नाशिकमध्ये उघडकीस आलेल्या भोंदू अशोक खरात प्रकरणात दिवसेंदिवस नवे धक्कादायक तपशील समोर येत आहेत. दैवी शक्ती आणि तंत्र-मंत्राच्या आड महिलांचे शोषण करणाऱ्या या प्रकरणाने राज्यभर खळबळ उडवली आहे. आता या प्रकरणात आणखी एक गंभीर बाब उघड झाली असून, सात महिन्यांच्या गरोदर महिलेलाही खरातने लक्ष्य केल्याची माहिती समोर आली आहे. या घटनेमुळे समाजात संतापाची लाट उसळली आहे. विशेष तपास पथकाने (एसआयटी) खरातच्या ‘ओकस प्रॉपर्टीज’ या कार्यालयावर छापा टाकला असता, तेथे हिरवट रंगाचे संशयास्पद द्रव्य सापडले आहे. हे द्रव्य नेमके काय आहे, याबाबत मोठे गूढ निर्माण झाले आहे. प्राथमिक तपासात हे द्रव्य महिलांना गुंगी आणण्यासाठी किंवा त्यांच्यावर मानसिक प्रभाव टाकण्यासाठी वापरले जात असल्याचा संशय व्यक्त करण्यात येत आहे. या द्रव्याचे नमुने तातडीने रासायनिक तपासणीसाठी प्रयोगशाळेत पाठवण्यात आले आहेत. तपास यंत्रणांच्या मते, या प्रकरणात जप्त करण्यात आलेला पेनड्राइव्ह आणि हे हिरवे द्रव्य हे दोन अत्यंत महत्त्वाचे पुरावे ठरू शकतात. या पुराव्यांच्या आधारे खरातच्या गुन्हेगारी जाळ्याचा अधिक खोलवर उलगडा होण्याची शक्यता आहे. तपासाचा वेग वाढवण्यात आला असून, प्रत्येक बाब बारकाईने तपासली जात आहे. फॉरेन्सिक अहवाल आल्यानंतर या द्रव्याचे खरे स्वरूप स्पष्ट होणार आहे. दरम्यान, सरकारवाडा पोलिस ठाण्यात दाखल असलेल्या प्रकरणात खरातची पोलिस कोठडी आज संपत आहे. त्यामुळे आज, 13 एप्रिल रोजी त्याला न्यायालयासमोर हजर केले जाणार आहे. सुरक्षेच्या कारणास्तव ही सुनावणी व्हिडिओ कॉन्फरन्सिंगद्वारे पार पडणार आहे. एसआयटीकडून पुढील तपासासाठी त्याची पोलिस कोठडी वाढवण्याची मागणी होण्याची शक्यता व्यक्त केली जात आहे. खरातविरोधात आतापर्यंत लैंगिक शोषण, खंडणी, सावकारी आणि फसवणूक अशा विविध प्रकारचे एकूण 14 गुन्हे नोंदवण्यात आले आहेत. या प्रकरणात चिंचोंक्याचे खडे बनवणारा व्यावसायिक महेश कलंत्री तसेच खरातच्या कार्यालयातील कर्मचाऱ्यांचीही सखोल चौकशी करण्यात आली आहे. या चौकशीतून खरातच्या कार्यपद्धतीबाबत अनेक धक्कादायक बाबी समोर आल्या आहेत. तपास अधिकाऱ्यांनी तयार केलेला सविस्तर अहवाल आज न्यायालयात सादर केला जाणार आहे. यामध्ये खरातने महिलांना कशा प्रकारे जाळ्यात ओढले, त्यासाठी कोणत्या पद्धती वापरल्या, याचा तपशील दिला जाणार आहे. विशेष म्हणजे, सात महिन्यांच्या गरोदर महिलेशी संबंधित प्रकरणामुळे या तपासाला अधिक गंभीर स्वरूप प्राप्त झाले आहे. धक्कादायक खुलासे होण्याची शक्यता आजच्या सुनावणीत सरकार पक्षाची भूमिका आणि न्यायालयाचा निर्णय अत्यंत महत्त्वाचा ठरणार आहे. तसेच, तिसऱ्या गुन्ह्यातील आरोपीला चौथ्या गुन्ह्यात वर्ग करण्यासाठी एसआयटीकडून अर्ज दाखल होण्याची शक्यता आहे. या प्रकरणातील प्रत्येक घडामोडीकडे संपूर्ण राज्याचे लक्ष लागले असून, पुढील काही दिवसांत आणखी धक्कादायक खुलासे होण्याची शक्यता नाकारता येत नाही.
Source link
अशोक खरातने गरोदर महिलेलाही नाही सोडलं; हिरव्या द्रव्याने वाढलं रहस्य:आज न्यायालयासमोर हजर केले जाणार
