पुण्यातील विजयाच्या पार्श्वभूमीवर जयंत पाटलांचा मोदींना टोला:‘बॅलेटवर निवडणुका घ्यायला हरकत नाही, विधानसभा-लोकसभाही बॅलेटवर घ्या’

विधानपरिषद निवडणुकीत पुणे पदवीधर आणि मराठवाडा पदवीधर मतदारसंघात शरद पवार यांच्या राष्ट्रवादी काँग्रेसच्या उमेदवारांनी विजय मिळवल्यानंतर पक्षाचे ज्येष्ठ नेते जयंत पाटील यांनी सत्ताधाऱ्यांवर निशाणा साधला. बॅलेट पेपरवर मतदान झाल्यानंतर विरोधी पक्षाला विजय मिळत असल्याचे पुन्हा दिसून आले, असे म्हणत त्यांनी पंतप्रधान नरेंद्र मोदी यांच्या भूमिकेवर उपरोधिक भाष्य केले. तसेच, देशात विधानसभा आणि लोकसभेच्या निवडणुकाही बॅलेट पेपरवर घेण्याबाबत केंद्र सरकारने निवडणूक आयोगाला सूचना कराव्यात, असे आव्हान त्यांनी दिले. पुणे पदवीधर मतदारसंघातून हर्षदा देशमुख-जाधव यांनी विजय मिळवाला या यशानंतर आयोजित पत्रकार परिषदेत जयंत पाटील यांनी बेरोजगारी, महागाई, स्पर्धा परीक्षांमधील अडचणी, शिक्षक मतदारसंघातील पराभव, नितेश कराळे मास्तर यांच्यावरील कारवाई आणि महाविकास आघाडीतील समन्वय अशा विविध मुद्द्यांवर भूमिका मांडली. योग्य उमेदवार, कार्यकर्त्यांची मेहनत आणि आघाडीचे एकत्रित प्रयत्न यांमुळे विजय मिळाल्याचे त्यांनी सांगितले. बेरोजगारी, महागाई आणि स्पर्धा परीक्षांमधील नाराजी मतदानातून व्यक्त विधानपरिषद निवडणुकीतील निकाल हा सरकारच्या धोरणांविरोधात जनतेने व्यक्त केलेला कौल असल्याचे जयंत पाटील यांनी म्हटले. देशात आणि महाराष्ट्रात वाढलेली बेरोजगारी, महागाई तसेच युवकांना स्पर्धा परीक्षांमध्ये येणाऱ्या अडचणींमुळे तरुणांमध्ये नाराजी निर्माण झाली आहे. ही नाराजी पश्चिम महाराष्ट्र आणि मराठवाड्यातील पदवीधर मतदारांनी मतदानातून व्यक्त केल्याचा दावा त्यांनी केला. पदवीधर मतदारसंघातील निकालांचे महत्त्व स्पष्ट करताना पाटील म्हणाले की, समाजात आणि सामान्य नागरिकांमध्ये ज्या भावना असतात, त्यांचे प्रतिबिंब अशा निवडणुकांमध्ये दिसते. सत्ताधाऱ्यांच्या धोरणांबद्दल नागरिकांना आलेले अनुभव त्यांच्या मतदानातून व्यक्त होऊ शकतात. त्यामुळे सरकारने या निकालाकडे केवळ राजकीय विजय किंवा पराभव म्हणून न पाहता, युवकांनी दिलेला इशारा म्हणून पाहिले पाहिजे. विशेष म्हणजे, मराठवाड्यात शरद पवार यांच्या राष्ट्रवादी काँग्रेसचे उमेदवार डॉ. प्रतापसिंह पाटील यांच्यासमोर अजित पवार गटाचे सतीश चव्हाण यांचे आव्हान होते. राष्ट्रवादीच्या दोन गटांमधील या लढतीत प्रतापसिंह पाटील यांनी विजय मिळवल्याने या निकालाची राजकीय चर्चा अधिक रंगली आहे. ‘बॅलेटवर निवडणुका झाल्या की विरोधी पक्ष जिंकतो’ मतमोजणीसाठी 30 तासांहून अधिक वेळ लागल्याबाबत पत्रकारांनी प्रश्न विचारला असता जयंत पाटील यांनी