चिखलदरा तालुक्यातील मूळ रहिवासी एका व्यक्तीच्या परतवाडा येथील हरिद्वारनगरातील घरात घरफोडी करून चोरट्याने सोन्या-चांदीचे १,४६१ ग्रॅमचे दागिने व रोकड असा ऐवज लंपास केला. ही घटना शनिवारी २० जूनला उघडकीस आली. मधुकर धांडेकर यांच्या घरी ही चोरी झाली. धांडेकर यांची प्रकृती बिघडल्याने त्यांना परतवाड्यातील एका खासगी रुग्णालयात दाखल केले होते. मुख्य दरवाज्याचे कुलूप तोडून घरात प्रवेश केला. २० जूनला सकाळी धांडेकर यांच्या पत्नी घरी परतल्यानंतर घरफोडी झाल्याचे निदर्शनास आले. चोरट्याने घरातील साहित्य अस्ताव्यस्त फेकून दिले होते. गव्हाच्या कोठीत ठेवलेली ३६,५०० रुपयांची रोकड लोखंडी पेटीत ठेवलेले सोन्या-चांदीचे दागिने चोरून नेले. यात ९१ ग्रॅम सोन्याचे दागिने असून, त्यामध्ये सोन्याच्या बांगड्या, निंबोळी मण्यांची पोत, दोन अंगठ्या, कानातील रिंग व लटकन यांचा समावेश आहे. सुमारे १,३७० ग्रॅम चांदीचे दागिने, त्यात ५०० ग्रॅमची तगडी, १२० ग्रॅमच्या तोरड्या, ७५० ग्रॅमचे पायातील कडे यांचा समावेश आहे. एकूण १,४६१ ग्रॅमचे सोन्या-चांदीचे दागिने व रोकड असा सुमारे ७ लाख ५,५०० रुपयांचा ऐवज चोरीस गेला. नोंद पोलिसांनी केली आहे. सोन्या-चांदीच्या दागिन्यांची किंमत सुमारे १५ लाखापर्यंत आहे.
Source link
घरमालक रुग्णालयात, 1461 ग्रॅम सोन्या-चांदीचे दागिने लंपास:36,500 ची रोकडही पळवली, हरिद्वारनगरातील घटना
