सहकार विभागाच्या पथकाने नांदगाव खंडेश्वरमध्ये अवैध सावकारीच्या संशयावरून तीन ठिकाणी धाड घातली. या कारवाईत १३ संशयास्पद दस्तऐवज जप्त करण्यात आले. नागरिकांच्या तक्रारींनंतर ही कारवाई करण्यात आली. विभागीय सहनिबंधक गौतम वर्धन यांच्या आदेशानुसार आणि जिल्हा उपनिबंधक राजेश भुयार यांच्या मार्गदर्शनाखाली तीन विशेष पथके नेमण्यात आली होती. पहिल्या पथकाने श्रीकृष्ण विठ्ठलराव सोळंके यांच्या नांदगाव खंडेश्वर येथील ‘शुभम ज्वेलर्स’ आणि घराची झडती घेतली. हे दुकान बुधवारा चौकात आहे. या झडतीत अवैध सावकारीशी संबंधित संशयास्पद दस्तऐवज आढळले नाहीत. दुसऱ्या पथकाने सोळंके यांच्या दुसऱ्या घराची सकाळी ११.३५ ते दुपारी २.१० या वेळेत झडती घेतली. तिथे अवैध सावकारीशी संबंधित १३ संशयास्पद दस्तऐवज आढळले. पथकाने हे दस्तऐवज सील केले. तिसऱ्या पथकाने सहायक निबंधक रोहिणी विटणकर यांच्या नेतृत्वाखाली अकोल्यातील खदान पोलीस ठाण्याच्या हद्दीत एका महिला गैरअर्जदाराच्या घरी झडती घेतली. दुपारी १२.२० ते १२.५० या वेळेत झालेल्या झडतीत आक्षेपार्ह दस्तऐवज आढळले नाहीत. जप्त कागदपत्रांची महाराष्ट्र सावकारी (नियमन) अधिनियम २०१४ मधील तरतुदींनुसार पडताळणी केली जाणार आहे. गौतम वर्धन आणि राजेश भुयार यांच्या मार्गदर्शनाखाली ही पडताळणी होईल. त्यासाठी सहायक निबंधक सचिन पतंगे यांची नियुक्ती करण्यात आली आहे. अवैध सावकारी करणाऱ्यांवर पुढेही अशा कारवाया सुरू राहतील, असे प्रशासनाने सांगितले.
Source link
नांदगाव खंडेश्वरमध्ये अवैध सावकारीच्या संशयावरून धाड:तीन ठिकाणी झडती; 13 संशयास्पद दस्तऐवज जप्त, कागदपत्रांची पडताळणी होणार