प्रशासनाची बाजू घेतली. या निवडणुकीत अनेक उमेदवार होते आणि मतपत्रिकेवर मोठ्या संख्येने नावे असल्याने मतमोजणीची प्रक्रिया वेळखाऊ ठरली. एखाद्या उमेदवाराला कमी मते मिळाली तरी त्याची मते मोजावी लागतात. त्यामुळे मतमोजणीला वेळ लागल्याबद्दल अधिकाऱ्यांना दोष देणार नसल्याचे त्यांनी स्पष्ट केले. मात्र, याचवेळी त्यांनी बॅलेट पेपरवरील मतदानाचा संदर्भ देत सत्ताधाऱ्यांना टोला लगावला. बॅलेट पेपरवर मतदान झाले की विरोधी पक्षाचा विजय होतो, हे पुन्हा एकदा सिद्ध झाल्याचे आपल्याला वाटत असल्याचे ते म्हणाले. पत्रकारांनी पंतप्रधान नरेंद्र मोदी यांच्या एका सोशल मीडिया पोस्टचा संदर्भ देत प्रश्न विचारला. वेगवेगळ्या राज्यांतील विधानपरिषद निवडणुकांच्या निकालांवर भाष्य करताना मोदी यांनी बॅलेट पेपरवरील निवडणुका आणि काँग्रेसच्या कामगिरीचा उल्लेख केल्याचे पत्रकारांनी सांगितले. त्यावर प्रतिक्रिया देताना जयंत पाटील म्हणाले, “मोदी साहेबांचं मी स्वागत करतो. आता देशात बॅलेटवर निवडणुका घेण्यास काही हरकत नाही.” त्यांनी पुढे उपरोधिकपणे सांगितले की, पंतप्रधानांनीच निवडणूक आयोगाला सूचना कराव्यात आणि यापुढे विधानसभा तसेच लोकसभेच्या निवडणुकाही बॅलेट पेपरवर घ्याव्यात. या विधानातून जयंत पाटील यांनी निवडणूक प्रक्रियेवरून सुरू असलेल्या राजकीय चर्चेला पुन्हा हवा दिली. विधानपरिषद निवडणुकीतील निकालाचा आधार घेत त्यांनी विरोधकांच्या विजयाबाबत आपली भूमिका मांडली. कराळे मास्तरांच्या हकालपट्टीचा निर्णय योग्यच; जयंत पाटलांचे समर्थन नागपूर पदवीधर मतदारसंघातील निवडणुकीत नितेश कराळे मास्तर यांच्या भूमिकेबाबतही जयंत पाटील यांना प्रश्न विचारण्यात आले. महाविकास आघाडीच्या अधिकृत निर्णयाविरोधात भूमिका घेतल्यामुळे शरद पवार यांच्या राष्ट्रवादी काँग्रेसने कराळे मास्तर यांची सहा वर्षांसाठी पक्षातून हकालपट्टी केली होती. कराळे मास्तर यांच्या बंडखोरीमुळे नागपूरची जागा महाविकास आघाडीच्या हातातून गेली का, तसेच त्यांच्यावर कारवाई करण्याचा निर्णय चुकीचा ठरला का, असा प्रश्न पत्रकारांनी उपस्थित केला. यावर जयंत पाटील यांनी कारवाईचा निर्णय योग्य असल्याचे सांगितले. महाविकास आघाडीने निवडणुकीसंदर्भात निर्णय घेतला होता. त्याविरोधात एखाद्या व्यक्तीने बंडखोरी केली आणि काँग्रेस व राष्ट्रवादी काँग्रेसच्या नेत्यांबद्दल टोकाची मते व्यक्त केली, त्यामुळे पक्षाने कारवाई केल्याचे त्यांनी स्पष्ट केले. कराळे मास्तर निवडणुकीत उभे राहिले, हा त्यांचा निर्णय होता. मात्र, त्यांच्या उमेदवारीचा अंतिम निकालावर नेमका काय परिणाम झाला, हे निकाल स्पष्ट झाल्यानंतरच समजू शकेल, असे पाटील म्हणाले. यावेळी त्यांनी दुसऱ्या पसंतीच्या