सातारा जिल्ह्यातील कराड तालुक्यातील तळबीड येथील महावितरणच्या उपकेंद्रात एका बिबट्याचा विजेच्या तीव्र धक्क्याने दुर्दैवी मृत्यू झाल्याची घटना उघडकीस आली आहे. शिकार किंवा भक्ष्याच्या शोधात उपकेंद्राच्या परिसरात शिरलेल्या बिबट्याने उच्च दाबाच्या विद्युत यंत्रणेवर उडी घेतल्याने हा अपघात घडला. या घटनेमुळे परिसरात काही काळ खळबळ उडाली असून, वन्यजीवांच्या सुरक्षिततेबाबत पुन्हा एकदा प्रश्नचिन्ह निर्माण झाले आहे. सातारा परिमंडलातील कराड विभागांतर्गत येणाऱ्या उंब्रज उपविभागातील तळबीड उपकेंद्रामध्ये ही घटना घडली. महावितरणच्या ‘एमआयडीसी-४’ फीडरच्या आयसोलेटरवर बिबट्याने अचानक उडी मारली. उच्च दाबाच्या विद्युत प्रवाहाचा संपर्क होताच मोठा स्फोट झाला आणि बिबट्याचा जागीच मृत्यू झाला. विजेच्या तीव्र धक्क्यामुळे त्याला बचावाची कोणतीही संधी मिळाली नाही. काही काळ वीजपुरवठा विस्कळीत या दुर्घटनेनंतर तळबीड आणि परिसरातील वीजपुरवठा काही काळासाठी खंडित झाला. घटनेची माहिती मिळताच महावितरणच्या कर्मचाऱ्यांनी तातडीने वीजपुरवठा बंद करून परिस्थिती नियंत्रणात आणली. त्यानंतर तांत्रिक पथकाने आवश्यक दुरुस्तीचे काम हाती घेत वीजपुरवठा पूर्ववत केला. वनविभागाची तातडीने घटनास्थळी धाव महावितरणने घटनेची माहिती वनविभागाला दिल्यानंतर वन अधिकाऱ्यांनी घटनास्थळी भेट देत पंचनामा केला. मृत बिबट्याचा मृत्यू विजेच्या धक्क्यामुळे झाल्याची प्राथमिक नोंद करण्यात आली असून, पुढील प्रक्रिया वनविभागाकडून करण्यात आली. ही घटना मंगळवारी मध्यरात्रीनंतर ते बुधवारी पहाटेच्या सुमारास घडल्याचे सांगण्यात आले. वन्यजीव-मानवी संघर्ष पुन्हा चर्चेत सह्याद्री परिसरालगतच्या भागात अन्न आणि पाण्याच्या शोधात बिबटे अनेकदा मानवी वस्त्यांच्या जवळ येत असल्याच्या घटना सातत्याने समोर येत आहेत. यामुळे अपघात, मानवी संघर्ष आणि वन्यजीवांच्या मृत्यूच्या घटनांमध्ये वाढ होत असल्याची चिंता व्यक्त केली जात आहे. तळबीडमधील ही घटना त्याच समस्येचे आणखी एक गंभीर उदाहरण मानली जात आहे. स्थानिकांकडून हळहळ व्यक्त या दुर्घटनेमुळे महावितरणचे तांत्रिक नुकसान झाले असले, तरी एका दुर्मिळ वन्यप्राण्याचा अशा प्रकारे मृत्यू झाल्याने स्थानिक नागरिक आणि प्राणीप्रेमींनी हळहळ व्यक्त केली आहे. वन्यजीवांचा मानवी वस्त्यांशी वाढता संपर्क कमी करण्यासाठी आणि अशा दुर्घटना टाळण्यासाठी वनविभाग व संबंधित यंत्रणांनी दीर्घकालीन उपाययोजना करण्याची गरज असल्याची मागणीही परिसरातून होत आहे. हे ही वाचा… खासगी आस्थापनांवरच कारवाई का?:तुकाराम मुंढेंच्या FDA च्या कारवाईवर हायकोर्टाचे ताशेरे, मंत्र्यांच्या आस्थापनांचीही तपासणी करण्याचे निर्देश राज्यात गेल्या काही महिन्यांपासून अन्न व औषध प्रशासनाने (एफडीए) अन्न सुरक्षा नियमांच्या अंमलबजावणीसाठी मोठ्या प्रमाणावर धडक कारवाई सुरू केली आहे. पानटपऱ्यांपासून ते पंचतारांकित हॉटेलांपर्यंत अनेक आस्थापनांवर कारवाई करण्यात आली. मात्र, या कारवाईच्या पद्धतीवरच आता मुंबई उच्च न्यायालयाने गंभीर प्रश्नचिन्ह उपस्थित केले आहे. खासगी आस्थापनांवरच कठोर कारवाई करण्याऐवजी सरकारी आणि मंत्र्यांच्या मालकीच्या आस्थापनांचीही तपासणी करा, असे स्पष्ट निर्देश न्यायालयाने एफडीएला दिले आहेत. सविस्तर वाचा… राज्य शासनाचे प्रतिष्ठेचे चित्रपट पुरस्कार जाहीर:पं. हृदयनाथ मंगेशकर, सलीम खान यांना जीवनगौरव; राणी मुखर्जी, प्रसाद ओक यांचाही सन्मान महाराष्ट्र शासनाच्या सांस्कृतिक कार्य विभागाकडून दरवर्षी दिल्या जाणाऱ्या चित्रपट क्षेत्रातील प्रतिष्ठेच्या व्ही. शांताराम आणि राज कपूर पुरस्कारांची यंदाची घोषणा करण्यात आली आहे. भारतीय चित्रपटसृष्टीत दीर्घकाळ उल्लेखनीय योगदान देणाऱ्या दिग्गज कलाकारांचा यंदा या पुरस्कारांद्वारे गौरव करण्यात येणार असून, ज्येष्ठ संगीतकार पं. हृदयनाथ मंगेशकर आणि हिंदी चित्रपटसृष्टीतील दिग्गज पटकथालेखक सलीम खान यांना जीवनगौरव पुरस्कार जाहीर झाला आहे. तर मराठी चित्रपटसृष्टीतील हरहुन्नरी अभिनेता-दिग्दर्शक प्रसाद ओक आणि हिंदी चित्रपटसृष्टीतील आघाडीची अभिनेत्री राणी मुखर्जी यांची विशेष योगदान पुरस्कारासाठी निवड करण्यात आली आहे. सविस्तर वाचा…
Source link
कराडजवळ वीज उपकेंद्रात बिबट्याचा करुण अंत:आयसोलेटरवर उडी मारल्याने विजेच्या धक्क्याने मृत्यू, वनविभागाकडून पंचनामा
