इग्नीसिया-2026' हॅकेथॉनमध्ये मुंबईच्या 'ब्रॉन जीपी' संघाचा डंका:एमआयटी डब्ल्यूपीयू उपविजेते, मणिपाल युनिव्हर्सिटीला द्वितीय उपविजेतेपद

पुणे: एमआयटी वर्ल्ड पीस युनिव्हर्सिटी (एमआयटी डब्ल्यूपीयू) येथे नुकतीच ‘इग्नीसिया-2026’ ही राष्ट्रीय स्तरावरील हॅकेथॉन स्पर्धा संपन्न झाली. वास्तविक जगातील समस्या सोडवण्यासाठी कृत्रिम बुद्धिमत्तेचा वापर करण्याच्या आव्हानावर आधारित या स्पर्धेत मुंबईच्या ब्रॉन जीपी टीमने विजेतेपद पटकावले. एमआयटी डब्ल्यूपीयूच्या बिआँड बिट्स संघाने उपविजेतेपद मिळवले, तर कर्नाटकच्या मणिपाल युनिव्हर्सिटीच्या ट्रायस्टॅक ओव्हरफ्लो संघाने द्वितीय उपविजेतेपद पटकावले. ‘विचार करा, निर्मिती करा आणि विकसित व्हा’ या घोषवाक्याखाली एमआयटी डब्ल्यूपीयूच्या पॉलिटेक्निक व कौशल्य विकास विभाग आणि संगणक अभियांत्रिकी व तंत्रज्ञान विभागाने संयुक्तपणे या स्पर्धेचे आयोजन केले होते. विजेत्या मुंबईच्या ब्रॉन जीपी टीमने फिनटेक समस्यांवरील उपायांबद्दल उत्कृष्ट कामगिरी केली. उपविजेते एमआयटी डब्ल्यूपीयूचा बिआँड बिट्स आणि द्वितीय उपविजेते मणिपाल युनिव्हर्सिटीचा ट्रायस्टॅक ओव्हरफ्लो या दोन्ही संघांनी एसएमईओ2 (SME O2) आव्हानामध्ये आपली क्षमता सिद्ध केली. या स्पर्धेत नागपूर येथील वायसीसीईच्या लास्ट मिनिट चूस आणि पुणे येथील डीईएस विद्यापीठातील माइंड फ्रॉग या दोन संघांना विशेष कौतुक पुरस्काराने सन्मानित करण्यात आले. त्यांना शिक्षण, आरोग्यसेवा आणि लघु व मध्यम उद्योग (SME) क्षेत्रांमधील समस्यांवर दिलेल्या निराकरणाबद्दल गौरवण्यात आले. या राष्ट्रीय स्तरावरील स्पर्धेत पुणे, मुंबईसह तमिळनाडू, कर्नाटक, गोवा, गुजरात आणि तेलंगणा राज्यातील संघांनी उत्साहाने सहभाग घेतला होता. देशभरातील कुशाग्र विद्यार्थी संशोधक एकाच व्यासपीठावर एकत्र आले होते. स्पर्धेत सहभागी संघांना वेळेच्या मर्यादेत वास्तविक जगातील समस्या सोडवण्यासाठी कृत्रिम बुद्धिमत्तेवर आधारित उपाययोजना तयार करण्याचे आव्हान देण्यात आले होते. स्पर्धेच्या 18 तास आधी समस्या विधाने जाहीर करण्यात आली होती. आरोग्यसेवा, शिक्षण, फिनटेक, शाश्वतता, स्मार्ट सिटी उपाययोजना आणि लघु व मध्यम उद्योगांसाठी उपयुक्त साधने यांसारख्या विविध क्षेत्रांतील समस्यांचा यात समावेश होता. नाविन्य, तांत्रिक सखोलता, व्यावहारिक उपयुक्तता आणि सादरीकरणाचा दर्जा या निकषांवर संघांचे मूल्यांकन करण्यात आले. या कार्यक्रमाला उद्योग क्षेत्रातील वरिष्ठ संचालक स्वाती सादिनेनी, संजय पटवर्धन, अनीश नाथानी आणि सारंग कमलाकर यांसारखे तज्ज्ञ उपस्थित होते. एमआयटी डब्ल्यूपीयूचे अधिष्ठाता डॉ. सिद्धार्थ चक्रवर्ती, डॉ. बी.एम.पाटील, डॉ. रोहिणी काळे, डॉ. ज्योती मांटे, डॉ. शर्मिष्ठा देसाई आणि विद्यार्थी समन्वयक विवान माथूर यांनीही या कार्यक्रमाला उपस्थिती लावली.



Source link