वाशिममध्ये आश्चर्यकारक घटना:राजुरा गावात 12 वर्षे जुन्या बोअरवेलमधून 20 दिवसांपासून सतत गरम पाणी, नमुने तपासणीसाठी नागपूरला

वाशिम जिल्ह्यातील राजूरा गावात सध्या एका आश्चर्यकारक घटनेने नागरिकांचे लक्ष वेधून घेतले आहे. गावात असलेल्या तब्बल 12 वर्षे जुन्या बोअरवेलमधून गेल्या 20 ते 25 दिवसांपासून सातत्याने गरम पाणी बाहेर येत आहे. एरवी थंड आणि सामान्य पाणी देणाऱ्या या बोअरवेलमधून अचानक गरम पाणी येऊ लागल्याने ग्रामस्थांमध्ये मोठे कुतूहल, आश्चर्य आणि काही प्रमाणात भीतीचे वातावरण निर्माण झाले आहे. भूगर्भात नेमक्या काय हालचाली सुरू आहेत, असा प्रश्न आता उपस्थित केला जात आहे. 12 वर्षे जुनी बोअरवेल आणि अचानक बदल स्थानिक नागरिकांनी दिलेल्या माहितीनुसार, ही बोअरवेल साधारण १२ वर्षे जुनी असून, आजवर यातून अत्यंत सामान्य आणि पिण्यायोग्य पाणी येत होते. मात्र, गेल्या तीन ते चार आठवड्यांपासून या बोअरवेलच्या पाण्याच्या तापमानात अचानक मोठी वाढ झाली असून, त्यातून चक्क गरम पाणी उपसले जात आहे. हा प्रकार परिसरातील नागरिकांसाठी एखाद्या आश्चर्यापेक्षा कमी नाही. दररोज आजूबाजूचे लोक हे गरम पाणी पाहण्यासाठी मोठी गर्दी करत आहेत. पाणी पिण्यास अयोग्य या घटनेची माहिती मिळताच स्थानिक प्रशासनाने आणि संबंधित विभागाने तत्काळ या गावाला भेट देऊन बोअरवेलच्या पाण्याची प्राथमिक तपासणी केली. या प्राथमिक तपासणीत एक धक्कादायक बाब समोर आली आहे. या गरम पाण्यात विविध रसायनांचे प्रमाण मोठ्या प्रमाणावर वाढले असून, हे पाणी मानवी आरोग्यासाठी अत्यंत घातक आणि पिण्यास पूर्णपणे अयोग्य असल्याचे स्पष्ट झाले आहे. प्रशासनाने नागरिकांना या पाण्याचा पिण्यासाठी किंवा स्वयंपाकासाठी वापर न करण्याच्या सक्त सूचना दिल्या आहेत. सविस्तर तपासणीसाठी नमुने नागपूरला रवाना बोअरवेलमधून अचानक गरम पाणी का येत आहे? भूगर्भात एखादी उष्णतेची लाट किंवा रासायनिक प्रक्रिया घडत आहे का? याचा सखोल आणि शास्त्रीय अभ्यास करणे गरजेचे बनले आहे. त्यामुळे या बोअरवेलच्या पाण्याचे नमुने गोळा करून ते सविस्तर आणि उच्चस्तरीय तपासणीसाठी नागपूर येथील प्रयोगशाळेत पाठवण्यात आले आहेत. नागपूरहून येणाऱ्या सविस्तर अहवालानंतरच या पाठीमागचे नेमके कारण स्पष्ट होऊ शकणार आहे. तोपर्यंत या बोअरवेलचा परिसर नागरिकांसाठी उत्सुकतेचा विषय बनून राहिला आहे. हेही वाचा.. आमदार-खासदार फोडायला रातोरात खोके जातात:मग कर्जमाफीला विलंब का? रोहित पवारांचा राज्य सरकारवर जोरदार हल्लाबोल राज्य सरकारने जाहीर केलेली शेतकरी कर्जमाफी आणि त्याची प्रत्यक्ष अंमलबजावणी यावरून राष्ट्रवादी काँग्रेस शरदचंद्र पवार पक्षाचे आमदार रोहित पवार यांनी राज्य सरकारवर टीका केली आहे. “आमदार आणि खासदार फोडताना रातोरात पैशांचे खोके पाठवले जातात, मात्र जेव्हा विषय अडचणीत सापडलेल्या शेतकऱ्यांचा येतो, तेव्हाच सरकारला विलंब का होतो?” असा थेट सवाल रोहित पवार यांनी उपस्थित केला आहे. त्यांनी आपल्या सोशल मीडिया अकाउंटवरून यासंदर्भात एक सविस्तर पोस्ट करत सरकारच्या संथ कारभाराचे वाभाडे काढले आहेत. सविस्तर वाचा



Source link