मुंबईत आधीच गणेशोत्सवाची गर्दी, त्यात आंदोलनाचा बंदोबस्त कसा करणार?:छगन भुजबळांचा जरांगेंना टोला; आक्षेपार्ह भाषेवरूनही सुनावले खडेबोल

मराठा आरक्षणाच्या मागणीसाठी मनोज जरांगे पाटील यांनी मुंबईत आंदोलन करण्याची भूमिका कायम ठेवल्यानंतर त्यावरून राजकीय प्रतिक्रिया उमटू लागल्या आहेत. आझाद मैदान पोलिसांनी जरांगे यांच्या आंदोलनाला परवानगी नाकारल्यानंतरही मुंबईकडे येण्याच्या तयारीत असलेल्या मराठा आंदोलकांच्या भूमिकेवर मंत्री छगन भुजबळ यांनी पहिली प्रतिक्रिया दिली आहे. “मुंबईत आधीच गणेशोत्सवामुळे प्रचंड गर्दी आहे. या गर्दीला आवर घालण्यासाठी पोलीसही अपुरे पडत आहेत. त्यामुळे अशा परिस्थितीत आणखी आंदोलन नको, असे पोलिसांना वाटले असेल,” असे भुजबळ म्हणाले. मनोज जरांगे पाटील यांनी 15 सप्टेंबरपासून मुंबईच्या दिशेने कूच करण्याची घोषणा केली आहे. आझाद मैदानात 19 सप्टेंबरपासून उपोषण करण्याचा त्यांचा निर्धार आहे. मात्र, पोलिसांनी आंदोलनाला परवानगी नाकारल्याने आता हा संघर्ष आणखी वाढण्याची शक्यता आहे. जरांगे यांच्या सहकाऱ्यांकडून पुन्हा परवानगीसाठी अर्ज करण्यात आला असून, गरज पडल्यास न्यायालयात जाण्याची तयारीही करण्यात येत आहे. गणेशोत्सवामुळे परवानगी नाकारली असावी; भुजबळांची प्रतिक्रिया मनोज जरांगे यांच्या आंदोलनाला परवानगी का नाकारण्यात आली, याबाबत छगन भुजबळ यांनी पोलिसांच्या भूमिकेकडे लक्ष वेधले. गणेशोत्सवाच्या काळात मुंबईत मोठ्या प्रमाणावर गर्दी होत असल्याने कायदा-सुव्यवस्था आणि वाहतूक व्यवस्थेवर पोलिसांवर मोठा ताण असतो. त्यामुळे या काळात आणखी मोठ्या आंदोलनाचा बंदोबस्त करणे पोलिसांसाठी आव्हानात्मक ठरू शकते, असे त्यांनी सांगितले. “मुंबईमध्ये आधीच गणेशोत्सवाची प्रचंड गर्दी आहे. त्या सगळ्या गर्दीला आवर घालण्यासाठी पोलीसही अपुरे पडतात. अशा वेळी इतर काही गोष्टी नकोत, आणखी आंदोलन नको, असे पोलिसांना वाटणे स्वाभाविक आहे,” असे भुजबळ म्हणाले. गेल्या वर्षी मराठा आंदोलनाला मुंबईत परवानगी देण्यात आली होती, मग यंदा परवानगी का नाकारली, असा सवाल मनोज जरांगे आणि त्यांच्या समर्थकांकडून उपस्थित केला जात आहे. मात्र, यंदा गणेशोत्सवाच्या काळातील परिस्थिती वेगळी असल्याचे सांगत पोलिसांच्या निर्णयाकडे पाहिले जात आहे. महिलांबद्दल एकेरी भाषेत बोलणे ही त्यांची संस्कृती यावेळी छगन भुजबळ यांनी मनोज जरांगे यांच्या वक्तव्यांच्या शैलीवरही टीका केली. महिला अधिकारी, जिल्हाधिकारी किंवा इतर महिलांबद्दल एकेरी भाषेत बोलणे योग्य नाही, असे ते म्हणाले. भुजबळ म्हणाले की, महिलांविषयी बोलताना आक्षेपार्ह भाषा वापरणे किंवा महिला जिल्हाधिकाऱ्यांबद्दलही अशाच प्रकारे बोलणे योग्य नाही. दरम्यान, जरांगे पाटील यांनी मुंबई आंदोलनाच्या पार्श्वभूमीवर सरकारवर सातत्याने दबाव वाढवला आहे. मराठा आरक्षणाच्या मागण्यांवर सरकारने ठोस निर्णय घ्यावा, अशी त्यांची भूमिका आहे. जरांगे समर्थकांची पुन्हा परवानगीसाठी धावपळ आझाद मैदानात आंदोलन करण्यासाठी 5,000 लोकांची परवानगी मागण्यात आली होती. मात्र, पोलिसांनी ही मागणी नाकारली. त्यानंतर जरांगे यांच्या सहकाऱ्यांनी पुन्हा परवानगी मिळवण्यासाठी अर्ज करण्याची प्रक्रिया सुरू केली