तपास यंत्रणांकडून अधिकृत निष्कर्ष समोर आलेला नाही, हेही महत्त्वाचे आहे.
रेशीमबागेत जेन झीशी गप्पा मारण्यापेक्षा पेपरफुटीवर बोला
यावेळी संदीप देशपांडे यांनी सरकारवर टीका करताना युवकांच्या प्रश्नांवर लक्ष केंद्रित करण्याचे आवाहन केले. रेशीमबागेत बसून जेन झीशी संवाद साधण्याच्या चर्चेपेक्षा तरुणांच्या मूळ समस्यांवर सरकारने बोलावे, असा टोला त्यांनी लगावला. “राम मंदिर आंदोलनाच्या काळात आम्ही कसे पोहोचलो, काय केले, याचे किस्से सांगण्यापेक्षा आजच्या जेन झीसमोर असलेल्या समस्या सोडवा. पेपरफुटी ही विद्यार्थ्यांची मूळ समस्या आहे. त्यावर सरकारने भाष्य केले पाहिजे,” असे देशपांडे म्हणाले. त्यामुळे सरकारने युवकांशी संवाद साधतानाच स्पर्धा परीक्षांच्या पारदर्शकतेबाबतही ठोस भूमिका घ्यावी, अशी मागणी त्यांनी केली.
2018 मध्येही एमपीएससी भरतीचा प्रश्न निर्माण झाला होता
मनसेने यावेळी 2018 मधील एमपीएससी भरती प्रक्रियेचा संदर्भही दिला. त्यावेळीही भरती प्रक्रिया थांबवण्याची वेळ आली होती आणि विद्यार्थ्यांच्या प्रश्नांवरून वाद निर्माण झाला होता, असे देशपांडे म्हणाले. स्पर्धा परीक्षांच्या प्रक्रियेत वारंवार निर्माण होणाऱ्या तक्रारींमुळे विद्यार्थ्यांच्या भवितव्याचा प्रश्न निर्माण होत असल्याचे सांगत अशा घटनांवर कठोर कारवाई होणे आवश्यक असल्याचे मनसेने म्हटले आहे.
राज ठाकरे मुख्यमंत्र्यांशी बोलणार
विद्यार्थ्यांनी राज ठाकरे यांची भेट घेतल्यानंतर आता हा मुद्दा थेट मुख्यमंत्र्यांपर्यंत नेला जाणार आहे. राज ठाकरे मुख्यमंत्री देवेंद्र फडणवीस यांच्याशी चर्चा करणार असल्याचे संदीप देशपांडे यांनी सांगितले. “राजसाहेबांनी विद्यार्थ्यांकडून संपूर्ण माहिती घेतली आहे. ते मुख्यमंत्र्यांशी या विषयावर बोलतील. सरकारच्या दारी सोडवले जाणारे प्रश्न विद्यार्थ्यांना घेऊन शिवतीर्थावर यावे लागतात आणि त्यानंतर सरकारला जाग येते, ही परिस्थिती बदलली पाहिजे,” अशी टीका देशपांडे यांनी केली.
आंदोलन झाल्यास मनसे विद्यार्थ्यांच्या पाठीशी
एमपीएससीकडून किंवा सरकारकडून या प्रकरणात योग्य कारवाई झाली नाही आणि विद्यार्थ्यांनी आंदोलनाचा निर्णय घेतला, तर मनसे पूर्ण ताकदीने त्यांच्या पाठीशी उभी राहील, अशी घोषणा देशपांडे यांनी केली. “उद्या या प्रकरणावर कोणतीही कारवाई झाली नाही आणि विद्यार्थ्यांनी आंदोलन करण्याचा निर्णय घेतला, तर महाराष्ट्र नवनिर्माण सेना १०० टक्के त्यांच्या पाठीशी उभी राहील. राजसाहेबही विद्यार्थ्यांच्या मागे ठामपणे उभे राहतील,” असे त्यांनी स्पष्ट केले.
स्पर्धा परीक्षांच्या पारदर्शकतेचा पुन्हा प्रश्न
एमपीएससीच्या परीक्षांबाबत पेपरफुटीचे आरोप होणे हा विद्यार्थ्यांसाठी अत्यंत गंभीर विषय आहे. हजारो विद्यार्थी वर्षानुवर्षे तयारी करून परीक्षेला सामोरे जातात. अशा वेळी प्रश्नपत्रिका फुटल्याचा आरोप झाल्यास केवळ संबंधित परीक्षेपुरता नव्हे, तर संपूर्ण भरती प्रक्रियेवरील विश्वासाचा प्रश्न निर्माण होतो. त्यामुळे औषध निरीक्षक भरती परीक्षेच्या प्रश्नपत्रिकेबाबत करण्यात आलेले आरोप खरे आहेत की नाहीत, याची निष्पक्ष चौकशी करून सत्य समोर आणावे, संबंधितांकडून गैरप्रकार झाला असल्यास कठोर कारवाई करावी आणि दोष नसलेल्या विद्यार्थ्यांचे नुकसान होणार नाही याची काळजी घ्यावी, अशी मागणी आता पुढे येत आहे. या पार्श्वभूमीवर राज ठाकरे मुख्यमंत्री फडणवीस यांच्याशी काय चर्चा करतात आणि सरकारकडून या कथित पेपरफुटी प्रकरणात कोणती भूमिका घेतली जाते, याकडे एमपीएससीची तयारी करणाऱ्या हजारो विद्यार्थ्यांचे लक्ष लागले आहे.
हेही वाचा…
देवेंद्र फडणवीसांची दिल्लीला जाण्याची आवराआवर: कुंभमेळ्याच्या निधीत 27 कोटींचा भ्रष्टाचार? संजय राऊतांचा मोदी सरकारसह सरन्यायाधीशांवर निशाणा
नवी दिल्ली येथे घेतलेल्या पत्रकार परिषदेत शिवसेना (उद्धव बाळासाहेब ठाकरे) पक्षाचे खासदार संजय राऊत यांनी राज्यातील महायुती सरकार, भाजप आणि थेट सर्वोच्च न्यायालयाच्या कार्यपद्धतीवर सडकून टीका केली आहे. राज्याचे मुख्यमंत्री देवेंद्र फडणवीस हे लवकरच दिल्लीला रवाना होणार असून, त्याआधी ते राज्यातील प्रलंबित कामे उरकून आपली माणसे महत्त्वाच्या पदांवर बसवण्याची आवराआवर करत असल्याचा मोठा दावा राऊत यांनी केला आहे. यासोबतच नाशिकच्या कुंभमेळ्यातील भ्रष्टाचार, विमानतळांचे खासगीकरण आणि आदिवासींच्या प्रश्नांवरून त्यांनी सरकारला धारेवर धरले. येथे वाचा संपूर्ण बातमी
