पिंपरी चिंचवड एज्युकेशन ट्रस्टच्या रावेत येथील पिंपरी चिंचवड कॉलेज ऑफ इंजिनिअरिंग अँड रिसर्च (PCCOER) च्या कॉम्प्युटर इंजिनिअरिंग विभागातर्फे ‘डिजिटल वेलनेस’ या विषयावर राज्यस्तरीय कार्यशाळा आयोजित करण्यात आली होती. या कार्यशाळेत मानसशास्त्रीय समुपदेशक प्रा. शिल्पा संधाने यांनी डिजिटल वापराच्या समस्यांवर जागरूकता आणि उपायांवर मार्गदर्शन केले. तंत्रज्ञान युगात डिजिटल वेलनेसची मूलभूत संकल्पना आणि त्याचे दैनंदिन जीवनातील महत्त्व समजून घेणे आवश्यक आहे, असे प्रा. संधाने म्हणाल्या. मोबाईल, इंटरनेट आणि सोशल मीडियाच्या वाढत्या वापरामुळे शारीरिक आणि मानसिक आरोग्यावर नकळत परिणाम होत आहेत. अनेकजण डिजिटल वस्तूंच्या वापराचे व्यसनी झाले आहेत, ज्यामुळे डिजिटल वापराच्या समस्यांवर जागरूकता विकसित होणे गरजेचे आहे. प्रा. संधाने यांनी सांगितले की, जास्त स्क्रीन टाइम, सोशल मीडियावर अवलंबित्व, एकाग्रतेत घट आणि झोपेचे विकार यांसारख्या समस्या उद्भवत आहेत. यामुळे सुसंवाद कमी होऊन नात्यांमध्ये दुरावा निर्माण होतो, तसेच सहनशीलता आणि संवेदनशीलता कमी होऊन कुटुंबात भांडणे वाढत आहेत. यावर उपाय म्हणून, स्क्रीन टाइमवर नियंत्रण ठेवणे, डिजिटल डिटॉक्सचा अवलंब करणे, वेळेचे योग्य नियोजन करून ऑफलाइन उपक्रमांना प्राधान्य देणे आणि सोशल मीडियाचा मर्यादित व सजग वापर करणे आवश्यक आहे, असे मानसशास्त्रीय समुपदेशक प्रा. संधाने यांनी मार्गदर्शन केले. सावित्रीबाई फुले पुणे विद्यापीठाच्या गुणवत्ता सुधार योजनेअंतर्गत ही एकदिवसीय राज्यस्तरीय कार्यशाळा पार पडली. यावेळी प्रा. वृंदा आंबेकर, पीसीसीओईआरचे संचालक व प्राचार्य डॉ. हरीश तिवारी, उपसंचालक प्रा. डॉ. राहुल मापारी, अकॅडमिक डीन डॉ. अर्चना चौगुले, कॉम्प्युटर विभाग प्रमुख डॉ. विजय कोतकर, प्राध्यापक आणि विद्यार्थी उपस्थित होते.
Source link
पीसीसीओईआरमध्ये 'डिजिटल वेलनेस' कार्यशाळा संपन्न:प्रा. संधाने यांनी डिजिटल वापराच्या समस्यांवर मार्गदर्शन केले
