प्रतिनिधी |अहिल्यानगर स्वभांडवलावर चालणाऱ्या अहमदनगर डिस्ट्रिक्ट नॅशनल पोस्टल को-ऑपरेटिव्ह क्रेडिट सोसायटीतर्फे जिल्ह्याच्या मातीतून घडलेल्या आणि भारतीय टपाल सेवेत उल्लेखनीय योगदान देणाऱ्या दोन प्रमुख अधिकाऱ्यांचा विशेष सत्कार करण्यात आला. यात केंद्रीय लोकसेवा आयोगाच्या परीक्षेत यश मिळवून सध्या प्रवर अधीक्षक म्हणून कार्यरत असलेले वंजारवाडी (ता. नेवासे) येथील विकास पालवे आणि खातेंतर्गत परीक्षेत यश मिळवून वरिष्ठ पोस्टमास्तर पदाची धुरा सांभाळणारे चोभेवाडी (ता. जामखेड) येथील रहिवासी अमृत कुमटकर यांचा गौरव करण्यात आला. अहिल्यानगर डाक विभागातील दोन्ही प्रमुख अधिकारी हे जिल्ह्याचेच भूमीपुत्र असण्याचा दुर्मीळ योग या निमित्ताने जुळून आल्याचे ज्येष्ठ सभासद संतोष यादव यांनी सांगितले. संस्थेच्या दहाव्या वार्षिक सर्वसाधारण सभेचे आयोजन हॉटेल राजयोग येथे चेअरमन कमलेश मिरगणे यांच्या अध्यक्षतेखाली करण्यात आले होते. मिरगणे म्हणाले, संस्था आजवर स्वभांडवलावर यशस्वीपणे कार्यरत असून उपलब्ध निधीतून कर्जवाटप केले जात आहे. भविष्यात संस्थेला अधिक स्वयंपूर्ण व भांडवलसंपन्न करून सभासदांना आणखी कमी व्याजदरात कर्ज सुविधा उपलब्ध करून देण्याचे आमचे नियोजन आहे. या सोहळ्यात राज्यकर निरीक्षक परीक्षेत यश मिळवलेले सौरभ लांडे यांच्यासह उत्कृष्ट कर्मचारी रुपाली खेडकर, असिफ शेख, सुनील रोकडे, शुभांगी मांडगे, संभाजी बसवेकर तसेच निवृत्त सभासद नामदेव डेंगळे, वंदना नगरकर व संजय बोदर्डे आणि ४० गुणवंत पाल्यांचा सत्कार करण्यात आला. प्रवर अधीक्षक विकास पालवे यांनी पतसंस्थेच्या अत्यल्प व्याजदरातील कर्ज सुविधेचे आणि सभासदाभिमुख कार्याचे कौतुक केले. कुमटकर म्हणाले, जन्मभूमीत आणि सहकाऱ्यांच्या उपस्थितीत झालेला हा सन्मान अभिमानास्पद आहे. प्रास्ताविक कमलेश मिरगणे यांनी, सूत्रसंचालन मोनाली हिंगे यांनी, तर आभार अमोल साबळे यांनी मानले.
Source link
स्वभांडवलावर चालणाऱ्या पोस्टल पतसंस्थेतर्फे पालवे, कुमटकर या भूमीपुत्र अधिकाऱ्यांचा सन्मान:रतीय टपाल सेवेत उल्लेखनीय योगदान
