भंडारा-गोंदिया स्थानिक स्वराज्य संस्था विधान परिषद निवडणुकीच्या पार्श्वभूमीवर राजकीय वातावरण तापले आहे. महायुतीकडे स्पष्ट बहुमत असूनही, मतदानापूर्वीच भाजपाच्या नगरसेवकांना ‘अज्ञातस्थळी’ पाठवण्यात आले आहे. यामुळे महायुतीला क्रॉस व्होटिंगची भीती सतावत असल्याची चर्चा राजकीय वर्तुळात सुरू झाली आहे. या निवडणुकीत महायुतीकडून राष्ट्रवादी काँग्रेस (अजित पवार गट) पक्षाचे जिल्हा परिषद सदस्य आणि भाजप जिल्हा किसान आघाडीचे जिल्हाध्यक्ष अविनाश ब्राह्मणकर यांनी उमेदवारी अर्ज दाखल केला आहे. ब्राह्मणकर यांच्या उमेदवारीनंतर महायुतीमधील अंतर्गत नाराजी आणि धुसफूस समोर आली आहे. पक्षीय बलाबलानुसार, भंडारा जिल्ह्यात भाजपाकडे ८५ तर काँग्रेसकडे ४५ मतदार आहेत. गोंदिया जिल्ह्यात भाजपाकडे ८० तर काँग्रेसकडे ६१ मतदार आहेत. गोंदिया जिल्ह्यातील आमगाव नगर परिषदेची निवडणूक सात वर्षांपासून झाली नसल्याने, तेथील नगरसेवकांना या मतदानापासून वंचित राहावे लागणार आहे, ज्यामुळे निवडणुकीतील चुरस वाढली आहे. महायुतीमधील अंतर्गत नाराजी आणि शिवसेनेची उघड भूमिका लक्षात घेता, काँग्रेसने मोठी मोर्चेबांधणी केली आहे. महायुतीला शह देण्यासाठी काँग्रेसने ‘१ विरुद्ध ३’ असा फॉर्म्युला तयार केला आहे. काँग्रेसचे अधिकृत उमेदवार म्हणून माजी आमदार दिलीप बनसोड यांनी अर्ज दाखल केला आहे, तर त्यांना पाठिंबा देत काँग्रेस समर्थित प्रफुल अग्रवाल आणि नरेश ईश्वरकर यांनीही उमेदवारी अर्ज भरले आहेत. काँग्रेसच्या या रणनीतीमुळे आणि बंडखोरीच्या शक्यतेमुळे महायुतीमध्ये अस्वस्थता आहे. स्पष्ट बहुमत असूनही, विरोधकांच्या या डावपेचांमुळे ही निवडणूक आता केवळ संख्याबळावर राहिलेली नाही. भंडारा-गोंदियाच्या या राजकीय लढतीकडे संपूर्ण राज्याचे लक्ष लागले आहे.
Source link
बहुमत असूनही भाजपा नगरसेवक 'अज्ञातस्थळी' रवाना:भंडारा-गोंदिया विधान परिषद निवडणुकीत क्रॉस व्होटिंगची भीती
