पर्यावरणाचा समतोल राखण्यासाठी वृक्षलागवड ही काळाची गरज बनली असून, समाजातील प्रत्येक घटकाने या चळवळीत सहभागी होणे आवश्यक आहे. याच उद्देशाने वृक्षवल्ली टीम सिल्लोड आणि योगेश पाटील यांनी ८ मार्च रोजी केलेला १०,५८५ वृक्षलागवडीचा संकल्प आता साकार होत आहे.
.
या कार्यक्रमाचे वैशिष्ट्य म्हणजे १ जुलै राष्ट्रीय डॉक्टर्स डे आणि महाराष्ट्र कृषी दिन या दोन्ही महत्त्वपूर्ण दिवसांचे औचित्य साधण्यात आले. समाजाचे आरोग्य, शेती आणि पर्यावरण यांचा अतूट संबंध अधोरेखित करत उपस्थित मान्यवरांनी विद्यार्थ्यांना पर्यावरण संरक्षणाचा संदेश दिला. प्रमुख उपस्थिती लाभलेले डॉ. शेखर दौड यांनी सुरुवातीपासून या वृक्षारोपण मोहिमेला सक्रिय सहकार्य केले आहे. त्यांच्या हस्ते विद्यार्थ्यांना रोपांचे वाटप करण्यात आले. यावेळी डॉक्टर्स डे निमित्त उपस्थित डॉक्टरांचा सत्कार करून त्यांच्या सामाजिक योगदानाचा गौरव करण्यात आला. कार्यक्रमात शिवाजी दाभाडे, सोमनाथ पाटील कळम तसेच सिद्धेश्वर हायस्कूलचे सर्व शिक्षक उपस्थित होते. मुख्याध्यापक फरकाडे यांनी उपक्रमाचे कौतुक केले. एक झाड म्हणजे केवळ रोपटे नव्हे, तर हजारो श्वास, लाखो आशा आणि सुरक्षित भविष्याचा मजबूत पाया आहे. आज विद्यार्थ्यांच्या हातात दिलेले हे छोटेसे रोपटे उद्या एखाद्या गावाला सावली, शेताला जीवन, पक्ष्यांना निवारा आणि समाजाला शुद्ध हवा देणारे विशाल वृक्ष बनेल, असा विश्वास या उपक्रमातून व्यक्त करण्यात आला.
एक प्रौढ झाड म्हणजे पृथ्वीचा नैसर्गिक ऑक्सिजनचा कारखाना पर्यावरण तज्ज्ञांच्या मते, एक निरोगी प्रौढ झाड दरवर्षी मोठ्या प्रमाणात कार्बन डायऑक्साइड शोषून घेत वातावरणातील हरितगृह वायू कमी करण्यास मदत करते. झाडे प्राणवायू निर्माण करतात, तापमान कमी ठेवतात, भूजल पातळी टिकवून ठेवण्यास हातभार लावतात, मातीची धूप रोखतात आणि पक्षी व इतर जीवसृष्टीसाठी सुरक्षित अधिवास निर्माण करतात. वाढत्या हवामान बदलाच्या संकटात वृक्षलागवड हा सर्वात प्रभावी, कमी खर्चिक आणि दीर्घकालीन उपाय मानला जातो. मात्र केवळ झाडे लावणे पुरेसे नाही; त्यांचे किमान तीन ते पाच वर्षे नियमित संगोपन केल्यासच पर्यावरण संवर्धनाचा उद्देश खऱ्या अर्थाने सफल होतो.
