एमपीएससी वाचवायची असेल तर अध्यक्ष बदला: रोहित पवार:विवेक भीमनवारांचा राजीनामा घेऊन तुकाराम मुंढेंना अध्यक्ष करा, अन्यथा 16 सप्टेंबरपासून आंदोलन

आमदार रोहित पवार यांनी गुरुवारी मागणी केली की, जर एमपीएससी वाचवायची असेल तर आयोगाचा अध्यक्ष बदलला पाहिजे. त्यांनी विद्यमान अध्यक्ष विवेक भीमनवार यांचा राजीनामा घेऊन त्यांच्या जागी तुकाराम मुंढे यांची नियुक्ती करण्याची मागणी केली. अन्यथा, १६ सप्टेंबरपासून आंदोलन करण्याचा इशाराही त्यांनी दिला. एमपीएससी संयुक्त गट-क परीक्षा पुढे ढकलण्यात आली आहे. या परीक्षेचा पेपर फुटल्याची शक्यताही व्यक्त होत आहे. त्यामुळे ही परीक्षा जानेवारीऐवजी ऑक्टोबर-नोव्हेंबरच्या पहिल्या आठवड्यात घ्यावी, अशी विद्यार्थ्यांची मागणी आहे. तसेच, परीक्षा ऑनलाइनऐवजी ऑफलाइन पद्धतीने घ्यावी, असेही विद्यार्थी म्हणत असल्याचे पवार यांनी सांगितले. राज्यात सुमारे 45 लाख विद्यार्थी स्पर्धा परीक्षा देऊन अधिकारी होण्याचे स्वप्न पाहतात. पुण्यात राहून तयारी करणाऱ्या विद्यार्थ्यांना मोठा आर्थिक भार सहन करावा लागतो. प्रथमेश देशमुखच्या आत्महत्येचा उल्लेख करत, पवार म्हणाले की सरकारने आर्थिक अडचणी, कर्जबाजारीपणा आणि परीक्षांमधील अनिश्चितता याकडे गांभीर्याने लक्ष दिले पाहिजे. खासगी कंपन्यांमध्ये नोकरीच्या संधी कमी झाल्यामुळे मोठ्या संख्येने विद्यार्थी स्पर्धा परीक्षांकडे वळत आहेत. दरवर्षी किती पदभरती होणार, याबाबत विद्यार्थ्यांना स्पष्टता दिली पाहिजे. परीक्षांमधील गैरकारभाराबाबत अनेक पुरावे आपल्याकडे आले असून, हा प्रकार अनेक वर्षांपासून सुरू असल्याचे दिसून येते, असेही पवार यांनी सांगितले. पेपरफुटीबाबत एमपीएससीच्या सचिवांनी सुरुवातीला नकार दिला होता, पण नंतर त्यांना ती बाब मान्य करावी लागली, असा दावा पवार यांनी केला. पोलिसांच्या माहितीनुसार, पेपर परीक्षा होण्याच्या दोन दिवस आधी फुटला होता. मात्र, त्यापूर्वीच पेपर बाहेर गेल्याचे पुरावे आपल्याकडे असल्याचा दावाही त्यांनी केला. ‘दोन महिने पेपर फुटला असेल तर आयोग झोपला होता का?’ असा सवाल त्यांनी उपस्थित केला. हा पेपर अनेकांपर्यंत पोहोचल्याचा दावा करत, या प्रकरणात मोठ्या आर्थिक गैरव्यवहाराचा संशय असल्याचेही पवार म्हणाले. या प्रकरणी आपल्याकडील पुरावे तपास यंत्रणेला दिल्याचे त्यांनी सांगितले. पवार यांनी परिवहन विभागातील गैरव्यवहारांवरही आरोप केले. एचएसआरपी नंबरप्लेट, इंटरसेप्टर वाहने, रडार, जीपीआरएस आणि ई-चलन प्रक्रियेत गैरव्यवहार झाल्याचे त्यांनी म्हटले. काही प्रकरणांमध्ये एसआयटी चौकशीतही गैरव्यवहाराच्या गोष्टी समोर आल्याचा दावा त्यांनी केला. आरटीओमध्ये ज्या प्रकारचे रॅकेट समोर येत आहे, त्याच धर्तीवर एमपीएससीमध्येही अशीच व्यवस्था कार्यरत असल्याचा संशय आहे, असे पवार म्हणाले.



Source link