नागपूर जिल्हा परिषदेच्या ‘प्रोजेक्ट ड्रिम’ उपक्रमाची दखल भारतीय टपाल विभागाने घेतली आहे. विद्यार्थ्यांमध्ये वाचनाची गोडी वाढवण्यासाठी आणि नागरिकांमध्ये जनजागृती निर्माण करण्यासाठी हा उपक्रम सुरू करण्यात आला होता. टपाल विभाग आणि जिल्हा परिषद नागपूर यांच्या संयुक्त विद्यमाने या उपक्रमावर आधारित एका विशेष वाहतूक कव्हरचे नुकतेच प्रकाशन करण्यात आले. या ऐतिहासिक उपक्रमाची सुरुवात नागपूरच्या शंकर नगर टपाल कार्यालयातून झाली. नागपूर विभागाचे सहाय्यक संचालक डाक सेवा अतुल काळे यांनी हे विशेष कव्हर्स महिला पोस्टमन कु. प्राची वाघमारे यांच्याकडे सुपूर्द करून या विशेष वाहतुकीचा शुभारंभ केला. यानंतर, ज्ञानाचा प्रसार आणि शैक्षणिक जागरूकतेचा संदेश देणारा जिल्हा परिषदेचा खास “ज्ञानरथ” रस्त्यावर धावला. शंकर नगर टपाल कार्यालयापासून निघालेला हा ज्ञानरथ जिल्हा परिषद नागपूर कार्यालयात पोहोचल्यानंतर, मुख्य कार्यकारी अधिकारी विनायक महामुनी यांच्या हस्ते या विशेष वाहतूक कव्हरचे औपचारिक प्रकाशन करण्यात आले. एखाद्या शासकीय लोककल्याणकारी प्रकल्पाला प्रोत्साहन देण्यासाठी जिल्हा परिषद आणि भारतीय टपाल विभागाने एकत्र येण्याची नागपूरमधील ही पहिलीच वेळ आहे. केवळ नागपूरच नव्हे, तर संपूर्ण देशात अशा प्रकारचा समन्वय आणि सहकार्य अभिनव मानले जात आहे.
या सोहळ्याला अतिरिक्त मुख्य कार्यकारी अधिकारी डॉ. कमलकिशोर फुटाणे, उपमुख्य कार्यकारी अधिकारी कपील काळोडे, उपशिक्षणाधिकारी निखिल भुयार, शिक्षणाधिकारी निलेश गुंड, मुख्यमंत्री फेलो वेदांत पाठक, नागपूर जीपीओचे वरिष्ठ पोस्टमास्तर सुजितकुमार लांडगे यांच्यासह टपाल विभाग व जिल्हा परिषदेचे अनेक वरिष्ठ अधिकारी व नागरिक मोठ्या संख्येने उपस्थित होते. ज्ञानरथातून प्रवास करून आलेले हे विशेष कव्हर फिलाटेलिस्ट (तिकीट संग्रहक), टपालप्रेमी, विद्यार्थी आणि नागरिकांसाठी आकर्षणाचे केंद्र ठरत आहे. या उपक्रमाला संपूर्ण जिल्ह्यातून उत्स्फूर्त प्रतिसाद मिळण्याची अपेक्षा व्यक्त केली जात आहे.
Source link
