जगातील सर्वात उंच पुलावरून 100 किमी प्रतितास वेगाने धावली ट्रेन:रेल्वेने जम्मू-श्रीनगर वंदे भारतचा व्हिडिओ पोस्ट केला; हा पूल आयफेल टॉवरपेक्षा 35 मीटर उंच

भारतीय रेल्वेने जम्मू-काश्मीरमध्ये ११७८ फूट उंचीवर बांधलेल्या जगातील सर्वाधिक उंच चिनाब रेल्वे पुलावरून वंदे भारत एक्सप्रेस ताशी १०० किमी वेगाने यशस्वीपणे पार केली. इतकेच नव्हे, तर वंदे भारत एक्सप्रेसने भारतातील पहिल्या केबल-स्टे प्रकारातील अंजी पुलावरूनही ताशी १०० किमी वेगाने प्रवास केला. केंद्रीय रेल्वेमंत्री अश्विनी वैष्णव यांनी याचा व्हिडिओ शेअर करून हा ऐतिहासिक क्षण असल्याचे म्हटले. या यशस्वी चाचणीनंतर १११ किलोमीटर लांबीच्या श्री माता वैष्णोदेवी कटरा-बनिहाल मार्गावरील कमाल रेल्वे वेग ताशी ७५ किमीवरून ताशी १०० किमी करण्यात आला आहे. — Ashwini Vaishnaw (@AshwiniVaishnaw) २ ऑक्टोबर २०२६ सोशल मीडिया प्लॅटफॉर्म ‘एक्स’वरील एका पोस्टमध्ये रेल्वेमंत्री अश्विनी वैष्णव यांनी म्हटले- आजचा दिवस ऐतिहासिक आहे. आज वाढीव वेगाची यशस्वी चाचणी घेण्यात आली. वंदे भारत एक्सप्रेसने जगातील सर्वाधिक उंचीवरील चिनाब पूल आणि भारतातील पहिला केबल-स्टे असलेला अंजी पूल 100 किमी प्रतितास वेगाने पार करून नवा विक्रम प्रस्थापित केला. यामुळे यूएसबीआरएल प्रकल्पावर रेल्वेगाडीचे संचालन सुलभ होईल, प्रवासाचा वेळ कमी होईल आणि प्रवाशांना जलद, सुरक्षित व आरामदायी प्रवासाचा अनुभव मिळेल. जम्मू-श्रीनगरदरम्यान 2 मे 2026 पासून वंदे भारत सुरू झाली होती जून 2025 मध्ये काश्मीर रेल्वे लिंकचे काम पूर्ण झाल्यानंतर वंदे भारत एक्सप्रेस सुरुवातीला कटरा आणि श्रीनगरदरम्यान चालवण्यात आली होती. एप्रिल 2026 मध्ये ती जम्मू तवीपर्यंत वाढवण्यात आली. तसेच ट्रेनमधील डब्यांची संख्या आठवरून 20 करण्यात आली. रेल्वे मंत्रालयानुसार, जम्मू-श्रीनगरदरम्यान नियमित सेवा २ मे रोजी सुरू झाली. रेल्वे मंत्रालयाने ऑगस्टमध्ये सांगितले होते की, आता सुमारे ८१% नेटवर्क ११० किमी प्रतितास किंवा त्याहून अधिक वेगासाठी अपग्रेड करण्यात आले आहे. २०१४ मध्ये हा आकडा सुमारे ४०% होता. चिनाब ब्रिज – जगातील सर्वात उंच रेल्वे पूल कटरा-बनिहाल सेक्शन २७२ किलोमीटर लांबीच्या USBRL चा भाग आहे. हा संपूर्ण लिंक जून २०२५ मध्ये सुरू झाला होता. चिनाब रेल्वे पूल नदीपात्रापासून ३५९ मीटर उंचीवर बांधण्यात आला असून त्याची लांबी १,३१५ मीटर आहे. जगातील सर्वात उंच रेल्वे पूल ‘चिनाब ब्रिज’ भूकंप, पूर, बर्फवृष्टी आणि स्फोटकांपासून संरक्षण करण्यासाठी विशेष पद्धतीने तयार करण्यात आला आहे. ब्रिजचा परिसर भूकंपाच्या चौथ्या विभागात येतो, मात्र तो भूकंपाच्या पाचव्या विभागासाठी डिझाइन करण्यात आला आहे. म्हणजेच भूकंपाच्या दृष्टीने तो अत्यंत सुरक्षित आहे आणि रिश्टर स्केलवर ८ तीव्रतेचा भूकंपही सहजपणे सहन करू शकेल. हा ब्रिज पुढील १२० वर्षांसाठी बांधण्यात आला आहे. अंजी ब्रिज- भारतातील पहिला केबल-स्टे रेल्वे ब्रिज त्याचप्रमाणे अंजी ब्रिज हा भारतातील पहिला केबल-स्टे रेल्वे ब्रिज आहे. अंजी नदीच्या खोऱ्यावर बांधलेला हा पूल कटरा आणि बनिहालदरम्यान स्थित आहे. या मार्गावर देशातील सर्वात लांब कार्यरत वाहतूक बोगदाही आहे, जो १२.७७ किमी लांब आहे.



Source link