आहे. परवानगीचा प्रश्न न्यायालयात नेण्याचीही शक्यता आहे. त्यामुळे पुढील काही दिवसांत पोलिस प्रशासन, आंदोलनकर्ते आणि सरकार यांच्यातील संघर्ष अधिक तीव्र होतो का, याकडे लक्ष लागले आहे. मनोज जरांगे यांनी मात्र मुंबईकडे जाण्याचा निर्धार कायम ठेवला आहे. त्यामुळे परवानगी नसतानाही मोठ्या संख्येने आंदोलक मुंबईच्या दिशेने रवाना झाल्यास प्रशासनासमोर मोठे आव्हान निर्माण होऊ शकते. धाराशिवमधूनही मोठी तयारी दरम्यान, मनोज जरांगे यांच्या मुंबई आंदोलनाला पाठिंबा देण्यासाठी धाराशिव जिल्ह्यातील मराठा समाजाकडूनही तयारी सुरू झाल्याचे समोर आले आहे. जिल्ह्यातील प्रत्येक गावातून सुमारे 100 मराठा बांधव अंतरवाली सराटीकडे रवाना होणार असल्याचे सांगण्यात आले आहे. अंतरवाली सराटी येथे एकत्र आल्यानंतर पुढील टप्प्यात मनोज जरांगे यांच्या मुंबईकडे निघणाऱ्या मोर्चात सहभागी होण्याची तयारी या आंदोलकांकडून केली जात आहे. त्यामुळे मराठा आंदोलनाला जिल्ह्यांमधून पुन्हा मोठ्या प्रमाणावर प्रतिसाद मिळतो का, याकडे लक्ष लागले आहे. पराग शहा यांच्या वेशांतरावर भुजबळ म्हणाले… याच पत्रकार संवादात छगन भुजबळ यांनी घाटकोपरचे भाजप आमदार पराग शहा यांच्या वेषांतरावरही भाष्य केले. पराग शाह यांनी भिकाऱ्याच्या वेशात घाटकोपर परिसरात फिरून सामान्य नागरिकांच्या समस्या जाणून घेण्याचा प्रयत्न केला होता. या घटनेचा व्हिडीओ सोशल मीडियावर मोठ्या प्रमाणावर व्हायरल झाला आहे. पराग शहा यांच्या कृतीबद्दल विचारले असता भुजबळ यांनी माजी मुख्यमंत्री ए. आर. अंतुले यांचा संदर्भ दिला. “अंतुलेदेखील वेशांतर करून लोकांच्या अडचणी काय आहेत हे जाणून घेण्यासाठी रात्री फिरायला जायचे. लोकांचे प्रश्न समजून घ्यायचे. यात काय वाईट नाही,” असे भुजबळ म्हणाले. आंदोलन, गणेशोत्सव आणि कायदा-सुव्यवस्थेचे आव्हान एकीकडे गणेशोत्सवामुळे मुंबईत मोठ्या प्रमाणावर गर्दी होत असताना दुसरीकडे मराठा आंदोलनाची तयारी सुरू आहे. त्यामुळे वाहतूक व्यवस्था, सुरक्षा आणि कायदा-सुव्यवस्था राखण्याचे मोठे आव्हान मुंबई पोलिसांसमोर आहे. मनोज जरांगे यांच्या आंदोलनाला परवानगी नाकारण्यामागे गणेशोत्सवातील गर्दी आणि पोलिसांवरील बंदोबस्ताचा ताण हे कारण असल्याचे छगन भुजबळ यांनी सांगितले. मात्र, आंदोलकांनी गेल्या वर्षी परवानगी दिली होती, यंदाच का नाकारली, असा सवाल उपस्थित केला आहे. त्यामुळे आगामी काळात परवानगीचा प्रश्न, न्यायालयातील संभाव्य सुनावणी आणि मराठा आंदोलकांची मुंबईकडे होणारी वाटचाल यामुळे राज्याच्या राजकारणात पुन्हा एकदा मराठा आरक्षणाचा मुद्दा केंद्रस्थानी येण्याची चिन्हे आहेत. हेही वाचा… मान वाकवून जरांगेंकडे जाणाऱ्या मंत्र्यांची मान कशी तुटत नाही?: राज्यात भीषण दुष्काळ, तातडीने विशेष पॅकेज जाहीर करावे- विजय वडेट्टीवार सरकारचे इतके मंत्री मान वाकवून मनोज जरांगेंकडे जातात, त्यांची मान कशी तुटत नाही? पाळीव प्राण्याला लाजवेल अशा प्रकारे मान वाकवत मंत्री जातात, त्यामुळे जरांगे पाटलांना आपण बादशहा झाल्यासारखे वाटते. सरकार झुकती है, झुकानेवाला चाहिये अशी सध्याची परिस्थिती आहे, अशी बोचरी टीका काँग्रेसचे नेते विजय वडेट्टीवार यांनी केली आहे. येथे वाचा संपूर्ण बातमी



Source link