This is why Bangladeshi infiltrators, the process is simple, and anyone’s support becomes easy.

छत्तीसगड दहशतवादविरोधी पथकाने (एटीएस) गेल्या १ वर्षात ३४ बांगलादेशींना अटक केली, ज्यांना परत पाठवण्यात आले आहे. अनेक घुसखोर चोरी, लूटमार, मानवी तस्करी यांसारख्या गंभीर गुन्ह्यांमध्ये शिक्षा भोगत आहेत. त्यांच्याकडून बनावट आधार कार्ड, पॅन कार्ड, मतदार ओळखपत्र व रेशन कार्ड यांसारखी कागदपत्रे जप्त केली आहेत.

‘भास्कर’ने तपास यंत्रणांकडून कागदपत्रे मिळवली आणि याच आधारे नवीन सरकारी कागदपत्रे बनवण्याची प्रक्रिया केवळ समजूनच घेतली नाही, तर कागदपत्रेही बनवून घेतली. बांगलादेशी घुसखोर शेख अकबर शमशुद्दीन (रायपूर तुरुंगात कैद) याच्या नावावर रायपूरमध्ये २५० रुपयांत भाडेकरार तयार झाला. आधार कार्डच्या अपडेट फॉर्मवर नगरसेवकाने कोणतीही शहानिशा न करता सही आणि शिक्का मारला. म्हणजेच कोणताही घुसखोर, दहशतवादी किंवा बाहेरील व्यक्ती अत्यंत सहजपणे सरकारी कागदपत्रे बनवू शकतो व भारताचा नागरिक बनू शकतो.छत्तीसगडमध्ये १८०० संशयास्पद आधार कार्ड आहेत, ज्यामध्ये मोठ्या संख्येने परदेशी नागरिक आहेत. राज्य सरकारने ही सर्व संशयास्पद आधार कार्ड पडताळणीसाठी केंद्र सरकारकडे पाठवली आहेत.

दहशतवादविरोधी पथकाने १७ जून २०२५ रोजी १० बांगलादेशी घुसखोरांना अटक केली होती. ‘भास्कर’ने त्यांच्याकडे सापडलेल्या बनावट कागदपत्रांच्या आधारे १० महिन्यांनंतर भाडेकरार बनवून घेतला. आधार अपडेशन फॉर्ममध्ये नगरसेवकाने सही-शिक्का मारला. यावरून हे सिद्ध होते की घुसखोर अतिशय सहजपणे बनावट कागदपत्रे बनवू शकतात. – संपूर्ण प्रक्रिया समजून घ्या.

मार्ग १ – भाडेकराराच्या माध्यमातून सुरू असलेला खेळ

नाव: शेख अकबर शमशुद्दीन. १ एप्रिल २०२६ पासून प्रशांत गुप्ता, जुनी वस्ती (पुरानी बस्ती) येथील घरात भाड्याने राहत आहे. प्रक्रिया: रिपोर्टर रायपूर जिल्हा न्यायालयाच्या नोटरी विभागात पोहोचला. येथे भाडेकरार बनवण्याची फी २५० रु. असल्याची पाटी होती. चर्चेनंतर एका महिलेने आम्हाला टायपिस्टकडे नेले. टायपिस्टने संगणकावर आधीच सेट असलेल्या फॉरमॅटमध्ये नाव आणि पत्ता बदलला आणि ५ मिनिटांत ५० रुपयांच्या स्टॅम्पवर भाडेकरार तयार करून महिलेला दिला. त्यानंतर ती नोटरी करणाऱ्याकडे गेली – सही-शिक्का घेतला व भाडेकरार आमच्याकडे सोपवला. आमच्याकडे कागदपत्र मागितले नाही. काय व्हायला हवे: ज्याच्या नावावर भाडेकरार बनत आहे, ती व्यक्ती हजर असावी. त्याच्या आधारची पडताळणी केली जावी.

मार्ग २ – आधार अपडेशन प्रमाणपत्र

नाव: शेख अकबर शमशुद्दीन. प्रभाग नगरसेवकाने सही-शिक्का मारून दिले की ही व्यक्ती माझ्या प्रभागात राहत आहे. प्रक्रिया: बांगलादेशी नागरिक शेख अकबर शमशुद्दीन (जो रायपूर तुरुंगात कैद आहे) त्याच्या आधार कार्डमध्ये पत्ता संतोषीनगर होता. आम्ही तो बदलण्यासाठी एका आधार कार्यालयाशी संपर्क साधला, त्यांनी एक फॉर्म दिला ज्यामध्ये पडताळणी (व्हेरिफाय) करून घेण्याचा उल्लेख होता. रिपोर्टर फॉर्ममध्ये फक्त शेख अकबर शमशुद्दीन असे लिहून आणि फोटो लावून नगरसेवकाच्या कार्यालयात पोहोचला. नगरसेवकाने कोणतेही कागदपत्र मागितले नाही. फक्त एवढेच विचारले – “आमच्या प्रभागातील आहात का…?” ‘हो’ म्हटल्यावर थेट शिक्का मारून सही केली. काय व्हायला हवे: नगरसेवकाने आधार कार्डच्या माध्यमातून, घरमालकाकडून भाडेकरूची ओळख पडताळून पाहावी.