- Marathi News
- National
- 3.5 Million Passengers And Tourists In Uttarakhand; Protests By Angry Passengers Due To Petrol Shortage, Chardham Yatra tourist Season Has Increased The Crowd, Traffic System Has Collapsed
मनमीत | डेहराडून2 तासांपूर्वी
- कॉपी लिंक
भीषण उष्णता आणि शाळांच्या सुट्ट्यांच्या काळात उत्तराखंडमध्ये चारधाम यात्रा आणि पर्यटन स्थळांवर विक्रमी गर्दी झाल्यामुळे व्यवस्थेवर मोठा ताण आला आहे. आतापर्यंत सुमारे ३५ लाख प्रवासी आणि पर्यटक राज्यात दाखल झाले आहेत. यामध्ये चारधाम यात्रेचे २० लाख प्रवासी आणि ऋषिकेश, हरिद्वार, मसुरी, नैनीताल, कैची धाम यासह इतर ठिकाणांवर पोहोचलेल्या १५ लाखांहून अधिक पर्यटकांचा समावेश आहे. या गर्दीमुळे जागोजागी मोठी वाहतूक कोंडी होत आहे.
दरम्यान, पेट्रोल-डिझेलच्या टंचाईमुळे परिस्थिती आणखी बिघडली आहे. अनेक पेट्रोल पंपांनी गाड्यांचे टँक फुल करण्यास बंदी घातली आहे. गरजेनुसार केवळ ५ किंवा १० लीटर पेट्रोल-डिझेल दिले जात आहे. जोशीमठमध्ये पेट्रोल-डिझेल न मिळाल्यामुळे अनेक प्रवासी वाहने जागच्या जागी अडकली. यामुळे संतप्त प्रवाशांनी विरोध प्रदर्शन केले. नंतर मोठ्या वाहनांना ५ लीटर आणि लहान वाहनांना २ लीटर पेट्रोल देऊन पुढे पाठवण्यात आले. विशेष म्हणजे, जोशीमठ ते बद्रीनाथ दरम्यान एकही पेट्रोल पंप नाही. उत्तरकाशीमध्ये गंगोत्री मार्गावर केवळ चिन्यालीसौड आणि जिल्हा मुख्यालयाच्या पेट्रोल पंपांवरच इंधन मिळत आहे.
हिमाचल प्रदेश : लाहौलमध्ये दरड कोसळली, रस्ता बंद
हिमाचल प्रदेशच्या लाहौल खोऱ्यात जहल्मा पुलाजवळ दरड कोसळल्यामुळे केलाँग-उदयपूर रस्ता बंद झाला आहे. रस्ता बंद झाल्यामुळे या मार्गावरील वाहनांची वाहतूक विस्कळीत झाली आहे. स्थानिक प्रशासन आणि संबंधित यंत्रणांना मार्ग खुला करण्याची सूचना देण्यात आली आहे. ढिगारा उपसण्याचे काम लवकरच सुरू केले जाईल. पर्वतीय भागातील उष्णता,पर्यटन हंगामात भूस्खलन झाल्याने प्रवाशांच्या अडचणी वाढल्या.
आदि कैलास परमिट आता पिथौरागढ जिल्हा रुग्णालयातून मिळणार
पिथौरागढ जिल्हा प्रशासनाने आदि कैलास आणि ओम पर्वत यात्रेला जाणाऱ्या भाविकांना मोठा दिलासा दिला आहे. आता इनर लाईन परमिट धारचुला तहसीलसोबतच पिथौरागढ जिल्हा रुग्णालयातूनही जारी केले जाईल. पूर्वी प्रवाशांना वैद्यकीय तपासणी, पोलीस पडताळणी आणि इतर औपचारिकता पूर्ण करण्यासाठी धारचुला येथे जावे लागत असे. जिल्हाधिकारी आशिष भटगाई यांच्या माहितीनुसार, प्रवाशांची वाढती संख्या लक्षात घेऊन ही सुविधा सुरू करण्यात आली आहे.
चित्रामध्ये यात्रा मार्गावर वाहनांच्या लांबच लांब रांगा आणि पेट्रोल पंपांवर गर्दी दिसत आहे. अनेक प्रवासी तासनतास वाहतूक कोंडीत अडकले. नैनिताल व कैची धाममध्ये वाहन प्रवेशावर बंदी घालून शटलने पाठवले जात आहे.
