पुणे शहरात गेल्या २२ तासांत १२३ मुलींचे अपहरण झाल्याचा समाजमाध्यमांवर प्रसारित होणारा दावा पूर्णपणे खोटा आणि निराधार असल्याचे पुणे पोलिसांनी स्पष्ट केले आहे. व्हायरल होत असलेल्या रील आणि ऑडिओ क्लिपमधील माहितीची संबंधित पोलीस ठाणी, गुन्हे शाखा आणि अन्य उपलब्ध माध्यमांतून पडताळणी करण्यात आली. मात्र, या दाव्याला पुष्टी देणारी कोणतीही ठोस माहिती, नोंद किंवा पुरावा आढळलेला नाही. पुणे पोलिसांच्या गुन्हे शाखेचे पोलीस उपायुक्त हसन गौर यांनी याबाबत माहिती दिली. समाजमाध्यमांवर मोठ्या प्रमाणात प्रसारित होत असलेल्या संदेशाची पोलिसांनी गांभीर्याने दखल घेतली. त्यानंतर संबंधित यंत्रणांकडून माहिती संकलित करून वस्तुस्थिती तपासण्यात आली. या पडताळणीत अपहरणाच्या दाव्याला कोणताही तथ्याधार नसल्याचे स्पष्ट झाले, असे पोलिसांनी सांगितले. पडताळणीदरम्यान संबंधित ऑडिओ रेकॉर्ड करणाऱ्या व्यक्तीशी संपर्क साधून माहिती घेण्यात आली. तसेच संबंधित सोसायटीचे पदाधिकारी, व्यवस्थापन, शेजारी आणि इतर संबंधित व्यक्तींकडूनही माहिती घेतली गेली. या सर्व माध्यमांतून तपासणी केल्यानंतर शहरात २२ तासांत १२३ मुलींचे अपहरण झाल्याचे सिद्ध करणारा पुरावा पोलिसांच्या निदर्शनास आलेला नाही. या प्रकरणाची सविस्तर चौकशी अद्याप सुरू असल्याचेही पोलिसांनी स्पष्ट केले आहे. चौकशीदरम्यान नवीन माहिती किंवा पुरावा मिळाल्यास त्यानुसार योग्य कायदेशीर कार्यवाही करण्यात येईल. आवश्यकतेनुसार नागरिकांना त्याबाबत माहिती दिली जाईल, असे पोलिसांकडून सांगण्यात आले आहे. अशा अप्रमाणित संदेशांमुळे नागरिकांमध्ये विनाकारण भीती, संभ्रम आणि गैरसमज निर्माण होऊ शकतात. त्यामुळे कोणतीही माहिती मिळाल्यानंतर तिची खातरजमा न करता ती पुढे पाठवू नये. असत्य, अप्रमाणित किंवा दिशाभूल करणाऱ्या रील, ऑडिओ क्लिप आणि संदेशांवर विश्वास ठेवू नये, असे आवाहन पुणे पोलिसांनी केले आहे. महिला आणि मुलींची सुरक्षितता ही पुणे पोलिसांची सर्वोच्च प्राथमिकता असल्याचे प्रसिद्धिपत्रकात स्पष्ट करण्यात आले आहे. त्यांच्या सुरक्षेसाठी आवश्यक उपाययोजना सातत्याने करण्यात येत आहेत. नागरिकांनी माहिती मिळवण्यासाठी पुणे पोलिसांच्या अधिकृत आणि सत्यापित माध्यमांवरच विश्वास ठेवावा, असेही पोलिसांनी सांगितले. कोणतीही वास्तविक घटना, संशयास्पद बाब किंवा संबंधित माहिती निदर्शनास आल्यास तातडीने जवळच्या पोलीस ठाण्याशी अथवा पोलिसांशी संपर्क साधावा. अफवांना बळी न पडता समाजमाध्यमांवर जबाबदारीने वागण्याचे आवाहन करण्यात आले आहे. व्हायरल संदेशातील आकडेवारीला अधिकृत माहिती समजून प्रसारित करू नये, तर पोलिसांकडून देण्यात येणाऱ्या पडताळलेल्या माहितीचा आधार घ्यावा, असा स्पष्ट संदेश या निवेदनातून देण्यात आला आहे. कोणत्याही दाव्याची सत्यता तपासणे आणि प्रत्यक्ष घटना असल्यास ती त्वरित पोलिसांच्या निदर्शनास आणणे, या दोन्ही बाबींवर पोलिसांनी भर दिला आहे. नागरिकांनी अप्रमाणित माहिती पुढे न पाठवता अफवांचा प्रसार रोखण्यासाठी सहकार्य करावे, असेही पोलिसांनी सांगितले आहे.
Source link
पुण्यात 123 मुलींच्या अपहरणाचा समाजमाध्यमांवरील दावा खोटा:पुणे पोलिसांनी पडताळणी करून नागरिकांना अफवांवर विश्वास न ठेवण्याचे आवाहन केले