मतांनाही महत्त्व असल्याचे नमूद केले. शिक्षक मतदारसंघात आमिषांचे प्रयोग झाल्याचा आरोप पाच विधानपरिषद जागांच्या निवडणुकीत काँग्रेसला एकाही जागेवर विजय मिळवता आला नाही. शिक्षक मतदारसंघातील पराभव आणि महाविकास आघाडीतील एकवाक्यतेबाबत जयंत पाटील यांना प्रश्न विचारण्यात आला. त्यावर त्यांनी सर्व ठिकाणी वेगवेगळ्या प्रकारचे प्रयोग झाल्याचा आरोप केला. शिक्षक मतदारसंघात मोठ्या प्रमाणात अशा प्रकारचे प्रयत्न झाल्याचे आपण ऐकल्याचे त्यांनी सांगितले. पदवीधर मतदारसंघातही मतदारांना आमिषे दाखवण्याचे प्रयत्न झाल्याचा दावा त्यांनी केला. मात्र, पदवीधर मतदारांनी आपल्याला योग्य वाटणाऱ्या उमेदवाराच्या पाठीशी ठामपणे उभे राहण्याची भूमिका घेतल्याचे सांगत त्यांनी मतदारांचे कौतुक केले. शिक्षक मतदारसंघात मतदारांची संख्या तुलनेने कमी असल्यामुळे तेथील निकालावर विविध घटकांचा परिणाम होऊ शकतो, असेही त्यांनी सूचित केले. शिक्षक मतदारसंघातील महाविकास आघाडीचे उमेदवार जयंत आसगावकर यांनी चांगले प्रयत्न केले होते. त्यांचा मतदारांशी चांगला संपर्क होता. मात्र, निवडणुकीत मतदारांनी दुसऱ्या उमेदवाराला पसंती दिली, असे पाटील यांनी सांगितले. रासपचे उमेदवार दत्ता सावंत यांच्यासह अन्य उमेदवारांमुळे विरोधी मतांचे विभाजन झाले का, असा प्रश्नही उपस्थित झाला. यावर पाटील यांनी एकूण पाच प्रमुख उमेदवारांनी अधिक मते मिळवल्याचे सांगितले. मात्र, मतविभाजनामुळे कोणाला किती फायदा झाला, याबाबत सविस्तर आकडेवारी तपासणे आवश्यक असल्याचे त्यांनी सूचित केले. गोकुळच्या निवडणुकीचा कोल्हापुरात फायदा झाल्याचा दावा कोल्हापूरमधील गोकुळच्या निवडणुकीचा विधानपरिषद निवडणुकीवर परिणाम झाला का, असा प्रश्न जयंत पाटील यांना विचारण्यात आला. यावेळी त्यांनी काँग्रेस नेते सतेज ऊर्फ बंटी पाटील यांच्या सहकार्याचा उल्लेख केला. गोकुळच्या निवडणुकीमुळे कोल्हापूर जिल्ह्यातील राजकीय वातावरण महाविकास आघाडीसाठी अधिक सकारात्मक झाल्याचे पाटील म्हणाले. हर्षदा देशमुख यांच्या प्रचारात बंटी पाटील यांनी सुरुवातीपासून सहकार्य केले. पहिल्याच सभेत त्यांनी हर्षदा यांच्या प्रचाराची भूमिका स्पष्ट केली होती आणि त्यानंतरही त्यांच्या भागात शक्य ते सहकार्य केले, असे त्यांनी सांगितले. या विधानातून स्थानिक राजकीय समीकरणे आणि विविध नेत्यांच्या सहकार्याचा निवडणुकीतील वातावरणावर परिणाम होत असल्याचे पाटील यांनी अधोरेखित केले. ‘अब्दुल सत्तारांनी नाराजी व्यक्त केली; मदत केली असे म्हणणे योग्य नाही’ मराठवाड्यातील निवडणुकीत शिवसेना शिंदे गटाच्या काही नेत्यांनी प्रतापसिंह पाटील यांना छुपा पाठिंबा दिल्याची चर्चा होती. माजी मंत्री अब्दुल सत्तार