महाराष्ट्राच्या राजकारणात सध्या वेगाने उलथापालथ सुरू असून, मुख्यमंत्री एकनाथ शिंदे यांच्या नेतृत्वाखालील शिवसेनेने राबवलेले ‘ऑपरेशन टायगर’ कमालीचे यशस्वी होताना दिसत आहे. उद्धव ठाकरे यांच्या शिवसेनेतील (उबाठा) तब्बल सहा खासदारांनी साथ सोडल्यानंतर, आता ठाकरेंचे आमदारही शिंदेंच्या शिवसेनेत प्रवेश करतील, असा मोठा आणि खळबळजनक दावा शिवसेना शिंदे गटाचे नेते बच्चू कडू यांनी केला आहे. यामुळे ठाकरे गटाच्या गोटात मोठी अस्वस्थता निर्माण झाली आहे. “शिंदे साहेबांचं प्लॅनिंग एकदम करेक्ट” – बच्चू कडू राजकीय घडामोडींवर प्रतिक्रिया देताना बच्चू कडू यांनी मुख्यमंत्री एकनाथ शिंदे यांच्या राजकीय रणनीतीचे तोंडभरून कौतुक केले. ते म्हणाले की, “ठाकरे गटाचे खासदार आल्यानंतर आता त्यांच्या पाठोपाठ आमदारही येणारच आहेत. त्या बाबतीत शिंदे साहेबांचं नियोजन एकदम व्यवस्थित आणि करेक्ट असतं. बाळासाहेबांची शिवसेना खऱ्या अर्थाने जिवंत ठेवण्याचं काम एकनाथ शिंदे करत आहेत.” शिंदे यांच्या कार्यपद्धतीवर बोलताना कडू पुढे म्हणाले, “या राज्यात सर्वसामान्य, शेतकरी, गरीब आणि दिव्यांगांचा खरा माणूस म्हणून एकनाथ शिंदे यांच्याकडे पाहिले जाते. मी जसा त्यांच्या सेवाभावी वृत्तीच्या मोहात पडलो, तसेच अनेक नेते आज त्यांच्या मोहात आहेत.” शिंदेंची शिवसेना ठरणार सर्वाधिक खासदारांचा पक्ष ‘ऑपरेशन टायगर’ अंतर्गत बंडखोर खासदारांच्या मनधरणीबाबत कमालीची गुप्तता पाळण्यात आली होती. या ६ खासदारांनी स्वतंत्र गट स्थापन करून लोकसभा अध्यक्ष ओम बिर्ला यांना तसे पत्रही दिल्याची माहिती आहे. हे खासदार अधिकृतरीत्या शिंदे गटात विलीन झाल्यास, एकनाथ शिंदे यांच्या शिवसेनेचे लोकसभेतील संख्याबळ 7 वरून थेट 13 वर पोहोचेल. परिणामी, महायुतीमध्ये शिवसेना हा महाराष्ट्रातील सर्वाधिक खासदार असलेला पक्ष ठरणार आहे. संख्याबळाचे नवे चित्र: कोण कुठे? शिंदे गटाच्या वाटेवर असलेले ६ बंडखोर खासदार: संजय जाधव (परभणी) संजय देशमुख (यवतमाळ- वाशिम) नागेश पाटील आष्टीकर (हिंगोली) ओमराजे निंबाळकर (धाराशिव) भाऊसाहेब वाकचौरे (शिर्डी) संजय दीना पाटील (ईशान्य मुंबई) उद्धव ठाकरेंसोबत उरलेले ३ निष्ठावान खासदार अरविंद सावंत (दक्षिण मुंबई) अनिल देसाई (दक्षिण मध्य मुंबई) राजाभाऊ वाजे (नाशिक) शनिवारी अधिकृत घोषणेची शक्यता सूत्रांनी दिलेल्या माहितीनुसार, या सहा खासदारांच्या स्वतंत्र गटाबाबत किंवा शिंदे गटातील विलीनीकरणाबाबत शनिवारी संसदेकडून विशेष परिपत्रक जारी केले जाण्याची दाट शक्यता आहे. कायदेशीर अडथळा दूर? शिवसेना (उबाठा) चे लोकसभेत एकूण ९ खासदार आहेत. त्यापैकी ६ खासदार बाहेर पडल्यामुळे हा आकडा दोन-तृतीयांश (२/३) बहुमताचा निकष पूर्ण करतो. त्यामुळे त्यांच्यावर पक्षांतर बंदी कायद्यांतर्गत अपात्रतेची कारवाई होण्याची शक्यता जवळपास संपुष्टात आल्याची चर्चा सुरू आहे. ठाकरे गटाची कोंडी दुसरीकडे, ठाकरे गटाने पक्षाच्या शिस्तीचा भंग केल्याचा ठपका ठेवत या खासदारांना कारणे दाखवा नोटीस बजावली आहे. मात्र, लोकसभा अध्यक्षांच्या निर्णयानंतरच यावर अंतिम शिक्कामोर्तब होईल. खासदारांच्या या संभाव्य पक्षप्रवेशामुळे आगामी विधानसभा निवडणुकांच्या पार्श्वभूमीवर एकनाथ शिंदे गटाची ताकद आणखी वाढली असून, महाविकास आघाडीसाठी हा मोठा धक्का मानला जात आहे.
Source link
'ऑपरेशन टायगर'चा दुसरा अंक!:6 खासदारांनंतर आता ठाकरेंचे आमदारही शिंदेंच्या गळाला? बच्चू कडूंचा मोठा दावा
