भारतात मुस्लिम नसावेत, हा विचार करणारे हिंदू नाहीत:न्यूयॉर्कमध्ये ‘वन वर्ल्ड वन ह्युमॅनिटी’ कार्यक्रमात सरसंघचालक माेहन भागवत यांनी मांडले परखड विचार

राष्ट्रीय स्वयंसेवक संघाचे सरसंघचालक डॉ. मोहन भागवत म्हणाले, ‘जर एखाद्या हिंदूला असे वाटत असेल की भारतात मुस्लिम नसावेत, तर तो हिंदू असू शकत नाही. हिंदू म्हणवून घ्यायचे असेल तर सर्व मार्ग एकाच ध्येयाकडे जातात, हे मानावे लागेल. प्रत्येक माणसाची एक प्रतिष्ठा आहे आणि माणसांमध्ये कोणताही भेदभाव नाही.’

भागवत शनिवारी रात्री येथे ‘वन वर्ल्ड वन ह्युमॅनिटी’ कार्यक्रमाला संबोधित करत होते. भागवत म्हणाले, ‘आरएसएस म्हणून आम्ही मानतो की संपूर्ण मानवता एक आहे. जगात जाऊन हा संदेश देणे आमचे कर्तव्य आहे की विविधता असूनही आपण एक आहोत. विविधता ही आपल्या आंतरिक एकतेची सजावट आहे. तिचा स्वीकार, सन्मान आणि जतन केले पाहिजे.’

राजकारण आता स्वार्थाचा खेळ बनले आहे

भागवत म्हणाले, ‘मानवतेची एकता हा भारताचा पारंपरिक विचार आहे. भारताने वेळोवेळी यावर भर दिला आहे. स्वातंत्र्यानंतर आपल्याला मिळालेले संविधानही याच गोष्टीवर भर देते, पण तसे होत नाहीये.’ भागवत म्हणाले, या गोष्टी राजकारणातून होत नाहीत. हे सांगताना मला खेद वाटतो, पण सत्य हेच आहे की राजकारण आता स्वार्थाचा खेळ बनले आहे. जिथे ‘मी’ आणि ‘माझे’ आहे, तिथे कोणताही उपाय नाही. ‘आम्ही’ आणि ‘आमचे’ हाच उपाय आहे. भारतातील आमचा अनुभव आहे की सुरुवात समाजापासून करावी लागेल.’

१.३० लाख सेवा प्रकल्प, भेदभावाविना करतात मदत

भागवत म्हणाले की संवाद हे पहिले पाऊल आणि सेवा हे दुसरे पाऊल आहे. संघाचे स्वयंसेवक लोकांच्या सहकार्याने देशभरात १.३० लाखांहून अधिक छोटे सेवा प्रकल्प चालवत आहेत. ते म्हणाले की, सेवा करताना गरजू कोणत्या धर्माचा आहे हे पाहिले जात नाही आणि त्याबदल्यात कोणताही राजकीय फायदा किंवा प्रसिद्धीही मागितली जात नाही.