यांनी राष्ट्रवादीच्या उमेदवाराला पाठिंबा असल्याचे म्हटल्याचा संदर्भ पत्रकारांनी दिला. यावर जयंत पाटील यांनी अब्दुल सत्तार यांनी आपल्याशी फोनवर संपर्क साधल्याचे सांगितले. संबंधित मतदारसंघातील दुसरा उमेदवार त्यांना पसंत नसल्यामुळे त्यांनी नाराजी व्यक्त केली होती. मात्र, त्यांनी प्रत्यक्ष मदत केली, असे सांगणे योग्य ठरणार नाही, कारण आपण तसे काही प्रत्यक्ष पाहिलेले नाही, असे पाटील यांनी स्पष्ट केले. प्रतापसिंह पाटील यांच्या विजयाच्या जल्लोषात अब्दुल सत्तार यांना ‘किंगमेकर’ संबोधणारे फलक लावण्यात आल्याचा प्रश्न विचारण्यात आला. त्यावर पाटील यांनी मिश्किल प्रतिक्रिया देत, “आता एवढंच बाहेर कळलं असेल तर तुम्ही मला का प्रश्न विचारताय?” असे म्हटले. त्यांच्या या उत्तरानंतर उपस्थितांमध्ये हशा पिकला. पुणे पदवीधरची जागा मिळायला हवी होती, तटकरे यांच्या भूमिकेवर भाष्य पुणे पदवीधर मतदारसंघाची जागा राष्ट्रवादी काँग्रेसला मिळायला हवी होती, अशी भूमिका अजित पवार गटाचे प्रदेशाध्यक्ष सुनील तटकरे यांनी मांडल्याबाबतही जयंत पाटील यांना प्रश्न विचारण्यात आला. यावर पाटील यांनी युतीअंतर्गत जागावाटपाच्या चर्चेवर भाष्य करणे योग्य नसल्याचे सांगितले. मात्र, विधानसभेतील सदस्यसंख्येच्या दृष्टीने अजित पवार यांच्या राष्ट्रवादी काँग्रेसकडे अधिक आमदार आहेत. त्यामुळे तटकरे यांचे म्हणणे पूर्णपणे चुकीचे नाही, असेही त्यांनी नमूद केले. तरीही पुणे पदवीधर मतदारसंघातील निकाल हा मतदारांनी व्यक्त केलेल्या भूमिकेचे प्रतिबिंब असल्याचे पाटील यांनी सांगितले. जागावाटपावरून पक्षांमध्ये चर्चा होऊ शकते; परंतु प्रत्यक्ष निवडणुकीत मतदारांचा कौल महत्त्वाचा असतो, असे त्यांच्या वक्तव्यावरून स्पष्ट झाले. हर्षदा देशमुख म्हणाल्या, ‘जनतेने हातात घेतलेली निवडणूक’ पुणे पदवीधर मतदारसंघातील विजयानंतर हर्षदा देशमुख-जाधव यांनीही पत्रकारांशी संवाद साधला. मतमोजणीसाठी लागलेल्या वेळेबाबत बोलताना त्यांनी पसंतीक्रमानुसार मतदानाची प्रक्रिया वेळखाऊ असल्याचे सांगितले. या निवडणुकीत विजयासाठी आवश्यक असलेला 1 लाख 13 हजार मतांचा कोटा पूर्ण केल्याचे त्यांनी सांगितले. मोठ्या मताधिक्याने हा कोटा पूर्ण झाल्याचा आनंद असल्याचेही त्यांनी नमूद केले. “बॅलेट पेपरवर निवडणूक झाल्यानंतर काय होतं, हे आपल्याला यामध्ये बघायला मिळालं,” असे म्हणत त्यांनीही सत्ताधाऱ्यांवर अप्रत्यक्ष टीका केली. या निवडणुकीत पक्षाचे नेते, बूथ एजंट आणि कार्यकर्त्यांनी मोठ्या प्रमाणात मेहनत घेतली. प्रत्येक कार्यकर्ता आपल्यापेक्षाही अधिक उत्साहाने काम करत होता. ही निवडणूक जनतेने हातात घेतली होती आणि त्यामुळे मोठा विजय मिळाल्याचा विश्वास असल्याचे देशमुख यांनी सांगितले. विजयाचा कोटा पूर्ण झाल्यानंतर अधिकृत प्रमाणपत्र मिळण्याची प्रक्रिया बाकी असल्याचेही त्यांनी स्पष्ट केले. पसंतीक्रमानुसार मतदानात आवश्यक कोटा पूर्ण करणाऱ्या उमेदवाराला विजयी घोषित केले जाते, असे त्यांनी सांगितले. ‘पश्चिम महाराष्ट्रातील नेत्यांचा करेक्ट कार्यक्रम?’ पत्रकार परिषदेत राष्ट्रवादी काँग्रेसने पश्चिम महाराष्ट्रातील राजकीय नेत्यांचा ‘करेक्ट कार्यक्रम’ केला का, असा प्रश्नही उपस्थित करण्यात आला. त्याला जयंत पाटील यांनी स्वतंत्रपणे थेट उत्तर दिले नसले, तरी त्यांच्या एकूण वक्तव्यांतून पुणे पदवीधर मतदारसंघातील विजयाचे महत्त्व स्पष्ट झाले. हर्षदा देशमुख यांना शरद पवार यांनी उमेदवारी देऊन नव्या चेहऱ्यावर विश्वास दाखवला. पक्षाच्या कार्यकर्त्यांनी आणि महाविकास आघाडीतील सहकाऱ्यांनी एकत्रित प्रयत्न केले. त्यातून विजय मिळाल्याचे पाटील यांनी सांगितले. मराठवाड्यातही प्रतापसिंह पाटील यांच्या विजयामुळे राष्ट्रवादीच्या दोन्ही गटांतील संघर्षात शरद पवार गटाला महत्त्वाचे यश मिळाले. निकालातून सरकारला इशारा विधानपरिषद निवडणुकीतील पाच जागांपैकी तीन जागांवर महायुतीने विजय मिळवला, तर दोन जागांवर महाविकास आघाडीचे उमेदवार विजयी झाले. त्यामुळे एकूण जागांच्या संख्येत महायुतीने आघाडी घेतली असली, तरी पुणे आणि मराठवाड्यातील विजयामुळे शरद पवार यांच्या राष्ट्रवादी काँग्रेसला राजकीय बळ मिळाले. या निकालाचे विश्लेषण करताना जयंत पाटील यांनी बेरोजगारी, महागाई, स्पर्धा परीक्षांमधील अडचणी आणि सरकारच्या धोरणांबाबत तरुणांमध्ये असलेली नाराजी अधोरेखित केली. युवकांनी मतदानातून आपली भूमिका स्पष्ट केली असून सरकारने हा इशारा समजून घेतला पाहिजे, असे त्यांनी म्हटले. बॅलेट पेपरवरील मतदानावरून मोदी यांना केलेला टोला, कराळे मास्तरांच्या कारवाईचे समर्थन, शिक्षक मतदारसंघातील पराभवाबाबतची भूमिका आणि मराठवाड्यातील राजकीय समीकरणांवरील भाष्य यांमुळे ही पत्रकार परिषद चर्चेचा विषय ठरली. विधानपरिषद निवडणुकीतील या निकालांचा आगामी राजकारणावर काय परिणाम होतो, याकडे आता लक्ष लागले आहे. हेही वाचा…..
MLC निवडणूक- पुणे शिक्षक मतदारसंघातून भाजपचे कौस्तुभ गावडे विजयी:अमरावतीत शिवसेनेचे किरण सरनाईक विजयी; मराठवाड्यात मविआचे प्रतापसिंह पाटील आघाडीवर राज्यात झालेल्या पाच विधान परिषदेच्या निवडणुकीत महायुतीने पुणे व अमरावती शिक्षक मतदारसंघात विजय मिळवला आहे. तर महाविकास आघाडीच्या उमेदवार हर्षदा देशमुख-जाधव या पुणे पदवीधर मतदारसंघातून विजयी झाल्या आहे. मराठवाडा पदवीधर मतदारसंघातून महाविकास आघाडीचे प्रतापसिंह पाटील आघाडीवर आहेत. सविस्तर वाचा….



Source link