महाराष्ट्राच्या राजकारणात गेल्या काही दिवसांपासून चर्चेत असलेल्या ‘ऑपरेशन टायगर’ प्रकरणाला आता नवे वळण मिळाले आहे. शिवसेना (उद्धव बाळासाहेब ठाकरे) पक्षातील सहा खासदारांच्या बंडानंतर या संपूर्ण घडामोडींचा कथित पहिला फोटो समोर आल्याचा दावा करण्यात आला आहे. या फोटोमुळे पडद्यामागे सुरू असलेल्या राजकीय हालचालींबाबतच्या चर्चांना आणखी उधाण आले आहे. सूत्रांच्या माहितीनुसार, या छायाचित्रात ठाकरे गटाची साथ सोडणारे काही खासदार दिल्लीतील एका आलिशान पंचतारांकित हॉटेलमध्ये एकत्र दिसत आहेत. विशेष म्हणजे, या बैठकीला ‘ऑपरेशन टायगर’च्या रणनीतीशी संबंधित महत्त्वाची बैठक मानले जात असून राजकीय वर्तुळात त्याची जोरदार चर्चा सुरू झाली आहे. फोटोत कोणकोणते खासदार दिसले? समोर आलेल्या कथित फोटोमध्ये ठाकरे गटाचे बंडखोर खासदार म्हणून चर्चेत असलेले तीन प्रमुख चेहरे दिसत असल्याचे सांगितले जात आहे. नागेश पाटील आष्टीकर, संजय दिना पाटील, संजय देशमुख हे तिन्ही खासदार एका पंचतारांकित हॉटेलमध्ये चर्चेत सहभागी झाल्याचे सांगितले जात आहे. मात्र, या बैठकीबाबत संबंधित नेत्यांकडून अधिकृत माहिती अद्याप समोर आलेली नाही. ‘ऑपरेशन टायगर’ची रणनीती कुठे आखली गेली? राजकीय सूत्रांच्या माहितीनुसार, उपमुख्यमंत्री एकनाथ शिंदे यांचे पुत्र आणि खासदार श्रीकांत शिंदे यांनी महाराष्ट्रातील राजकीय रणनीती आखण्यात महत्त्वाची भूमिका बजावली. तर दिल्लीत शिवसेनेचे राष्ट्रीय समन्वयक अभिषेक वर्मा यांनी समन्वय साधल्याची चर्चा आहे. सूत्रांचे म्हणणे आहे की, ही संपूर्ण प्रक्रिया काही दिवसांची नसून मागील अनेक महिन्यांपासून अत्यंत गोपनीय पद्धतीने सुरू होती. दिल्लीतील मध्यरात्रीच्या बैठकीत अंतिम निर्णय? १६ आणि १७ जूनच्या मध्यरात्री दिल्लीत एकनाथ शिंदे यांनी बंडखोर खासदारांसोबत एक महत्त्वाची बैठक घेतल्याची माहिती समोर आली होती. याच बैठकीत ‘ऑपरेशन टायगर’च्या अंतिम आराखड्यावर शिक्कामोर्तब झाल्याची चर्चा राजकीय वर्तुळात रंगली आहे. यानंतर सहा खासदारांनी लोकसभा अध्यक्ष ओम बिर्ला यांच्याकडे स्वतंत्र गटाच्या मान्यतेसाठी पत्र दिल्याचे वृत्त समोर आले आणि महाराष्ट्राच्या राजकारणात मोठा भूकंप झाला. सहा खासदारांच्या बंडामुळे ठाकरे गटाला मोठा धक्का सध्या बंडखोर म्हणून चर्चेत असलेल्या खासदारांमध्ये खालील नावांचा समावेश आहे: या घडामोडींमुळे ठाकरे गटाला लोकसभेत मोठा धक्का बसल्याचे मानले जात आहे. आता ‘मातोश्री’वर उद्धव ठाकरेंची रणनीती दरम्यान, या सर्व राजकीय घडामोडींच्या पार्श्वभूमीवर शिवसेना (उद्धव बाळासाहेब ठाकरे) पक्षप्रमुख उद्धव ठाकरे यांनी ‘मातोश्री’वर महत्त्वाची बैठक बोलावली आहे. या बैठकीसाठी बंडखोर खासदारांच्या मतदारसंघांतील सर्व जिल्हाप्रमुख, संपर्कप्रमुख आणि प्रमुख पदाधिकाऱ्यांना निमंत्रित करण्यात आले आहे. बंडानंतर प्रथमच उद्धव ठाकरे थेट संघटनात्मक आढावा घेणार असून कार्यकर्त्यांना पुढील राजकीय लढाईबाबत मार्गदर्शन करणार आहेत. ‘ऑपरेशन टायगर’ यशस्वी झाल्याचा दावा शिंदे गटाकडून केला जात असताना, ठाकरे गटाकडून या लढ्याला राजकीय आणि कायदेशीर उत्तर देण्याची तयारी सुरू आहे. कथित फोटो समोर आल्यानंतर आता आणखी कोणते नेते किंवा लोकप्रतिनिधी उघडपणे भूमिका घेणार, तसेच महाराष्ट्रातील राजकीय समीकरणांवर त्याचा काय परिणाम होणार, याकडे संपूर्ण राज्याचे लक्ष लागले आहे.
Source link
‘ऑपरेशन टायगर’चा पहिला फोटो समोर!:पंचतारांकित हॉटेलमधील बैठकीने चर्चांना उधाण; उद्धव ठाकरेंची ‘मातोश्री’वर महत्त्वाची बैठक
