13th day of CJP agitation, Sonam Wangchuk’s health deteriorates, Abhijit Deepke’s ‘Chai Pe Charcha’ program with protesters

जंतरमंतर येथे सुरू असलेल्या उपोषणाच्या पाचव्या दिवशी गुरुवारी सामाजिक कार्यकर्ते सोनम वांगचुक यांची प्रकृती खालावली. त्यांच्या रक्तातील साखर ६० पर्यंत खाली आली. रक्तदाब कमी झाला आहे.

या आंदोलनाला आता सीपीआय (एमएल) लिबरेशनचे सरचिटणीस दीपांकर भट्टाचार्य आणि आरटीआय कार्यकर्ते निखिल डे यांनी पाठिंबा दिला आहे. कॉक्रोच जनता पार्टीचे प्रमुख अभिजित दिपके म्हणाले, ‘सोनम वांगचुक यांची प्रकृती खालावत आहे. त्यांच्या साखरेची पातळी ६० वर आली आहे आणि रक्तदाबही खूप कमी आहे. सोनम सरांना काही झाले तर त्याला सरकार जबाबदार असेल.’ त्यांनी केंद्रीय शिक्षण मंत्री धर्मेंद्र प्रधान यांच्या राजीनाम्याच्या मागणीचा पुनरुच्चार केला. दिपके यांनी आंदोलकांसोबत ‘कॉक्रोचसोबत चाय पे चर्चा’ नावाचा संवाद कार्यक्रमही आयोजित केला. हे आंदोलन चांगले आणि मोठे कसे करता येईल, यावर लोकांच्या प्रतिक्रिया गोळा करणे हा यामागचा उद्देश असल्याचे त्यांनी सांगितले.

दरम्यान, वांगचुक यांच्या पत्नी गीतांजली जे. आंग्मो यांनी दिवसभरात आंदोलनस्थळाला भेट दिली.ऑल इंडिया स्टुडंट्स असोसिएशनशी (आयसा) संबंधित ६ विद्यार्थ्यांनी जंतरमंतरवर दुसऱ्या स्टेजवरून बेमुदत उपोषण सुरू ठेवले आहे.

पोलिसांनी आंदोलकांना मारहाण केल्याचा आरोप

दिपके यांनी ‘एक्स’वर दावा केला की, दिल्ली पोलीस कर्मचाऱ्यांनी आंदोलनस्थळी वाचनालय सुरू करण्याचा प्रयत्न करणाऱ्या दोन तरुणांना मारहाण केली आणि छत्रपती शिवाजी महाराज व भगतसिंग यांच्यावरील पुस्तकांसह इतर पुस्तके फेकून दिली. त्यांनी एसीपी अजय शर्मा यांच्या निलंबनाची मागणी केली. या अधिकाऱ्याने दोन्ही ऐतिहासिक व्यक्तिमत्त्वांचा अपमान केल्याचा आरोप त्यांनी केला आणि ‘ज्या विद्यार्थ्यांना केवळ आंदोलनस्थळी लोकांनी पुस्तके वाचावीत असे वाटत होते,’ त्यांच्यावर पोलिसांनी कारवाई का केली, असा सवाल त्यांनी उपस्थित केला.