पावसातील खंडामुळे सोयाबीन पिकावर झालेल्या परिणामांची पाहणी करण्यासाठी जिल्हाधिकारी आशिष येरेकर यांनी मंगळवारी नेरपिंगळाई परिसरातील धानोरा रोडवरील सोयाबीन शेतीला भेट दिली. त्यांनी शेतात जाऊन पिकाची सद्यस्थिती पाहिली आणि शेतकऱ्यांशी संवाद साधला. यंदाच्या हंगामात पावसात मोठा खंड पडल्याने सोयाबीन पिकाचे मोठे नुकसान झाले आहे. सोयाबीनची वाढ खुंटली असून अनेक शेतांमध्ये शेंगा भरलेल्या नाहीत. काही ठिकाणी शेंगा कमी लागल्या आहेत. दाणे भरण्याच्या अवस्थेतच पिकाची पाने पिवळी पडली आहेत. त्यामुळे उत्पादनात मोठी घट होण्याची शक्यता शेतकऱ्यांनी व्यक्त केली. शेतकऱ्यांनी जिल्हाधिकाऱ्यांसमोर आपल्या अडचणी मांडल्या. पिकासाठी वेळेवर पाऊस न मिळाल्याने झालेली परिस्थिती, वाढता उत्पादन खर्च आणि संभाव्य नुकसान यावर त्यांनी चर्चा केली. पावसातील खंडामुळे सोयाबीनचे अपेक्षित उत्पादन मिळणार नसल्याने शासनाने नुकसानीची नोंद घेऊन शेतकऱ्यांना मदत करावी, अशी मागणीही त्यांनी केली. या पाहणीवेळी जिल्हा कृषी अधिकारी राहुल सातपुते, उपविभागीय कृषी अधिकारी उज्वल आगरकर, तालुका कृषी अधिकारी प्रथमेश माने, कृषी सहाय्यक शितल शिरसाट उपस्थित होते. शेतकरी रमन डिगंबर आणि राहुल मंगळे हे देखील यावेळी हजर होते. जिल्हाधिकारी आशिष येरेकर यांनी सांगितले की, नेरपिंगळाई परिसरातील सोयाबीन पिकाच्या नुकसानीची आणि शेतकऱ्यांच्या अडचणींची माहिती पालकमंत्र्यांना पाठवली जाईल. आगामी बैठकीतही ही माहिती त्यांना सादर केली जाईल. त्यामुळे पावसातील खंडामुळे अडचणीत आलेल्या शेतकऱ्यांच्या नुकसानीचा प्रश्न पालकमंत्र्यांच्या बैठकीत मांडला जाईल.
Source link
जिल्हाधिकारी आशिष येरेकर यांनी नेरपिंगळाईत सोयाबीन पिकाची पाहणी केली:पावसातील खंडामुळे शेंगा भरल्या नाहीत, पिके पिवळी पडली; शेतकऱ्यांनी मांडल्या अडचणी
