अंनिसची संघर्ष फेरी:"प्रत्येक जण प्रयत्न करू.. भोंदू मुक्त गाव साकारू', बुवाबाजी व भोंदूगिरीविरोधात दिली घोषणांची साद‎

येथील बडी साजन मंगल कार्यालयात ‘महाराष्ट्र अंधश्रद्धा निर्मूलन समिती’ व ‘विवेक जागर संस्था’ यांच्या वतीने आयोजित राज्यस्तरीय विस्तारित कार्यकारणीच्या बैठकीचा दुसरा दिवस विविध उपक्रमांनी गाजला. शनिवारी सायंकाळी पाच वाजता बडी साजन मंगल कार्यालय ते कोठी रोड मार्गे बाजार समिती आणि तेथून जुने बसस्थानक मार्गे पुन्हा बडी साजन मंगल कार्यालयापर्यंत एक भव्य व ऐतिहासिक ‘विरोधी संघर्ष फेरी’ काढण्यात आली. अंधश्रद्धेच्या बेड्या तोडण्यासाठी आणि समाजात वैज्ञानिक दृष्टिकोन रुजवण्यासाठी या फेरीत कार्यकर्त्यांनी दिलेल्या घोषणांनी संपूर्ण नगर शहर दणाणून सोडले. फेरीत पुढील प्रमुख घोषणा देण्यात आल्या: “जादूटोणा विरोधी कायद्याची कठोर अंमलबजावणी, झालीच पाहिजे, झालीच पाहिजे, पोलिस ठाणे तेथे अंधश्रद्धा निर्मूलन कक्ष, झालेच पाहिजे, झालेच पाहिजे, नातं विज्ञानाशी जोडू, बेडी अंधश्रद्धेची तोडू, “बुवा जर आहेच चमत्कारी.. दवाखान्याची का चढतो पायरी?, “प्रत्येक जण प्रयत्न करू.. भोंदू मुक्त गाव साकारू, अशा घोषणांनी शहर दणाणून गेले होते. या संघर्ष फेरीत महा.अंनिसचे राज्य अध्यक्ष माधव बावगे, राज्य कार्याध्यक्ष संजय बनसोडे, राज्य प्रधान सचिव ठकसेन गोराणे, राज्य निमंत्रित कॉ. बाबा आरगडे, राज्य कार्यवाह ॲड. रंजना गवांदे, प्रधान सचिव गजेंद्र सुरकार, विनायक सावळे, रुकसाना मुल्ला आणि विजय परब प्रामुख्याने सहभागी झाले होते. त्यांच्यासोबत राज्य सरचिटणीस शहाजी भोसले, सुधाकर काशीद, कृष्णात स्वाती, आरती नाईक, उत्तरेश्वर बिराजदार, सुरेश बोरसे, विलास निंबोरकर, मच्छिंद्रनाथ मुंडे, अहिल्यानगर जिल्हाध्यक्ष बाबासाहेब बुधवंत, कार्याध्यक्ष विष्णू गायकवाड, उपाध्यक्ष प्रमोद भारुळे, डॉ. प्रकाश गरुड, जिल्हा प्रधान सचिव विनायक सापा, सुखदेव फुलारी, भारतभूषण भागवत आदी उपस्थित होते. अंधश्रद्धा निर्मूलन पत्रिका’ पुरस्कार बडी साजन मंगल कार्यालय येथे या संघर्ष फेरीचा समारोप करण्यात आला. त्यानंतर ज्येष्ठ सामाजिक कार्यकर्ते सुभाष लामते यांच्या हस्ते आणि राज्य कार्याध्यक्ष संजय बनसोडे यांच्या अध्यक्षतेखाली ‘अंधश्रद्धा निर्मूलन पत्रिका पुरस्कारांचे’ भव्य वितरण करण्यात आले. या सोहळ्याला राज्याध्यक्ष माधव बावगे, अंधश्रद्धा निर्मूलन पत्रिकेचे संपादक डॉ. नितीन शिंदे आणि कार्यकारी संपादक उत्तम जोगदंड यांची प्रमुख उपस्थिती होती. या पुरस्कारांच्या माध्यमातून अंधश्रद्धा निर्मूलनाच्या चळवळीत मोलाचे लेखन व कार्य करणाऱ्या शिलेदारांचा गौरव करण्यात आला.



Source link